សេអ៊ូល៖ ទីភ្នាក់ងារព័ត៌មានមជ្ឈិមកូរ៉េ (KCNA) បានរាយការណ៍ នៅថ្ងៃសុក្រ ទី២៨ ខែកុម្ភៈនេះថា កងកម្លាំងប្រដាប់អាវុធនៃសាធារណរដ្ឋប្រជាធិបតេយ្យប្រជាមានិតកូរ៉េ (កូរ៉េខាងជើង) បានធ្វើសមយុទ្ធបាញ់បង្ហោះកាំជ្រួច Cruise យុទ្ធសាស្ត្រនៅក្នុងដែនទឹកនៃឆ្នេរសមុទ្រភាគខាងលិចរបស់ខ្លួនកាលពីថ្ងៃពុធ។
KCNA បានបន្តថា កងទ័ពប្រជាជនកូរ៉េ (KPA) បានបាញ់កាំជ្រួច Cruise យុទ្ធសាស្ត្រចំនួនពីរ ដែលធ្វើដំណើរបានចម្ងាយ ១,៥៨៧គីឡូម៉ែត្រ មុនពេលបាញ់ដល់គោលដៅ។
គោលបំណងនៃសមយុទ្ធបាញ់បង្ហោះគឺដើម្បីជូនដំណឹងដល់ខ្មាំងសត្រូវនៃសមត្ថភាពវាយប្រហារតបតរបស់ KPA នៅក្នុងលំហណាមួយ និងការត្រៀមខ្លួននៃមធ្យោបាយប្រតិបត្តិការនុយក្លេអ៊ែរផ្សេងៗរបស់ខ្លួន និងដើម្បីបង្ហាញពីភាពជឿជាក់នៃការទប់ស្កាត់នុយក្លេអ៊ែររបស់រដ្ឋ និងធ្វើឱ្យអង្គភាពរងកាំជ្រួច Cruise យុទ្ធសាស្ត្រមានភាពប៉ិនប្រសប់ក្នុងការបំពេញបេសកកម្មបាញ់ភ្លាមៗរបស់ពួកគេ។
លោក Kim Jong Un អគ្គលេខាបក្សពលករកូរ៉េ និងជាប្រធានកិច្ចការរដ្ឋរបស់កូរ៉េខាងជើង បានត្រួតពិនិត្យលើសមយុទ្ធបាញ់គ្រាប់ពិតនេះ ដោយបន្ថែមថា វាគឺជាសមយុទ្ធប្រកបដោយការទទួលខុសត្រូវចំពោះការរារាំងសង្គ្រាមរបស់កូរ៉េខាងជើង ដើម្បីបន្តសាកល្បងភាពជឿជាក់ និងប្រតិបត្តិការនៃធាតុផ្សំនៃការទប់ស្កាត់នុយក្លេអ៊ែររបស់ខ្លួន និងបង្ហាញពីកម្លាំងរបស់ពួកគេ។
លោក Kim បានបន្ថែមថា វាគឺជាបេសកកម្ម និងកាតព្វកិច្ចប្រកបដោយការទទួលខុសត្រូវរបស់កងកម្លាំងប្រដាប់អាវុធនុយក្លេអ៊ែររបស់កូរ៉េខាងជើង ដើម្បីការពារអចិន្ត្រៃយ៍នូវអធិបតេយ្យភាព និងសន្តិសុខជាតិ ជាមួយនឹងខែលនុយក្លេអ៊ែរដែលអាចទុកចិត្តបាន ដោយទទួលបាននូវការត្រៀមខ្លួនប្រយុទ្ធឱ្យបានហ្មត់ចត់បន្ថែមទៀតនៃកម្លាំងនុយក្លេអ៊ែរ និងការត្រៀមខ្លួនពេញលេញសម្រាប់ការប្រើប្រាស់របស់ពួកគេ។
