កុមារមានពិការភាព និងគ្រួសារ នៅស្រុកត្រាំកក់ ទទួលការអន្តរាគមន៍ពីមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តតាកែវ
ភ្នំពេញ៖ដោយទទួលបានការចង្អុលបង្ហាញពីឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា នៅថ្ងៃអង្គារ ២រោច ខែភទ្របទ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី៩ ខែកញ្ញា ឆ្នាំ២០២៥ មន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តតាកែវ បានដឹកនាំក្រុមការងារជំនាញពាក់ព័ន្ធ រួមមាន សាខាមូលនិធិជនពិការខេត្ត មជ្ឈមណ្ឌលស្តារលទ្ធភាពពលកម្មកាយសម្បទាខេត្ត និងអាជ្ញាធរមូលដ្ឋាន បានចុះជួបកុមារមានពិការភាព និងគ្រួសារ ស្ថិតនៅភូមិត្រពាំងឈូក ឃុំត្រពាំងធំខាងត្បូង ស្រុកត្រាំកក់ ដែលករណីនេះត្រូវបានបណ្តាញសង្គម Facebook ផ្សព្វផ្សាយស្វែងរកសេវាគាំទ្រដល់កុមារពិការភាព និងគ្រួសារដែលកំពុងមានជីវភាពខ្វះខាត។
ក្រុមការងារបានបញ្ជាក់ថា គ្រួសារនេះពិតជាត្រូវការជំនួយ ដូចនៅក្នុងការផ្សាយតាមបណ្តាញសង្គម Facebook ពិតប្រាកដមែន ដោយគ្រួសារនេះមានកូនក្នុងបន្ទុក ចំនួន ៣នាក់ ក្នុងនោះ កូន២នាក់ មានពិការភាព គឺកូនទី១ អាយុ ១៤ឆ្នាំ ភេទប្រុស ពិការពីកំណេីត និងកូនទី៣ អាយុ ៧ឆ្នាំ ភេទប្រុស ពិការពីកំណេីត។
កុមារមានពិការភាពទាំងពីរនាក់ មិនអាចដើរបានទេ ដូច្នេះពួកគេត្រូវការរទេះរុញសម្រាប់ប្រេីប្រាស់ប្រចាំថ្ងៃ។ ដោយឡែក គ្រួសារនេះមានបណ្ណសមធម៌ ដែលត្រូវទទួលបានសេវា និងការឧបត្ថម្ភនានាពីរាជរដ្ឋាភិបាល តាមរយៈកម្មវិធីជាតិជំនួយសង្គម ។ បច្ចុប្បន្ន ឪពុកធ្វើការសំណង់នៅភ្នំពេញ ហេីយ ម្តាយលក់បាយសម្លច្រកថង់ នៅមុខរោងក្រចម្ងាយ៣គីឡូម៉ែត្រពីផ្ទះ ។
ជាការឆ្លេីយតបបឋម ក្រុមការងារបាននាំយកនូវអំណោយដ៏ថ្លៃថ្លារបស់ឯកឧត្តមរដ្ឋមន្ត្រី និងលោកជំទាវ រួមមាន អង្ករគ្រឿងឧបភោគបរិភោគ និងថវិកាមួយចំនួន។
ជាមួយគ្នានេះ ក្រុមការងារបានផ្តល់ជូនរទេះសម្រាប់កុមារមានពិការភាព តាមរយៈមជ្ឈមណ្ឌលស្តារលទ្ធភាពពលកម្មកាយសម្បទាខេត្ត ហេីយសាខាមូលនិធិជនពិការខេត្តតាកែវ នឹងសិក្សាពីលទ្ធភាពដើម្បីសាងសង់ផ្ទះមូលនិធិជនពិការជូនគ្រួសារកុមារមានពិការភាពនេះ។
ជំហ៊ានបន្ទាប់ ក្រុមការងារនឹងរៀបចំផែនការបន្តដេីម្បីធានាថា កុមារមានពិការភាពទទួលកិច្ចគាំពារពេញលេញ និងសេដ្ឋកិច្ចគ្រួសាររបស់ពួកគេឱ្យបានល្អប្រសេីរ។
