យោធាមីយ៉ាន់ម៉ា វាយកម្ទេចអគារជិត១៥០ខ្នង ក្នុងការបង្ក្រាបលើបរិវេណឆបោកតាមអ៊ីនធឺណិតដែលមានព្រំប្រទល់ជាប់នឹងប្រទេសថៃ

ណៃពិដោ៖ កាលពីថ្ងៃអាទិត្យទី៩វិច្ឆិកាយោធាមីយ៉ាន់ម៉ាអះអាងថា បានវាយកម្ទេចអគារជិត១៥០ខ្នង ក្នុងការបង្ក្រាបលើបរិវេណឆបោកតាមអ៊ីនធឺណិតដ៏ល្បីល្បាញមួយ ដែលមានព្រំប្រទល់ជាប់នឹងប្រទេសថៃ រួមទាំងកន្លែងហាត់ប្រាណ ស្ប៉ា និងខារ៉ាអូខេ។

មជ្ឈមណ្ឌលឆបោកដែលរីករាលដាលដូចផ្សិតត្រូវទឹកភ្លៀងនៅក្នុងតំបន់ព្រំដែន ដែលមានការគ្រប់គ្រងធូររលុងរបស់ប្រទេសមីយ៉ាន់ម៉ា។ អាជីវកម្មស្មោកគ្រោកនេះអាចរកចំណូលបានរាប់សិបពាន់លានដុល្លារជារៀងរាល់ឆ្នាំ។ កម្មករជាច្រើនត្រូវបានជួញដូរចូលទៅក្នុងមជ្ឈមណ្ឌលឆបោកតាមអ៊ីនធឺណិត ប៉ុន្តែក៏មានអ្នកស្ម័គ្រចិត្តធ្វើការខុសច្បាប់ដែរ។

កាលពីខែមុន យោធាមីយ៉ាន់ម៉ា បានប្រកាសពីការវាយឆ្មក់លើមជ្ឈមណ្ឌលឆបោកដ៏ល្បីល្បាញ KK Park ដោយបានរកឃើញអ្នកបោកប្រាស់ជាង២០០០នាក់ និងបញ្ជូនមនុស្ស១៥០០នាក់ ភៀសខ្លួនឆ្លងកាត់ព្រំដែនទៅកាន់ប្រទេសថៃ។ នៅក្នុងព័ត៌មានថ្មីៗចុះផ្សាយលើកាសែត The Global New Light of Myanmar របបយោធា បានបានរកឃើញអគារចំនួន១៤៨ រួមទាំងអន្តេវាសិកដ្ឋាន មន្ទីរពេទ្យបួនជាន់ និងអគារខារ៉ាអូខេពីរជាន់។

អគារចំនួន១០១ ត្រូវបានវាយកម្ទេច ហើយអគារចំនួន៤៧ដែលនៅសល់ក៏ត្រៀមនឹងវាយកម្ទេចដូចគ្នា។ យ៉ាងណា អ្នកជំនាញលើកឡើងថា ការវាយឆ្មក់របស់របបយោធាទំនងជាមានកម្រិត ត្រូវបានរៀបចំ និងផ្សព្វផ្សាយជាសាធារណៈដោយចេតនា ខណៈដែលកំពុងព្យាយាមបន្ធូរបន្ថយសម្ពាធអន្តរជាតិ ដើម្បីបង្ក្រាបមជ្ឈមណ្ឌលឆបោក។ ចិនគឺជាអ្នកគាំទ្រផ្នែកយោធាដ៏សំខាន់របស់របបសឹក ប៉ុន្តែអ្នកវិភាគលើកឡើងថា រដ្ឋធានីប៉េកាំង កាន់តែខឹងសម្បារចំពោះការឆបោកដ៏រីករាលដាល ដែលកំណត់គោលដៅលើពលរដ្ឋរបស់ខ្លួន។ ប៉ុន្តែការបង្ក្រាបខ្លាំងពេក ក៏នឹងធ្វើឱ្យខូចប្រាក់ចំណេញ ដែលរបបយោធាពឹងផ្អែកលើផងដែរ។

កាលពីខែកុម្ភៈ យុទ្ធនាការសម្ពាធដែលដឹកនាំដោយប្រទេសចិន បានឃើញកម្មករបោកប្រាស់ប្រហែល៧០០០នាក់ ត្រូវបានធ្វើមាតុភូមិនិវត្តន៍ក្នុងការចាកចេញ ដែលមានការផ្សព្វផ្សាយយ៉ាងទូលំទូលាយពីប្រទេសមីយ៉ាន់ម៉ា ខណៈប្រទេសថៃបានអនុវត្តការបិទអ៊ីនធឺណិតឆ្លងកាត់ព្រំដែន ក្នុងគោលបំណងដើម្បីបង្អាក់ដំណើរការមជ្ឈមណ្ឌលឆបោក។

យោធាបានប្រកាសពីការវាយឆ្មក់ដំបូងលើតំបន់ KK Park នៅថ្ងៃទី១៩ ខែតុលា បន្ទាប់ពីការស៊ើបអង្កេតរបស់ទីភ្នាក់ងារសារព័ត៌មាន AFP បង្ហាញថា មជ្ឈមណ្ឌលនានា រួមទាំងតំបន់ KK Park កំពុងពង្រីកខ្លួន ទោះបីជាមានការបង្ក្រាបជាក់ស្តែងក៏ដោយ ដោយមានឧបករណ៍ទទួលអ៊ីនធឺណិតផ្កាយរណប Starlink ត្រូវបានដំឡើងយ៉ាងច្រើន ដើម្បីគេចពីការកាត់ផ្តាច់បណ្តាញអ៊ីនធឺណិតរបស់ប្រទេសថៃ។ បន្ទាប់ពីការស៊ើបអង្កេតរបស់ AFP ក្រុមហ៊ុន SpaceX បានកាត់ផ្តាច់សញ្ញាទៅកាន់ស្ថានីយអ៊ីនធឺណិតផ្កាយរណបជាង២៥០០ នៅជិតមជ្ឈមណ្ឌលឆបោកមីយ៉ាន់ម៉ា៕