វិទ្យុអាស៊ីសេរី ប្រកាសបញ្ឈប់បុគ្គលិករាប់រយនាក់ ចាប់ពីចុងសប្តាហ៍នេះតទៅ បន្ទាប់ពីរដ្ឋបាលលោក ត្រាំ ឈប់ផ្ដល់មូលនិធិគាំទ្រ

វ៉ាស៊ីនតោន៖ វិទ្យុអាស៊ីសេរី ដែលផ្តល់មូលនិធិដោយរដ្ឋាភិបាលសហរដ្ឋអាម៉េរិក បានប្រាប់បុគ្គលិករាប់រយនាក់នៅសហរដ្ឋអាម៉េរិក កាលពីថ្ងៃពុធទី១៩មីនាថា ពួកគេនឹងត្រូវបានបញ្ឈប់សម្រាកដោយគ្មានប្រាក់ឈ្នួល ចាប់ពីចុងសប្តាហ៍នេះតទៅ បន្ទាប់ពីរដ្ឋបាលត្រាំ បញ្ឈប់ការផ្ដល់មូលនិធិគាំទ្រ។

អ្នកនាំពាក្យវិទ្យុអាស៊ីសេរី លោក រ៉ូហ៊ីត ម៉ាហាចាន់ បានប្រាប់រ៉យទ័រថា ចំណាត់ការរបស់ត្រាំគឺ «ខុសខ្បាប់» ខណៈអង្គភាពនេះកំពុងត្រៀមចាត់ការតាមផ្លូវច្បាប់។ លើសពីនេះ លោក ម៉ាហាចាន់ បានលើកឡើងថា ការលុបចោលមូនិធិជំនួយសហព័ន្ធនេះ គឺប៉ះពាល់ដល់បុគ្គលិកវិទ្យុអាស៊ីសេរីពេញម៉ោង ដែលមានមូលដ្ឋាននៅសហរដ្ឋអាម៉េរិកជាចម្បង ហើយបានកាត់បន្ថយចំនួនបុគ្គលលិកពី ៣០០នាក់ មកនៅត្រឹមប្រហែល ៧៥នាក់។

លោកក៏បានសង្កត់ធ្ងន់ថា៖ «យើងមានថវិកាតិចតួចណាស់ដែលនៅសេសសល់ ដើម្បីបើកប្រាក់បៀវត្សរ៍ដល់បុគ្គលិករបស់យើង។ យើងកំពុងព្យាយាមរក្សាវិទ្យុអាស៊ីសេរីឱ្យនៅដដែល ខណៈដែលយើងកំពុងបន្តការប្រឈមផ្លូវច្បាប់ជុំវិញការបញ្ចប់ការផ្ដល់ជំនួយនេះ ដែលយើងជឿថា[រដ្ឋបាលត្រាំ]ធ្វើនេះ គឺខុសច្បាប់»។

គួរជម្រាបថា ថ្មីនេះ រដ្ឋបាលលោក ត្រាំ បានប្រកាសថា ខ្លួនកំពុងបញ្ចប់ការផ្ដល់ជំនួយសហព័ន្ធលើប្រតិបត្តិការរបស់វិទ្យុអាស៊ីសេរី(RFA) និងវិទ្យុអឺរ៉ុបសេរី (Radio Free Europe/Radio Liberty) ទន្ទឹមនឹងបុគ្គលិកសំឡេងអាម៉េរិក (Voice of America ឬ VOA) ជាង១៣០០នាក់ត្រូវបានបញ្ឈប់ពីការងារ។ ជាចុងក្រោយ សមាជិកសភា និងអ្នកតស៊ូមតិសិទ្ធិរបស់សហរដ្ឋអាម៉េរិក អះអាងថា ការកាត់បន្ថយការផ្ដល់មូលនិធិគាំទ្រនេះ គឺកំពុងបន្ថយឥទ្ធិពលអំណាចទន់របស់រដ្ឋធានីវ៉ាស៊ីនតោននៅទូទាំងពិភពលោក ខណៈមហាយក្សចិនកំពុងពង្រីកឥទ្ធិពលរបស់ខ្លួននៅទូទាំងតំបន់។