ប្រជាជនម៉ាឡេស៊ី ត្រូវបានណែនាំឱ្យពន្យារពេលគម្រោងទៅលេងប្រទេសថៃនាពេលខាងមុខ ប្រសិនបើមិនមានការចាំបាច់អ្វីមួយ បន្ទាប់ពីការវាយប្រហារដោយគ្រាប់បែកនៅស្រុកតាកបៃ ខេត្តណារ៉ាធីវ៉ាត់ កាន់តែសាហាវ
គូឡាឡាំពួរ៖ ប្រធានគណៈកម្មាធិការរដ្ឋទទួលបន្ទុកទេសចរណ៍ វប្បធម៌ សិល្បៈ និងបេតិកភណ្ឌ លោក កាម៉ារូឌីន អ៊ឹមឌី ន័រ (Kamaruddin Md Nor) បញ្ជាក់ថាប្រជាជនម៉ាឡេស៊ី ត្រូវបានណែនាំឱ្យពន្យារពេលគម្រោងទៅលេងប្រទេសថៃនាពេលខាងមុខ ប្រសិនបើមិនមានការចាំបាច់អ្វីមួយ បន្ទាប់ពីការវាយប្រហារដោយគ្រាប់បែកនៅស្រុក តាក បៃ (ตากใบ) ខេត្តណារ៉ាធីវ៉ាត់ កាន់តែសាហាវកាលពីថ្ងៃទី២០សីហា។
លោក កាម៉ារូឌីន អ៊ឹមឌី ន័រ (Kamaruddin Md Nor) បញ្ជាក់ថា៖«សុវត្ថិភាពត្រូវតែជាអាទិភាពសម្រាប់អ្នកដែលត្រូវធ្វើដំណើរទៅកាន់ប្រទេសជិតខាង។ ហេតុការណ៍ បំផ្ទុះ គ្រាប់បែក នៅ ប្រទេស ថៃ មិនមែន ជា រឿង ថ្មី ទេ ។ ដូច្នេះ ពេលដែលស្ថានភាពនៅតែប្រែប្រួល វាជាការល្អបំផុតសម្រាប់ប្រជាជនម៉ាឡេស៊ីពន្យារពេលផែនការធ្វើដំណើរទៅកាន់ប្រទេសថៃ ជាពិសេស ជាមួយនឹងរដូវកាលវិស្សមកាលខាងមុខ»។
លោកបន្តថា វិធានការបង្ការនេះ គឺមានសារសំខាន់ដើម្បីជៀសវាងឧប្បត្តិហេតុដែលអាចគំរាមកំហែងដល់សុវត្ថិភាពផ្ទាល់ខ្លួន។
កាលពីថ្ងៃទី២០សីហា ក្រុមបំបែករដ្ឋភាគខាងត្បូងប្រទេសថៃ បានដាក់បំផ្ទុះគ្រាប់បែកក្នុងរថយន្តនៅមូលដ្ឋានសន្តិសុខក្នុងស្រុកមួយ នៃខេត្តណារ៉ាធីវ៉ាត់ ភាគខាងត្បូងប្រទេសថៃ បណ្ដាលឱ្យមន្ត្រីស្ម័គ្រចិត្តបីនាក់រងរបួស។ ហេតុការណ៍ វាយប្រហារ នេះ កើតឡើង កាលពី វេលា ម៉ោង ៨ :១៥ នាទី យប់ នៅ មូលដ្ឋាន អង្គភាព ការពារ សង្កាត់សាលាម៉ៃ មាន ទីតាំង នៅ ជាប់ ស្ថានីយ ប្រេងឥន្ធនៈ ផ្កាយមួយ ក្នុង សង្កាត់គោកម៉ាភឿង ស្រុកតាកបៃ។ ក្រុមជនល្មើស បានដាក់គ្រាប់បែកក្នុងរថយន្ត Toyota Yaris ហើយដាក់ឱ្យវាបើកចូលក្នុងកន្លែងកើតហេតុតែម្ដង៕
