កម្ពុជា និងប្រទេសឡេតូនីប្តេជ្ញាលើកកម្ពស់កិច្ចសហប្រតិបត្តិការឱ្យកាន់តែរឹងមាំនិងររីកចម្រើនដល់កម្រិតថ្មី

ឯកអគ្គរាជទូតវិសាមញ្ញានិងពេញសមត្ថភាពនៃព្រះរាជាណាចក្រកម្ពុជាប្រចាំសាធារណរដ្ឋឡេតូនីបានបង្ហាញថា កម្ពុជា និងសាធារណរដ្ឋឡេតូនីប្តេជ្ញាចិត្តលើការធ្វើឱ្យចំណងសភាព និងកិច្ចសហប្រតិបត្តិការរវាងប្រទេសទាំងពីររីកចម្រើនដល់កម្រិតថ្មីដើម្បីបម្រើដល់ផលប្រយោជន៍នៃប្រទេសទាំងពីរ។
ការប្តេជ្ញាបែបនេះ ក្នុងឱកាស ឯកឧត្តម បណ្ឌិត ជា ច័ន្ទបរិបូរណ៍ ឯកអគ្គរាជទូតវិសាមញ្ញានិងពេញសមត្ថភាព នៃព្រះរាជាណាចក្រកម្ពុជាប្រចាំសាធារណរដ្ឋឡេតូនី ( Latvia) អញ្ជើញប្រគល់ព្រះរាជសារតាំង របស់ព្រះមហាក្សត្រកម្ពុជា ដែលតែងតាំងឯកឧត្តមជាឯកអគ្គរដ្ឋទូត ជូនចំពោះ ឯកឧត្តម Edgars Rinkēvičs ប្រធានាធិបតី សាធារណរដ្ឋឡេតូនី នៅទីក្រុង រីហ្គា កាលពី ថ្ងៃ១៩ កញ្ញា ២០២៥។
ក្នុងឱកាសនោះ ឯកឧត្តមឯកអគ្គរាជទូតកម្ពុជាបានពាំនាំព្រះរាជបណ្តាំរបស់ព្រះមហាក្សត្រកម្ពុជា ,សម្តេចប្រធានព្រឹទ្ធសភា ,សម្តេចប្រធានរដ្ឋសភា ,សម្តេចធិបតីនាយករដ្ឋមន្រ្តី ជូនដល់ឯកឧត្តមប្រធានាធិបតី លោកជំទាវប្រធានរដ្ឋសភា និងឯកឧត្តមនាយករដ្ឋមន្ត្រី ។
ឯកឧត្តម បណ្ឌិតជា ច័ន្ទបរិបូរណ៍ មានប្រសាសន៍ថា ជំនួបជាផ្លូវការនេះ បង្ហាញអំពីឆន្ទៈនៃការកសាងភាពជាដៃគូនិងសហប្រតិបត្តិការកាន់តែរឹងមាំនាពេលនេះនិងតៅអនាគតរុងរឿងរបស់ប្រទេសយើងទាំងពីរ (កម្ពុជា -ឡេតូនី)។
ឯកឧត្តមបញ្ជាក់ថា កម្ពុជានឹងបន្តពង្រឹងកិច្ចសហប្រតិបត្តិការជាមួយសាធារណរដ្ឋឡេតូនី នៅលើវិស័យសំខាន់ៗមួយចំនួន ដើម្បីលើកកម្ពស់អភិវឌ្ឍន៍ជាសកល និងទាក់ទាញផលប្រយោជន៍រួមសម្រាប់ប្រជាជនទាំងពីរប្រទេស។
វិស័យសំខាន់ៗទាំងនោះរួមមាន ៖ កិច្ចសហប្រតិបត្តិការផ្នែក ពាណិជ្ជកម្ម , កិច្ចសហប្រតិបត្តិការផ្នែក ទេសចរណ៍ និងវប្បធម៌, កិច្ចសហប្រតិបត្តិការផ្នែក អប់រំ និងបច្ចេកវិជ្ជា,  កិច្ចសហការនៅក្នុង វិស័យព័ត៌មាន,កិច្ចការការបរទេសជាដើម។
ឯកឧត្តម បណ្ឌិត ជាច័ន្ទបរិបូរណ៍ បានសន្យាថា ក្នុងអណត្តិការទូតរបស់ឯកឧត្តមនេះ នឹងធ្វើឱ្យចំណងសភាព និងកិច្ចសហប្រតិបត្តិការរវាងប្រទេសទាំងពីររីកចម្រើនដល់កម្រិតថ្មីថែមទៀត។
ចំពោះសភាពការណ៍ព្រំដែនកម្ពុជា-ថៃឯកអគ្គរាជទូតកម្ពុជាបញ្ជាក់ជូនដល់ប្រធានាធិបតី សាធារណរដ្ឋឡេតូនីថា ក្នុងការដោះស្រាយបញ្ហាព្រំដែនជាមួយប្រទេសថៃ មាគ៌ាដ៏សមស្រប និងស៊ីវិល័យបំផុតក្នុងការដោះស្រាយគឺតាមរយៈដំណើរការផ្លូវច្បាប់នៅចំពោះមុខតុលាការយុត្តិធម៌អន្តរជាតិ ICJ ដែលធានាបាននូវដំណោះស្រាយដោយសន្តិវិធី ដើម្បីភាពរុងរឿងនៃមនុស្សជំនាន់ក្រោយ សង្គ្រាម មិន មែន ជា ជម្រើស របស់ កម្ពុជា ឡើយ ។  កម្ពុជាគោរពយ៉ាងម៉ឺងម៉ាត់និងអនុវត្តន៍យ៉ាងស្មោះត្រង់ចំពោះកិច្ចព្រមព្រៀងបទឈប់បាញ់ថ្ងៃទី២៨កក្កដា២០២៥នៅប្រទេសម៉ាឡេស៊ី។ ក៏ប៉ុន្តែ ភាគីថៃមិនបានគោរពឡើយ ដោយបន្តធ្វើទុកបុកម្នេញ ព័ទ្ធរបងលួសបន្លា រំលោភអធិបតេយ្យភាពកម្ពុជា និងរំលោភលើជនស៊ីវិលជាច្រើនករណី៕