ហាណូយ៖ នាយករដ្ឋមន្ត្រីវៀតណាម លោក ផាម មិញជីញ (ភាសាវៀតណាម៖ Phạm Minh Chính) នៅក្នុងសេចក្តីណែនាំដែលចេញកាលពីល្ងាចថ្ងៃអង្គារទី២២ ខែមេសាបានបញ្ជាក់ថា វៀតណាមកំពុងខ្នះខ្នែងពន្លឿនការចរចារបស់ខ្លួនសម្រាប់កិច្ចព្រមព្រៀងពាណិជ្ជកម្មសេរីថ្មី ក្រោយកិច្ចព្រមព្រៀងជាង១៧ ត្រូវបានចុះហត្ថលេខារួចហើយ ខណៈប្រទេសមានសេដ្ឋកិច្ចពឹងផ្អែកលើការនាំចេញនេះ កំពុងត្រៀមជើងព្រួលទប់ទល់នឹងគំនាបពន្ធគយរបស់មហាអំណាចសហរដ្ឋអាម៉េរិក។
នាយករដ្ឋមន្ត្រីវៀតណាម បានជំរុញឱ្យក្រសួងពាណិជ្ជកម្មបញ្ចប់ ឬចាប់ផ្តើមកិច្ចចរចាកិច្ចព្រមព្រៀងពាណិជ្ជកម្មសេរីជាមួយប្រទេសឥណ្ឌា ប្រេស៊ីល ប៉ាគីស្ថាន អេហ្ស៊ីប និងទីផ្សារផ្សេងទៀតនៅមជ្ឈិមបូព៌ា អាហ្វ្រិក អាម៉េរិកឡាទីន អាស៊ីកណ្តាល និងអឺរ៉ុបខាងកើត។
មជ្ឈមណ្ឌលឧស្សាហកម្មអាស៊ីអាគ្នេយ៍មួយនេះ ប្រឈមនឹងគំនាបពន្ធបដិការ៤៦ភាគរយ បច្ចុប្បន្នត្រូវបានផ្អាករហូតដល់ខែកក្កដា។ ប្រសិនបើការយកពន្ធដ៏ច្រើនសន្ធឹកនេះកើតឡើងពិតមែន វាអាចបំផ្លាញកំណើនសេដ្ឋកិច្ចរបស់វៀតណាមដែលពឹងផ្អែកលើការនាំចេញទៅកាន់សហរដ្ឋអាម៉េរិក ជាទីផ្សារកំពូលរបស់ខ្លួន និងការវិនិយោគធំដោយក្រុមហ៊ុនផលិតបរទេស។
ថ្មីៗនេះ ប្រទេសសង្គមនិយមមួយនេះ បានណែនាំដល់មន្ត្រីដើម្បីប្រយុទ្ធប្រឆាំងនឹងការក្លែងបន្លំពាណិជ្ជកម្ម និងបញ្ហាផ្សេងទៀត ជាការព្រួយបារម្ភសម្រាប់សហរដ្ឋអាម៉េរិក ខណៈដែលប្រទេសនេះបានត្រៀមខ្លួនរួចជាស្រេច ដើម្បីចាប់ផ្តើមកិច្ចពិភាក្សាជាមួយមហាអំណាចសេដ្ឋកិច្ចទី១ លើសាកលលោកស្តីពីពន្ធគយ។
សូមជម្រាបជូនថា វៀតណាមបានចុះហត្ថលេខាលើកិច្ចព្រមព្រៀងពាណិជ្ជកម្មសេរីទ្វេភាគី ឬពហុភាគីចំនួន១៧ រួមទាំងកិច្ចព្រមព្រៀងគ្រប់ជ្រុងជ្រោយ និងជឿនលឿនសម្រាប់ភាពជាដៃគូអន្តរប៉ាស៊ីហ្វិក និងកិច្ចព្រមព្រៀងភាពជាដៃគូសេដ្ឋកិច្ចទូលំទូលាយក្នុងតំបន់ កិច្ចព្រមព្រៀងជាមួយសហភាពអឺរ៉ុប ជប៉ុន និងកូរ៉េខាងត្បូង។ ប៉ុន្តែ មិនមានកិច្ចព្រមព្រៀងពាណិជ្ជកម្មសេរីជាមួយសហរដ្ឋអាម៉េរិកទេ។
