ប្រធានាធិបតី ដូណាល់ ត្រាំ ប្តេជ្ញាថា នឹងធ្វើឱ្យព្រែកជីកប៉ាណាម៉ា មកឋិតក្រោមការគ្រប់គ្រងរបស់អាមេរិកវិញ

វ៉ាស៉ីនតោន៖ ប្រធានាធិបតីអាមេរិក លោក ដូណាល់ ត្រាំ កាលពីថ្ងៃចន្ទសប្តាហ៍នេះ បានតាំងខ្លួនជាអ្នកបង្កើតសន្តិភាព នៅពេលស្បថចូលកាន់តំណែងអាណត្តិទីពីរ ប៉ុន្តែភ្លាមៗនោះដែរលោកបានប្តេជ្ញាថា នឹងធ្វើឱ្យព្រែកជីកប៉ាណាម៉ា មកឋិតក្រោមការគ្រប់គ្រងរបស់សហរដ្ឋអាមេវិញ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន AFP នៅថ្ងៃអង្គារ ទី២១ ខែមករា ឆ្នាំ ២០២៥។

ព្រែកជីកប៉ាណាម៉ា ជាផ្លូវទឹកដែលសហរដ្ឋអាមេរិក បានប្រគល់ទៅឱ្យប្រទេសប៉ាណាម៉ា នៅចុងឆ្នាំ ១៩៩៩។ ប៉ាណាម៉ា ជាអ្នកគ្រប់គ្រងព្រែកជីកនេះ ប៉ុន្តែក្រុមហ៊ុនចិនបាននិងកំពុងបង្កើនវត្តមានរបស់ខ្លួន តាមរយៈវិធីសាស្រ្តដឹកជញ្ជូន រវាងច្រកនៃមហាសមុទ្រអាត្លង់ទិក និងប៉ាស៉ីហ្វិក។

លោក ត្រាំ បានគូសបញ្ជាក់ពេលស្បថចូលកាន់តំណែងថា «សំខាន់ជាងនេះទៅទៀត ចិនកំពុងធ្វើប្រតិបត្តិការ តាមព្រែកជីកប៉ាណាម៉ា ហើយយើងមិនបានប្រគល់វាឱ្យចិនទេ យើងប្រគល់វាឱ្យប៉ាណាម៉ា ហើយយើងនឹងយកវាមកវិញ»។

គួរបញ្ជាក់ថា ព្រែកជីកប៉ាណាម៉ា ត្រូវបានសាងសង់ដោយសហរដ្ឋអាមេរិកភាគច្រើន ជាមួយនិងកម្លាំងពលកម្ម មកពីតំបន់ការីបៀនដើមកំណើតអាហ្រ្វិក (Afro-Caribbean) ហើយបានបើកដំណើរការ នៅឆ្នាំ ១៩១៤។ អតីតប្រធានាធិបតីអាមេរិក លោក Jimmy Carter ដែលទទួលមរណភាពកាលពីខែមុន ក៏ធ្លាប់ចរចាបំណងយកព្រែកជីកនេះ មកត្រឡប់វិញដែរនៅឆ្នាំ ១៩៧៧៕