ភ្នំពេញ៖ ក្នុងរយៈពេល១២ខែ នៅឆ្នាំ២០២៤ អាជ្ញាធរកម្ពុជាបង្រ្កាប បានគ្រឿងញៀនចម្រុះជាង ១៤តោន កើនឡើងដល់ទៅ ៥ដង បើធៀបនឹងឆ្នាំ២០២៣ ដែលរឹបអូសបានត្រឹមជិត ៣តោនប៉ុណ្ណោះ។
បើតាមនាយឧត្តមសេនីយ៍ មាស វិរិទ្ធ អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន បានឲ្យដឹងទៀតថា ពាក់ព័ន្ធនឹងការបង្រ្កាបគ្រឿងញៀនក្នុងឆ្នាំ២០២៤ មានការកើនឡើងខ្លាំងជាងឆ្នាំ២០២៣ ខណៈតួលេខគ្រឿងញៀនដែលរឹបអូសបានហក់ឡើងដល់ជាង១៤តោន បើធៀបនឹងឆ្នាំ២០២៣ បានកើនឡើងដល់ទៅ៤-៥ដងឯណោះ។
នាយឧត្តមសេនីយ៍ មាស វិរិទ្ធ ក៏បានពន្យល់ថា គ្រឿងញៀនកើនឡើងដ៏សន្ធឹកសន្ធាប់បែបនេះ គឺដោយសារកំណើននៃការផលិតជុំវិញពិភពលោកហក់ឡើងខ្ពស់ និងការដាំដុះដំណាំផលិតថ្នាំញៀននៅតំបន់ត្រីកោណមាសបន្តកើនឡើងដូចគ្នា។
នាយឧត្តមសេនីយ៍ មាស វិរិទ្ធ បញ្ជាក់ថា ការរឹបអូសបាន គ្រាន់តែជាមួយផ្នែកតូចនៃការចរាចរគ្រឿងញៀនលើសកលលោកតែប៉ុណ្ណោះ។
ជាមួយគ្នានោះនាយឧត្តមសេនីយ៍ មាស វិរិទ្ធ ក៏បានសង្កត់ធ្ងន់ថា «ក្នុងឆ្នាំ២០២៥ យើងនឹងគ្រោងស្នើសុំរាជរដ្ឋាភិបាល ដាក់ចេញវិធានការបោសសម្អាតគ្រឿងញៀនមួយឆ្នាំទៀត» ៕
