នាយករដ្ឋមន្ត្រី ហ៊ុន ម៉ាណែត អំពាវនាវឲ្យពលរដ្ឋខ្មែរត្រូវចេះគោរពគ្នា ក៉ំយកបណ្តាញសង្គមមកធ្វើឲ្យរឿងតូច ទៅជារឿងធំ
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអំពាវនាវឲ្យយុវជនខ្មែរ ប្រជាពលរដ្ឋត្រូវចេះគោរពគ្នា បើចង់ល្បីក៉ំនិពន្ធទំនុងច្រៀងប្រើពាក្យមិនល្អ ឌឺដងដាក់គ្នា។
ក្នុងឱកាសអញ្ជើញជាអធិបតី ក្នុងទិវាវប្បធម៌ជាតិ ៣មីនា លើកទី២៧ ឆ្នាំ២០២៥ និងសំណេះសំណាល ជាមួយសិល្បករសិល្បការិនី ទូទាំងប្រទេស លើកទី៦ នារសៀលថ្ងៃទី៥ ខែមីនា ឆ្នាំ២០២៥ នៅមជ្ឈមណ្ឌលសន្និបាត និងពិព័រណ៍កោះពេជ្រ សម្តេចបវរធិបតី ហ៊ុន ម៉ាណែត បានបញ្ជាក់ថា ការប្រើពាក្យសំដីល្អ ក៏ល្បីដែរ មិនមែនទាល់តែប្រើសំដីមិនល្អនោះទេ។
សម្តេចបវរធិបតី បានថ្លែងថា ក្នុងសម័យបច្ចេកវិទ្យានេះទៀត គឺកាន់តែត្រូវចេះយោគយល់គ្នា។ សម្តេចក៏បានអំពាវនាវឲ្យអ្នកប្រើប្រាស់បណ្តាញសង្គម សូមក៉ំយកបណ្តាញសង្គមមកធ្វើជាបញ្ហាកាន់តែធំ។ ជាក់ស្តែងករណីខ្លះកើតឡើងតូចតាចទេ តែពេលបង្ហោះក្នុងបណ្តាញសង្គម មានអ្នកតាមដានមើលច្រើន អ្នកមើលក៏បានបញ្ចេញទស្សនៈ និងអារម្មណ៍វែកញែករឿងទាំងនោះកាន់តែធំ។
ជាមួយគ្នានេះ សម្តេចធិបតី នាយករដ្ឋមន្ត្រី បានអំពាវនាវឲ្យអ្នកប្រើប្រាស់សង្គមយកការនិយាយគ្នា យោគយល់គ្នាឲ្យបានច្រើន ជាដំណោះស្រាយ។
សម្តេចធិបតី ក៏បានគូសបញ្ជាក់ថា ការយោគយល់គ្នា ការគោរពគ្នា ក៏ជាការចូលរួមរក្សា និងអភិរក្សវប្បធម៌ប្រពៃណីរបស់ខ្មែរយើងផងដែរ ៕
