នគរបាលឃាត់ខ្លួនក្មេងទំនើងមួយក្រុម ៩នាក់ កសាងសំណុំរឿងបញ្ជូនទៅតុលាការ ក្រោយបង្កហិង្សាដោយចេតនា នៅស្រុកសង្គមថ្មីខេត្តព្រះវិហារ
ភ្នំពេញ៖ ក្រុមក្មេងទំនើងចំនួន០៩នាក់ ដែលជាមុខសញ្ញាបង្កហិង្សាដោយចេតនា (ប្រើប្រាស់កាំបិតកាប់) បណ្ដាលឲ្យរងរបួស០៣ នាក់ នៅចំណុចផ្លូវបំបែកអូរសំរោង ក្នុងភូមិស្ដៅ ឃុំស្ដៅ ស្រុកសង្គមថ្មី ខេត្តព្រះវិហារ កាលពីម៉ោងប្រហែល ២៣:៣០នាទី ថ្ងៃទី៣១ ខែ១២ ឆ្នាំ២០២៤ ត្រូវបានកម្លាំងកងរាជអាវុធហត្ថខេត្តព្រះវិហារ ធ្វើការឃាត់ខ្លួន នៅថ្ងៃទី ០១ ខែមករា ឆ្នាំ២០២៥។
លោកវ/ត្រី សូយ លឹមអុី នាយការិយាល័យព្រហ្មទណ្ឌ នៃកងរាជអារវុធហត្ថខេត្ត បានថ្លែងថា ដោយអនុវត្តន៍តាមបទបញ្ជារបស់ប្រមុខរាជរដ្ឋាភិបាល ឯកឧត្តម នាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងរាជអាវុធហត្ថលើផ្ទៃប្រទេស ឯកឧត្តម នាយឧត្តមសេនីយ៍ ម៉ៅ សុផាន់ ប្រធានក្រុមការងាររាជរដ្ឋាភិបាល ចុះជួយមូលដ្ឋានខេត្តព្រះវិហារ ឯកឧត្តម គីម រិទ្ធី អភិបាល នៃគណៈអភិបាលខេត្ត និងជាប្រធានគណះបញ្ជាការឯកភាពរដ្ឋបាលខេត្តព្រះវិហារ និងដោយមានការចង្អុលបង្ហាញជាប្រចាំពីសំណាក់ លោកឧត្តមសេនីយ៍ត្រី កង សៅគុណ មេបញ្ជាការកងរាជអាវុធហត្ថខេត្តព្រះវិហារ នៅថ្ងៃទី០១ ខែមករា ឆ្នាំ២០២៥ កម្លាំងមន្ទីរស្រាវជ្រាវ និងបង្ក្រាបបទល្មើស អាវុធហត្ថខេត្ត សហការជាមួយកម្លាំងមូលដ្ឋានកងរាជអាវុធហត្ថស្រុកសង្គមថ្មី បានចុះស្រាវជ្រាវករណីក្រុមក្មេងទំនើងបង្កហិង្សាដោយចេតនា មានស្ថានទម្ងន់ទោស១លើក (ប្រើប្រាស់កាំបិតកាប់) បណ្ដាលឲ្យរងរបួស០៣ នាក់ នៅចំណុចផ្លូវបំបែកអូរសំរោង ក្នុងភូមិស្ដៅ ឃុំស្ដៅ ស្រុកសង្គមថ្មី ខេត្តព្រះវិហារ កាលពីម៉ោងប្រហែល ២៣:៣០នាទី ថ្ងៃទី៣១ ខែ១២ ឆ្នាំ២០២៤ រហូតឈានដល់ការឃាត់ខ្លួនក្រុមក្មេងទំនើងចំនួន ០៩នាក់ ដែលជាជនសង្ស័យ។
ក្រោយពីបានឃាត់ខ្លួនក្រុមក្មេងទំនើងបង្កហិង្សាដោយចេតនាទាំង ០៩នាក់នេះរួចមក កម្លាំង កងរាជអាវុធហត្ថបានធ្វើតេស្តរកសារធាតុជាតិញៀន ជាលទ្ធផលអវិជ្ជមានទាំង ០៩នាក់ និងដកហូត វត្ថុតាងរួមមាន៖ម៉ូតូ ចំនួន ០១ គ្រឿង , ទូរស័ព្ទដៃ ចំនួន ០៨ គ្រឿង , កាំបិតខ្វែវ ចំនួន០១ ដើម ប្រវែង ៨០ ស.ម , ពូថៅ ចំនួន ០១ ដើម ប្រវែង៦២ ស.ម , ដំបងឈើ ចំនួន ០១ ប្រវែង ១២០ ស.ម , អាវក្រណាត់ដៃវែង ចំនួន ០១ និង អត្តសញ្ញាណប័ណ្ណ ចំនួន ០១ សន្លឹក។
បច្ចុប្បន្នជនសង្ស័យ រួមនិងវត្ថុតាងខាងលើកម្លាំងការិយាល័យជំនាញបានកសាងសំណុំរឿងបញ្ជូនទៅកាន់សាលាដំបូងខេត្តចាត់ការតាមនិតិវិធី និងបានបញ្ជូនបន្តទៅពន្ធនាគារខេត្តព្រះវិហារ៕
