អាជ្ញាធរ ទន្លេសាប បង្ហាញពីបញ្ហាប្រឈម ៧ចំណុច និងទិសដៅការងារអនុវត្តបន្ត ឆ្នាំ២០២៥ ចំនួន៦ចំណុច
ភ្នំពេញ៖ នាថ្ងៃទី៩ ខែមករា ឆ្នាំ២០២៥ ដោយមានការអនុញ្ញាតដ៏ខ្ពង់ខ្ពស់ពី ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល ឯកឧត្តមវេជ្ជបណ្ឌិត សាន់ សាប់អី រដ្ឋលេខាធិការក្រសួងសុខាភិបាល និងជាសមាជិកអាជ្ញាធរទន្លេសាប បានអញ្ជើញចូលរួមក្នុងកិច្ចប្រជុំផ្សព្វផ្សាយពីលទ្ធផលការងាររបស់អាជ្ញាធរ ទន្លេសាប និងទិសដៅអនុវត្តបន្ត ឆ្នាំ២០២៥ ក្រោមអធិបតីភាពរបស់ ឯកឧត្តម ថោ ជេដ្ឋា រដ្ឋមន្រ្តីក្រសួងធនធានទឹក និងឧត្តុនិយម និងជាប្រធានអាជ្ញាធរទន្លេសាប នៅសាលប្រជុំរំដួល នៃទីស្តីការក្រសួងធនធានទឹក និងឧត្តុនិយម។
ក្នុងកិច្ចប្រជុំផ្សព្វផ្សាយនោះដែរ មានរបាយការណ៍វឌ្ឍនភាពការងារមួយចំនួនដូចជា៖
-ការងាររដ្ឋបាល និងធនធានមនុស្ស
-កិច្ចសហប្រតិបត្តិការ ជាមួយក្រសួង ស្ថាប័នថ្នាក់ជាតិ និងថ្នាក់ក្រោមជាតិ ជាមួយដៃគូអភិវឌ្ឍន៍ និងអ្នកស្រាវជ្រាវនានា
-ការងារសិក្សា ស្រាវជ្រាវ និងផ្សព្វផ្សាយ រួមមាន៖ ផ្នែកធនធានធម្មជាតិ និងជីវចម្រុះ ផ្នែកអាជីវកម្ម និង អភិរក្ស ផ្នែកគុណភាពទឹក រាល់គម្រោងបាននឹងកំពុងអនុវត្តនៅក្នុងតំបន់បឹងទន្លេ និងការផ្សព្វផ្សាយ ដោយមានការសងការជាមួយក្រសួង ស្ថាប័នថ្នាក់ជាតិ និងថ្នាក់ក្រោមជាតិ តាមរយៈសារព័ត៌មាន និងបណ្តាញសង្គម។
ទន្ទឹមនឹងវឌ្ឍនភាពការងារ អាជ្ញាធរទន្លេសាប ក៏មានបញ្ហាប្រឈមដូចជា៖
-សមត្ថភាព និងការយល់ដឹងមន្ត្រីលើកិច្ចការបច្ចេកទេស នៅមានកម្រិតក្នុងការអនុវត្តការងារជាក់ស្តែង
-មន្ត្រីបម្រើការងារតាមនាយកដ្ឋាន និងការិយាល័យមួយចំនួនមានចំនួនតិច និងមិនទាន់សមស្របតាមជំនាញ
-នីតិវិធីនៃការវិភាគមុខងារ និងរចនាសម្ព័ន្ធថ្មី នៅមានការជជែក ពិភាក្សាបន្ត
-ថវិកា និងធនធានមនុស្ស មិនទាន់ឆ្លើយតបនឹងទំហំការងារស្នូល និងចំពោះមុខ
-សម្ភារៈ ឧបករណ៍បច្ចេកទេសស្រាវជ្រាវ និងទំនាក់ទំនងព័ត៌មានបែបលក្ខណៈវិទ្យាសាស្ត្រ មិនទាន់ឆ្លើយតបនឹងបរិវត្តកម្មឌីជីថល
-ការផ្តល់កិច្ចសហការ និងចែករំលែកព័ត៌មាន-ទិន្នន័យ ពីបណ្តាក្រសួង-ស្ថាប័នពាក់ព័ន្ធទាំងកម្រិតថ្នាក់ជាតិ និងថ្នាក់ក្រោមជាតិនៅមានកម្រិត
-ទីស្នាក់ការ/អង្គភាព និងមន្ត្រីបង្គោលអាជ្ញាធរទន្លេសាប នៅថ្នាក់ក្រោមជាតិនៃខេត្តទាំង៨ ជុំវិញតំបន់ទន្លេសាប មិនទាន់បានរៀបរយនៅឡើយ។
អាជ្ញាធរទន្លេសាបមានទិសដៅអនុវត្តការងារបន្តឆ្នាំ ២០២៥ដែលមានដូចជា៖
-បន្តតាមដាន និងវាយតម្លៃប្រសិទ្ធភាពអនុវត្តផែនការយុទ្ធសាស្ត្រ៥ឆ្នាំ របស់អាជ្ញាធរទន្លេសាប (២០២៤-២០២៨)
-បន្តតាមដាន និងវាយតម្លៃប្រសិទ្ធភាពនៃការអនុវត្តផែនការសកម្មភាពប្រចាំឆ្នាំ២០២៤
-បន្តធ្វើបច្ចុប្បន្នភាព រៀបចំ និងអនុវត្តសកម្មភាពការងារអាទិភាពប្រចាំឆ្នាំ២០២៥ ឱ្យមានប្រសិទ្ធភាព
-បន្តកិច្ចសហការជាមួយថ្នាក់ដឹកនាំអង្គភាពក្នុងការធ្វើកំណែទម្រង់វិភាគមុខងារ និងរៀបចំរចនាសម្ព័ន្ធថ្មីរបស់អគ្គលេខាធិការដ្ឋាន អាជ្ញាធរទន្លេសាប ប្រកបដោយប្រសិទ្ធភាព
-បន្តកសាងសមិទ្ធផល និងស្នាដៃសំខាន់ៗ ក្នុងការចូលរួមការពារថែរក្សា ទប់ស្កាត់ និងគ្រប់គ្រងតំបន់បឹងទន្លេសាប
-រៀបចំប្រព័ន្ធអនុវត្តការងារខ្សែបណ្តោយជាមួយមន្ត្រីជនបង្គោល និងស្នាក់ការរបស់អាជ្ញាធរទន្លេសាប នៅខេត្តទាំង៨ ក្នុងតំបន់ទន្លេសាប។
សូមបញ្ជាក់ផងដែរ កិច្ចប្រជុំផ្សព្វផ្សាយនេះមានការអញ្ជើញចូលរួមពីថ្នាក់ដឹកនាំ តំណាង ក្រសួង ស្ថាប័ន ពាក់ព័ន្ធ និងអភិបាលនៃគណៈអភិបាលខេត្តទាំង៨ ដែលពាក់ព័ន្ធនឹងបឹងទន្លេសាប ៕
