លោក ដូណាល់ ត្រាំ នឹងដាក់ចេញពន្ធថ្មីចំនួន២៥ ភាគរយលើការនាំចូលដែក និងអាលុយមីញ៉ូមទាំងអស់ទៅកាន់សហរដ្ឋអាម៉េរិក

វ៉ាស៊ីនតោន៖ លោក ដូណាល់ ត្រាំ ប្រធានាធិបតីអាម៉េរិក បានប្រកាសកាលពីថ្ងៃអាទិត្យទី ៩ ខែកុម្ភៈថា លោកនឹងដាក់ចេញពន្ធថ្មីចំនួន២៥ ភាគរយលើការនាំចូលដែក និងអាលុយមីញ៉ូមទាំងអស់ទៅកាន់សហរដ្ឋអាម៉េរិក។

លោក ត្រាំ បាននិយាយទៅកាន់អ្នកយកព័ត៌មាននៅលើយន្តហោះ Air Force One ដែលកំពុងធ្វើដំណើរទៅកាន់កម្មវិធី NFL Super Bowl ក្នុងទីក្រុង New Orleans ថា លោកនឹងប្រកាសពន្ធលើលោហៈថ្មីនៅថ្ងៃចន្ទទី១០ ខែកុម្ភៈ (ម៉ោងនៅសហរដ្ឋអាម៉េរិក)។ លោក ត្រាំ បានប្រើប្រាស់គំនាបពន្ធគយ ដើម្បីឱ្យប្រទេសផ្សេងទៀតធ្វើការផ្លាស់ប្ដូរគោលនយោបាយស្របតាមអាទិភាពរបស់គាត់។

យោងតាមទិន្នន័យរបស់រដ្ឋាភិបាល និងវិទ្យាស្ថានដែក និងដែកអាម៉េរិក ប្រភពធំបំផុតនៃការនាំចូលដែកថែបរបស់សហរដ្ឋអាម៉េរិកគឺប្រទេសកាណាដា ប្រេស៊ីល និងម៉ិកស៊ិក បន្ទាប់មកគឺកូរ៉េខាងត្បូង និងវៀតណាម។ តាមទំហំធំ ប្រទេសកាណាដាគឺជាអ្នកផ្គត់ផ្គង់ដ៏ធំបំផុតនៃលោហៈអាលុយមីញ៉ូមទៅកាន់សហរដ្ឋអាម៉េរិក ដែលស្មើនឹង៧៩ ភាគរយនៃការនាំចូលសរុបក្នុងរយៈពេល១១ ខែដំបូងនៃឆ្នាំ២០២៤។ ម៉ិកស៊ិកគឺជាអ្នកផ្គត់ផ្គង់ដ៏ធំនៃសំណល់អាលុយមីញ៉ូម និងអាលុយមីញ៉ូម។

លោក ហ្វ្រង់ស័រ ឡេហ្គោល ចាហ្វាយក្រុង កេបិកដែលជាប្រភពផ្គត់ផ្គង់អាលុយមីញ៉ូមដ៏ធំ បានរៀបរាប់នៅលើបណ្តាញសង្គម Xថា៖«រដ្ឋបាលលោក ត្រាំ កំពុងតែគម្រាមវាយប្រហារលើវិស័យអាលុយមីញ៉ូម និងដែកថែប ដែលជាវិស័យដែលសហរដ្ឋអាម៉េរិកពឹងផ្អែកភាគខ្លាំងលើប្រទេសដទៃ។ ទីក្រុង កេបិកនាំចេញអាលុយមីញ៉ូម២,៩ លានតោនទៅឱ្យសហរដ្ឋអាម៉េរិក ពោលគឺ៦០ ភាគរយនៃតម្រូវការរបស់ពួកគេ។ តើពួកគេព្រមទទួលការផ្គត់ផ្គង់ជំនួសពីប្រទេសចិនទេ?» លោកបន្តថា៖«ទាំងអស់នេះបង្ហាញថាយើងត្រូវតែចាប់ផ្តើមចរចាឡើងវិញនូវកិច្ចព្រមព្រៀងពាណិជ្ជកម្មសេរីជាមួយសហរដ្ឋអាម៉េរិកឱ្យបានឆាប់តាមដែលអាចធ្វើទៅបាន ដោយមិនចាំបាច់រង់ចាំការពិនិត្យឡើងវិញដែលបានគ្រោងទុកសម្រាប់ឆ្នាំ២០២៦ ឡើយ។ យើងត្រូវតែបញ្ចប់ភាពមិនប្រាកដប្រជានេះ»។

គួររំឭកថា លោក ត្រាំ ក្នុងអំឡុងពេលអាណត្តិដំបូងបានដាក់ពន្ធ២៥ ភាគរយលើដែកថែប និង១០ ភាគរយលើអាលុយមីញ៉ូម ប៉ុន្តែក្រោយមកបានផ្តល់ការលើកលែងពន្ធលើដៃគូពាណិជ្ជកម្មមួយចំនួន រួមទាំងកាណាដា ម៉ិកស៊ិក និងប្រេស៊ីល។ អតីត ប្រធានាធិបតី ចូ បៃឌិន ក្រោយមក បាន ចរចា លើ ការ រៀបចំ កូតា អត់ ពន្ធ ជាមួយ អង់គ្លេស សហភាព អឺរ៉ុប និង ជប៉ុន។ វាមិនច្បាស់ភ្លាមៗទេពីការប្រកាសរបស់លោក ត្រាំ ថាតើនឹងមានអ្វីកើតឡើងចំពោះការលើកលែង និងការរៀបចំកូតាទាំងនោះ៕