ឯកឧត្តមទេសរដ្ឋមន្ត្រី សក់ សេដ្ឋា អញ្ជើញចូលរួមកិច្ចប្រជុំអនុគណៈកម្មាធិការមុខងារនិងធនធាននៃ គ.ជ.អ.ប.
ភ្នំពេញ៖ នៅទីស្តីការក្រសួងមហាផ្ទៃ នាថ្ងៃចន្ទ ៧រោច ខែបុស្ស ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី២០ ខែមករា ឆ្នាំ២០២៥ ឯកឧត្តម សក់ សេដ្ឋា ទេសរដ្ឋមន្ត្រីទទួលបន្ទុកបេសកម្មពិសេស និង ជាអនុប្រធានអចិន្ត្រៃយ៍ នៃគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យថ្នាក់ក្រោមជាតិ (គ.ជ.អ.ប.) បានអញ្ជើញចូលរួមកិច្ចប្រជុំអនុគណៈកម្មាធិការមុខងារនិងធនធាននៃ គ.ជ.អ.ប. និងបានធ្វើសេចក្តីរាយការណ៍សង្ខេបអំពីដំណើរការរៀបចំវេទិកា និងបញ្ជីបញ្ហាប្រឈម នៃអនុគណៈកម្មាធិការមុខងារនិងធនធាន នៃ គ.ជ.អ.ប. ក្រោមអធិបតីយភាពដ៏ខ្ពង់ខ្ពស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានអនុគណៈកម្មាធិការមុខងារនិងធនធាន និងជាប្រធានគណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យថ្នាក់ក្រោមជាតិ (គ.ជ.អ.ប.) ។
កិច្ចប្រជុំនេះបានពិនិត្យ និងពិភាក្សាលើបញ្ហាប្រឈមតាមរបៀបវារៈនីមួយៗ និងការកំណត់វិធានការណ៍ដោះស្រាយបញ្ហាប្រឈម ព្រមទាំងការកំណត់បាននូវសំណើ និងសំណូមពរផ្សេងៗបន្ថែមទៀតសម្រាប់កិច្ចដំណើរការរបស់អនុគណៈកម្មាធិការមុខងារនិងធនធាននៃ គ.ជ.អ.ប.។
កិច្ចប្រជុំក៏មានការអញ្ជើញចូលរួមពីសមាជិកអនុគណៈកម្មាធិការមុខងារ និងធនធាន តំណាងក្រសួង ស្ថាប័ន ថ្នាក់ដឹកនាំ មន្ត្រីបច្ចេកទេស នៃលេខាធិការដ្ឋាន គ.ជ.អ.ប. និងអ្នកពាក់ព័ន្ធសរុបចំនួន ៩៨រូប និងស្រី ៩រូប ៕
