អគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ ចេញសេចក្តីបំភ្លឺព័ត៌មាន ចំពោះការប្រតិដ្ឋរឿង និងផ្សព្វផ្សាយព័ត៌មានមិនពិតរបស់បុគ្គលឈ្មោះ ហេង សិទ្ធី
ភ្នំពេញ៖ អគ្គនាយកដ្ឋានអត្តសញ្ញាណកម្ម ក្រសួងមហាផ្ទៃ សូមធ្វើការបដិសេធដាច់អហង្ការជុំវិញការប្រតិដ្ឋរឿង និងផ្សព្វផ្សាយព័ត៌មានមិនពិតរបស់បុគ្គល “ហេង សិទ្ធី – Heng Sithy” តាមរយៈបណ្តាញទំនាក់ទំនងសង្គម ហ្វេសបុក (Facebook) នៅថ្ងៃទី៦ ខែមករា ឆ្នាំ២០២៥ ដែលបានចោទប្រកាន់មកលើ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ថាប្រព្រឹត្តអំពើពុករលួយ គាបសង្កត់មន្ត្រីថ្នាក់ក្រោមគ្រប់ អគ្គនាយកដ្ឋាន ដើម្បីរកលុយឱ្យខ្លួនក្នុងពេលបំពេញការងារ។
ការប្រតិដ្ឋរឿង និងផ្សព្វផ្សាយព័ត៌មានមិនពិតខាងលើ បានធ្វើឱ្យប៉ះពាល់ដល់កិត្តិយស និងសេចក្តី ថ្លៃថ្នូររបស់ ឯកឧត្តមអភិសន្តិបណ្ឌិត ស សុខា ដែលបានខិតខំបំពេញការងារអស់ពីកម្លាំងកាយ កម្លាំងចិត្ត ប្រាជ្ញាស្មារតី ប្រកបដោយឆន្ទៈ មនសិការ និងការទទួលខុសត្រូវខ្ពស់ក្នុងនាមជា ឧបនាយករដ្ឋមន្ត្រី រដ្ឋមន្ត្រី ក្រសួងមហាផ្ទៃ ស្របតាមមគ្គទេសក៍ដឹកនាំដ៏ឈ្លាសវៃ ប្រកបដោយទស្សនវិស័យរបស់សម្តេចមហាបវរធីបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។
បុគ្គលឈ្មោះ “ហេង សិទ្ធី – Heng Sithy” មិនមែនជាតំណាងណាមួយរបស់យើងខ្ញុំ ជាថ្នាក់ដឹកនាំ និងមន្ត្រីនៃអគ្គនាយកដ្ឋានអត្តសញ្ញាណកម្ម នោះទេ។ ការលើកឡើងរបស់បុគ្គលនេះ ជាការកុហក បោកប្រាស់ និងប្រតិដ្ឋទាំងស្រុង។ ផ្ទុយទៅវិញ យើងខ្ញុំមានការគោរពស្រលាញ់ និងគាំទ្រដល់ការដឹកនាំ ប្រកបដោយ សមត្ថភាពខ្ពស់របស់ ឯកឧត្តមអភិសន្តិបណ្ឌិត ស សុខា ដែលជានិច្ចកាលតែងតែខិតខំបំពេញការងារ មិនគិតពីការលំបាក និងការនឿយហត់ដើម្បីបម្រើជាតិ និងមាតុភូមិកម្ពុជា។
ជាងមួយទសវត្សមកហើយ យើងខ្ញុំជាថ្នាក់ដឹកនាំ និងមន្ត្រីនៃអគ្គនាយកដ្ឋានអត្តសញ្ញាណកម្ម បាន កត់សម្គាល់ឃើញថា ក្រៅពីការងារស្នូលរបស់ខ្លួន ឯកឧត្តមអភិសន្តិបណ្ឌិត ស សុខា បានចំណាយពេលវេលា យ៉ាងច្រើន និងធនធានផ្ទាល់ខ្លួន ចូលរួមចំណែកយ៉ាងសកម្មជាមួយរាជរដ្ឋាភិបាលកម្ពុជា ក្នុងការងារសង្គម ការងារមនុស្សធម៌ ការងារសាសនា ការងារអប់រំបណ្តុះបណ្តាលយុវជនឱ្យក្លាយជាពលរដ្ឋល្អ ជាទំពាំងស្នងឫស្សី ការប្រកួតកីឡាមិត្តភាព ចុះជួយជនចាស់ជរា ជនងាយរងគ្រោះ ជួយព្យាបាលជំងឺដល់ប្រជាពលរដ្ឋដោយ ឥតគិតថ្លៃ និងសកម្មភាពជាច្រើនទៀត។
អគ្គនាយកដ្ឋានអត្តសញ្ញាណកម្ម សូមធ្វើការថ្កោលទោសដល់បុគ្គលឈ្មោះ “ហេង សិទ្ធី – Heng Sithy” នូវទង្វើអគតិ និងខ្វះការទទួលខុសត្រូវ ដែលប៉ុនប៉ងបង្អួចកិត្តិយសថ្នាក់ដឹកនាំ និងកេរ្តិ៍ឈ្មោះប្រទេសជាតិ និងសូមស្នើដល់ស្ថាប័នមានសមត្ថកិច្ចពាក់ព័ន្ធ ចាត់វិធានការនាំខ្លួនបុគ្គលនេះមកផ្តន្ទាទោសចំពោះមុខច្បាប់ ៕
