បរទេស៖ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេឡេនស្គី បាននិយាយកាលពីថ្ងៃសៅរ៍ទី២៥ ខែមករាថា សហរដ្ឋអាម៉េរិកមិនបានបញ្ឈប់ជំនួយយោធាដល់អ៊ុយក្រែននោះទេ បន្ទាប់ពីរដ្ឋមន្ត្រីការបរទេសអាម៉េរិក លោក ម៉ាកូ រូប៊ីអូ ប្រកាសផ្អាកការផ្ដល់ជំនួយបរទេសរយៈពេល៩០ថ្ងៃ។
លោក ហ្សេឡេនស្គី មិនបានបញ្ជាក់ថា តើជំនួយមនុស្សធម៌ត្រូវបានផ្អាកឬអត់នោះទ?។ អ៊ុយក្រែនពឹងផ្អែកខ្លាំងលើសហរដ្ឋអាមេរិកសម្រាប់៤០ភាគរយនៃតម្រូវការយោធារបស់ខ្លួន។ អនាគតនៃជំនួយរបស់សហរដ្ឋអាម៉េរិកដល់អ៊ុយក្រែន នៅតែមិនច្បាស់លាស់នៅពេលដែលលោកប្រធានាធិបតី ដូណាល់ ត្រាំ ចូលកាន់តំណែងជាលើកទី២។ មេដឹកនាំអាម៉េរិក បាននិយាយម្ដងហើយម្ដងទៀតថា លោកនឹងមិនអនុញ្ញាតឱ្យការឈ្លានពានរបស់រុស្ស៊ីលើអ៊ុយក្រែនចាប់ផ្តើមទេ ប្រសិនបើលោកបានកាន់តំណែងជាប្រធានាធិបតី។
លោក ហ្សេឡេនស្គី បានថ្លែងថា លោករីករាយនឹងកិច្ចប្រជុំ និងការសន្ទនាដ៏ល្អជាមួយប្រធានាធិបតី ត្រាំ ហើយជឿជាក់ថា មេដឹកនាំសហរដ្ឋអាម៉េរិកនឹងទទួលបានជោគជ័យក្នុងបំណងប្រាថ្នារបស់គាត់ក្នុងការបញ្ចប់សង្រ្គាម។ លោកជឿជាក់ថា សម្ព័ន្ធមិត្តអឺរ៉ុប ក៏គួរត្រូវបានរួមបញ្ចូលផងដែរនៅក្នុងកិច្ចចរចាសន្តិភាពនាពេលអនាគតណាមួយ។
គួររំឭកថា កាលពីថ្ងៃព្រហស្បតិ៍ លោក ត្រាំ បានប្រាប់ទូរទស្សន៍ Fox News ថា លោក ហ្សេឡេនស្គី គួរតែធ្វើកិច្ចព្រមព្រៀងជាមួយមេដឹកនាំរុស្ស៊ី ដើម្បីបញ្ចប់ជម្លោះ។ លោក ត្រាំ ក៏បានគំរាមដាក់ពន្ធតឹងរ៉ឹង និងទណ្ឌកម្មលើរុស្ស៊ី ប្រសិនបើកិច្ចព្រមព្រៀងមិនត្រូវបានសម្រេចដើម្បីបញ្ចប់ការប្រយុទ្ធគ្នានៅអ៊ុយក្រែន។
