វិនិយោគិនជប៉ុន បង្ហាញបំណងស្វែងយល់ពីកាលានុវត្តភាពវិនិយោគលើវិស័យកម្មន្តសាលខ្សែភ្លើង, វិស័យស្ថាបត្យកម្ម និងសំណង់នៅកម្ពុជា

ភ្នំពេញ៖ នាយកប្រតិបត្តិវិទ្យាស្ថានបារីកា និងជាប្រធានគណៈប្រតិភូវិនិយោគិនជប៉ុន លោក យ៉ាជីម៉ា នូប៉ូម៉ាសា បានបង្ហាញបំណងស្វែងយល់ពីកាលានុវត្តភាពវិនិយោគលើវិស័យកម្មន្តសាលខ្សែភ្លើង (Electric wires & cable), វិស័យស្ថាបត្យកម្ម និងសំណង់។

ការបង្ហាញចំណាប់អារម្មណ៍បែបនេះ ក្នុងឱកាសគណៈប្រតិភូវិនិយោគិនជប៉ុន ជួបពិភាក្សាការងារជាមួយ ឯកឧត្ដម នុត អ៊ុនវ័ណរ៉ា អគ្គលេខាធិការរងគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា កាលពីថ្ងៃទី១៩សីហា ឆ្នាំ២០២៥។

គណៈប្រតិភូ បានបង្ហាញចំណាប់អារម្មណ៍យ៉ាងខ្លាំងពីសក្តានុពលវិនិយោគក្នុងប្រទេសកម្ពុជា ពិសេសការអភិវឌ្ឍរីកចម្រើនជាបន្តបន្ទាប់លើគ្រប់វិស័យ ហើយបាននិងកំពុងសិក្សាស្វែងយល់ និងប្រមូលព័ត៌មានបន្ថែមទាក់ទងនឹងការវិនិយោគក្នុងវិស័យរបស់ខ្លួន។

ជាមួយគ្នា ប្រធានគណៈប្រតិភូ បានគូសបញ្ជាក់ពីការវិនិយោគរបស់ក្រុមហ៊ុនជប៉ុន ក៏នឹងនាំយកបច្ចេកទេស និងបទពិសោធ ព្រមទាំងចែករំលែកចំណេះដឹង និងការបណ្ដុះបណ្ដាលជំនាញដល់កម្លាំងពលកម្មកម្ពុជាផងដែរ។

ទន្ទឹមនឹងនេះ ឯកឧត្ដមអគ្គលេខាធិការរង ក៏បានឧទ្ទសនាមដោយសង្ខេបអំពីតួនាទីរបស់ស្ថាប័នក្រុមប្រឹក្សាអភិវឌ្ឍន៍កម្ពុជា, បរិយាកាសវិនិយោគ, ការលើកទឹកចិត្តទាំងផ្នែកសារពើពន្ធ និងមិនមែនសារពើពន្ធ, ការធានាវិនិយោគក្រោមក្របខណ្ឌច្បាប់វិនិយោគ, កត្តាអំណោយផលនៃសុខសន្តិភាព, ស្ថិរភាពម៉ាក្រូសេដ្ឋកិច្ច, វិស័យអាទិភាព និងភាពលេចធ្លោនៃហេដ្ឋារចនាសម្ព័ន្ធរូបវន្តរបស់កម្ពុជា ដែលកំពុងរីកដុះដាលជាបន្តបន្ទាប់។

សូមជម្រាបថា ក្នុងរយៈពេល៧ខែ ឆ្នាំ២០២៥ កម្ពុជាទទួលបានគម្រោងវិនិយោគរហូតដល់ទៅ៤៤០គម្រោង ក្រោមទំហំទុនវិនិយោគប្រមាណ៦,៧ពាន់លានដុល្លារអាម៉េរិក និងអាចបង្កើតការងារបានប្រមាណ៣១២ពាន់កន្លែង។ ចំនួនគម្រោងដែលបានអនុម័តនេះ ជាតួលេខច្រើនជាងរយៈពេល១២ខែពេញ នៃឆ្នាំ២០២៤ ហើយក៏ជាតួលេខខ្ពស់ជាងគេបំផុតក្នុងកំណត់ត្រារបស់ក្រុមប្រឹក្សាអភិវឌ្ឍន៍កម្ពុជា៕