ស្ពានតភ្ជាប់រដ្ឋចំនួនពីរនៅតំបន់ភាគខាងជើង និងភាគឦសានប្រេស៊ីល បានបាក់ បណ្តាលឱ្យមនុស្សម្នាក់ស្លាប់

ប្រេស៊ីលី៖ ស្ពានតភ្ជាប់រដ្ឋចំនួនពីរនៅតំបន់ភាគខាងជើង និងភាគឦសាននៃប្រទេសប្រេស៊ីល បានបាក់កាលពីថ្ងៃអាទិត្យទី២២ខែធ្នូ ខណៈរថយន្តកំពុងឆ្លងកាត់បានធ្លាយអាស៊ីតស៊ុលហ្វួរិកចូលទៅក្នុងទន្លេ Tocantins និងបណ្តាលឱ្យមនុស្សម្នាក់ស្លាប់។

នាយកដ្ឋានហេដ្ឋារចនាសម្ព័ន្ធដឹកជញ្ជូនជាតិប្រេស៊ីល បានអះអាងថា ស្ពានមានប្រវែង៥៣៣ម៉ែត្រ តភ្ជាប់ទីក្រុង Estreito ក្នុងរដ្ឋ Maranhao និង Aguiarnopolis ក្នុងរដ្ឋ Tocantins បានបាក់កាលពីរសៀលថ្ងៃអាទិត្យទី២២ធ្នូ ដោយបណ្តាលឱ្យរថយន្ត​ដឹក​ទឹក​អាស៊ីត​ធ្លាក់​ចូល​ក្នុង​ទឹក​ និងបណ្តាលឱ្យមនុស្សម្នាក់ស្លាប់ និងម្នាក់ទៀតត្រូវបានជួយសង្គ្រោះទាន់ពេល។ នេះបើយោងតាមមន្រ្តី និងនាយកដ្ឋានពន្លត់អគ្គិភ័យ។

ក្រុមប្រឹក្សាក្រុង Aguiarnopolis លោក អាលីស ជូនៀរ (Elias Junior) សុំឱ្យអាជ្ញាធរដោះស្រាយបញ្ហាស្ពានពីព្រោះស្ពានមិនអាចទ្រទ្រង់រថយន្តធុនធ្ងន់បានទៀតទេ។ ការប៉ាន់ស្មានបឋមបង្ហាញថា យ៉ាងហោចណាស់មានមនុស្សចំនួន ១១នាក់ស្ថិតក្នុងគ្រោះថ្នាក់នេះ ដោយរថយន្តដឹកទំនិញពីរគ្រឿង កូនរថយន្តមួយគ្រឿង និងម៉ូតូមួយគ្រឿង បានធ្លាក់ចូលទៅក្នុងទឹកទន្លេ ដែលមានជម្រៅជាង៥០ម៉ែត្រ។ គួរបញ្ជាក់ថា ស្ពាន Juscelino Kubitschek de Oliveira ត្រូវបានសម្ពោធដាក់ឱ្យដំណើរការក្នុងឆ្នាំ១៩៦០៕