បណ្តាមេដឹកនាំពិភពលោក និងសមាគមអ្នកកាសែត ប្រតិកម្មទៅនឹងការវាយប្រហាររបស់អ៉ីស្រាអែលលើមន្ទីរពេទ្យក្នុងតំបន់ហ្កាហ្សា ដែលសម្លាប់មនុស្សចំនួន ២០នាក់ រួមទាំងអ្នកកាសែត ៥នាក់

Reuters៖ បើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី២៦ ខែសីហា ឆ្នាំ២០២៥ បណ្តាមេដឹកនាំពិភពលោក និងសមាគមអ្នកកាសែត បានចេញមុខប្រតិកម្មទៅនឹងការវាយប្រហាររបស់អ៉ីស្រាអែលកាលពីថ្ងៃចន្ទ លើមន្ទីរពេទ្យ Nasser ក្នុងតំបន់ហ្កាហ្សាសម្លាប់មនុស្សចំនួន ២០នាក់ រួមទាំងអ្នកកាសែត ៥នាក់ដែលធ្វើការឱ្យ Reuters, AP, Al Jazeera និងប្រព័ន្ធផ្សព្វផ្សាយដទៃទៀត។

អង្គការ The Committee to Protect Journalists បានថ្កោលទោសការវាយប្រហាររបស់អ៉ីស្រាអែល និងអំពាវនាវឱ្យសហគមន៍អន្តរជាតិ នាំខ្លួន​អ៉ីស្រាអែលមកទទួលខុសត្រូវ ​ចំពោះ​ការ​បន្ត​វាយ​ប្រហារ​ខុសច្បាប់​លើ​សារព័ត៌មាន។

អង្គការ Palestinian Journalists Syndicate ចាត់ទុកការវាយប្រហារនោះជាសង្គ្រាមបើកចំហរ ដោយមានគោលបំណងបំភ័យ និងរារាំងអ្នកកាសែតពីការបំពេញបេសកកម្មវិជ្ជាជីវៈ បង្ហាញទៅកាន់ពិភពលោក។ អង្គការ Foreign Press Association មានមូលដ្ឋានក្នុងទីក្រុងហ៊្សេរុយសាឡិម បានទាមទារមានការពន្យល់ជាបន្ទាន់ ពីសំណាក់យោធា និងការិយាល័យនាយករដ្ឋមន្ត្រីអ៉ីស្រាអែល ជុំវិញការកំណត់គោលដៅលើអ្នកកាសែត។

ប្រធានាធិបតីអាមេរិក លោក ដូណាល់ ត្រាំ គូសបញ្ជាក់ថា «ខ្ញុំមិនសប្បាយចិត្តទេ ខ្ញុំមិនចង់ឃើញឡើយ។ យើងត្រូវតែបញ្ឈប់សុបិនដ៏អាក្រក់នេះ»។ ប្រធានាធិបតីបារាំង លោក Emmanuel Macron លើកឡើងថា «ជនស៉ីវិល និងអ្នកសារព័ត៌មាន ត្រូវតែត្រូវបានការពារគ្រប់កាលៈទេសៈ ហើយប្រព័ន្ធផ្សព្វផ្សាយត្រូវតែអាចអនុវត្តបេសកកម្ម បានដោយសេរី និងឯករាជ្យ»។

ក្រសួងការបរទេសកាតា បានចេញសេចក្តីថ្លែងការណ៍ ដោយទាមទារឱ្យមានសកម្មភាពអន្តរជាតិជាបន្ទាន់ ដើម្បីផ្តល់ការការពារជនស៉ីវិល និងធានាថាអ្នកប្រព្រឹត្តិអំពើឃោរឃៅមិនរួចផុតពីការផ្តន្ទាទោស។ ស្ថាប័នអង្គការសហប្រជាជាតិ បានថ្កោលទោសយ៉ាងខ្លាំង ចំពោះការសម្លាប់ជនជាតិប៉ាឡេស្ទីនដោយអ៉ីស្រាអែល តាមរូបភាពនៃការវាយប្រហារ ភាពអត់ឃ្លានរហូតធ្លាក់ខ្លួនឈឺស្លាប់ និងផលប៉ះពាល់ដ៏អាក្រក់ចំពោះកុមារ និងស្រ្តី៕