រដ្ឋបាលខេត្តកំពង់ចាម ប្រារព្ធទិវាបរិស្ថានជាតិ និងបរិស្ថានពិភពលោក ៥ មិថុនា ក្រោមប្រធានបទ «ប្រយុទ្ធប្រឆាំងការបំពុលដោយប្លាស្ទិក»
ភ្នំពេញ៖ នាថ្ងៃទី៥ ខែមិថុនា ឆ្នាំ២០២៥ លោក គន់ សុភា អភិបាលរងខេត្ត តំណាងឯកឧត្ដម អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានអញ្ជើញចូលរួមទិវាបរិស្ថានជាតិ និងបរិស្ថានពិភពលោក ៥ មិថុនា ឆ្នាំ២០២៥ ក្រោមប្រធានបទ «ប្រយុទ្ធប្រឆាំងការបំពុលដោយប្លាស្ទិក» ។ ពិធីនេះដែរបានធ្វើនៅនៅបរិវេណសួនច្បារមាត់ទន្លេក្រុងកំពង់ចាម ដោយមានចូលរួមពី កងកម្លាំងទាំងបី មន្ទីរ-អង្គភាព ជុំវិញខេត្ត អាជ្ញាធរក្រុង អង្គការពាក់ព័ន្ធ លោកគ្រូ អ្នកគ្រូ និងសិស្សានុសិស្ស ជាច្រើននាក់ផងដែរ។
លោក គន់ សុភា អភិបាលរងខេត្តបាន ថ្លែងថា ចាប់តាំងពីការបង្កើតប្លាស្ទិកមក សំណល់ប្លាស្ទិកយ៉ាងហោច ៨ពាន់លានតោនបាន និងកំពុងបន្សល់ ទុកនៅលើភពផែនដី ខណៈពិភពលោកបាននិងកំពុងប្រើប្រាស់ផលិតផលពីប្លាស្ទិកមានប្រមាណជាង ៤០០ ទៅ ៦០០លានតោនក្នុងមួយឆ្នាំៗ។ ដោយឡែកនៅកម្ពុជា ក្នុងសំណល់ ១០០%ដែលបង្កើតឡើង យ៉ាង ហោចក៏មានសំណល់ប្លាស្ទិកប្រមាណ ២០%ដែរ។
លោកបានបន្តថា ការបំពុលដោយប្លាស្ទិក គឺជាបញ្ហាប្រឈមបរិស្ថានសកលដ៏ធ្ងន់ធ្ងរ និងរីកលូតលាស់យ៉ាងឆាប់រហ័ស ដែលការផលិតប្លាស្ទិកបានកើនឡើងយ៉ាងខ្លាំងក្នុងរយៈពេលប៉ុន្មានទសវត្សរ៍ថ្មីៗនេះ ដោយសារតែតម្លៃថោក ភាពធន់ និងភាពបត់បែនក្នុងការប្រើប្រាស់។
ក្នុងនោះដែរលោក គន់ សុភា បានបញ្ជាក់ថា រដ្ឋបាលខេត្តកំពង់ចាម ដែលមានមន្ទីរបរិស្ថានខេត្តកំពង់ចាម បានបំពេញ ការងារយ៉ាងសកម្ម សំដៅលើកកម្ពស់ភាពស្អាត ដោយបានចូលរួមដាក់ចេញនូវយុទ្ធនាការសម្អាតបរិស្ថានជាច្រើន ដើម្បីទាក់ទាញអ្នកវិនិយោគ និងអ្នកទេសចរណ៍ មកកាន់ខេត្តរបស់យើង កាន់តែច្រើនឡើង ជាពិសេសការរស់នៅប្រកបដោយផាសុកភាព និងភាពស៊ីវិល័យ។
បើតាមលោក នួន គង់សល្យ ប្រធានមន្ទីរបរិស្ថានខេត្តកំពង់ចាម បានបញ្ជាក់ថា ទិវាបរិស្ថានជាតិ បរិស្ថានពិភពលោកប្រារព្ធឡើងនាថ្ងៃនេះ រៀបចំឡើងក្នុងគោល បំណងសំខាន់ ដូចជា៖ ១.លើកកម្ពស់ការយល់ដឹងសាធារណៈ, ២.ជំរុញការចូលរួមយ៉ាងទូលំទូលាយ, ៣.បង្ហាញការប្តេជ្ញាចិត្តថ្នាក់ជាតិ, ៤.កៀរគរធនធាន និងភាពជាដៃគូ, ៥.ជំរុញការផ្លាស់ប្តូរឥរិយាបថ និងទម្លាប់ ប្រចាំថ្ងៃរបស់ប្រជាពលរដ្ឋ៕