នៅក្នុងសារាចរណែនាំដែលត្រូវបានចេញទៅកាន់ទីភ្នាក់ងាររដ្ឋាភិបាល និងអាជ្ញាធរក្រុង និងខេត្ត លោក ជីញ បានរំលឹកម្ដងទៀតថា វៀតណាមនឹងប្រកាន់ខ្ជាប់នូវគោលដៅកំណើនផលិតផលក្នុងស្រុកសរុបរបស់ខ្លួនយ៉ាងហោចណាស់៨ភាគរយសម្រាប់ឆ្នាំនេះ តាមរយៈការចាត់វិធានការផ្សេងៗជាច្រើន បើទោះបីជាពន្ធគយកំពុងកើនឡើងក៏ដោយ។
សេចក្តីណែនាំបានបញ្ជាក់ថា៖«ចាប់តាំងពីដើមឆ្នាំ២០២៥ មក ស្ថានភាពពិភពលោកបានឃើញការវិវឌ្ឍថ្មី ស្មុគស្មាញ និងមិនអាចទាយទុកជាមុនបាន ដោយមានការប្រកួតប្រជែងជាយុទ្ធសាស្ត្រកាន់តែខ្លាំង ក្នុងចំណោមប្រទេសធំៗ សង្រ្គាមពាណិជ្ជកម្មរីករាលដាល និងការធ្លាក់ចុះនៃចក្ខុវិស័យសេដ្ឋកិច្ចពិភពលោក បង្កការលំបាក និងបញ្ហាប្រឈមជាច្រើន»។
មិនត្រឹមតែប៉ុណ្ណោះ លោកនាយករដ្ឋមន្ត្រី ក៏បានជំរុញឱ្យធនាគារកណ្តាលធានាឱ្យមានមូលនិធិគ្រប់គ្រាន់សម្រាប់កំណើនសេដ្ឋកិច្ច ខណៈដែលរក្សាសុវត្ថិភាពសម្រាប់ទីផ្សារប្តូរប្រាក់បរទេស និងទីផ្សារមាស និងសម្រាប់ប្រព័ន្ធធនាគារ។
លោកបានប្រាប់ធនាគារកណ្តាលឱ្យជំរុញការផ្ដល់ប្រាក់កម្ចីដល់មនុស្សមានអាយុក្រោម៣៥ឆ្នាំ ដើម្បីទិញផ្ទះ និងផ្តល់ប្រាក់កម្ចីដល់ក្រុមហ៊ុនដែលរងផលប៉ះពាល់ដោយពន្ធរបស់សហរដ្ឋអាម៉េរិក។ វិធានការផ្សេងទៀតរួមមាន ការបង្កើនការអភិវឌ្ឍហេដ្ឋារចនាសម្ព័ន្ធ ជំរុញការប្រើប្រាស់ក្នុងស្រុក និងការជំរុញការវិនិយោគក្នុងការផ្លាស់ប្ដូរឌីជីថល និងបច្ចេកវិទ្យា។
លោក ជីញ បានប្រាប់ក្រសួងពាណិជ្ជកម្មឱ្យលើកទឹកចិត្តវេទិកាពាណិជ្ជកម្មអេឡិចត្រូនិកឱ្យអនុវត្តគោលនយោបាយអនុគ្រោះ ដើម្បីលើកកម្ពស់ការប្រើប្រាស់ទំនិញផលិតក្នុងស្រុក និងជួយសម្រួលដល់ការដឹកជញ្ជូនទំនិញទៅកាន់តំបន់ដាច់ស្រយាល៕
