ភ្នំពេញ៖ ឯកឧត្ដម ម៉ាង ស៊ីណេត អភិបាលខេត្តព្រះសីហនុ និងឯកឧត្ដម លូ គឹមឈន់ ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានអគ្គនាយកកំពង់ផែស្វយ័តក្រុងព្រះសីហនុ បានអញ្ជើញជាអធិបតីក្នុងពិធីអបអរសាទរការសម្រេចបានបរិមាណកុងតឺន័រឆ្លងកាត់កំពង់ផែស្វយ័តចំនួន១លានTEUs។
ពិធីនេះធ្វើឡើងនាព្រឹកថ្ងៃទី២១ ខែធ្នូ ឆ្នាំ២០២៤ ដោយមានការចូលរួមពីលោក ប៊ី យ៉ូស៊ីហ៊ីរ៉ូ (ABE Yoshihiro) លេខាទី១ នៃស្ថានទូតជប៉ុនប្រចាំកម្ពុជា លោកស្រី មីយូរ៉ា យ៉ូស៊ីកុ (Ms.MIURA Yoshiko) អ្នកតំណាងជាន់ខ្ពស់នៃទីភ្នាក់ងារសហប្រតិបត្តិការអន្តរជាតិជប៉ុនប្រចាំនៅកម្ពុជា អភិបាលរងខេត្ត អភិបាលក្រុង ប្រធានមន្ទីរ អង្គភាពពាក់ព័ន្ធជុំវិញខេត្ត។
ឯកឧត្ដម ម៉ាង ស៊ីណេត បានកោតសរសើរ និងការខិតខំប្រឹងប្រែងដែលកំពង់ផៃស្វយ័តសម្រេច បានបរិមាណកុងតឺន័រឆ្លងកាត់កំពង់ផែស្វយ័តក្រុងព្រះសីហនុចំនួន១លាន TEUs របស់កំពង់ផែស្វយ័តក្រុងព្រះសីហនុ។ នេះពិតជាបង្ហាញឲ្យឃើញកាន់តែច្បាស់អំពីការខិតខំយកអស់កម្លាំងកាយចិត្ត ប្រាជ្ញា ស្មារតី ដោយមិនខ្លាចការនឿយហត់ មិនគិតពេលយប់-ថ្ងៃ ឬថ្ងៃឈប់សម្រាក អនុវត្តនូវតួនាទី ភារកិច្ច បានយ៉ាងល្អប្រសើររបស់ក្រុមប្រឹក្សាភិបាល ថ្នាក់ដឹកនាំ មន្រ្តី បុគ្គលិក កម្មករ-កម្មការិនីនៃកំពង់ផែស្វយ័តក្រុងព្រះសីហនុ ក្នុងការពង្រឹងគុណភាពនៃការផ្តល់សេវាកម្មកំពង់ផែជំរុញការអភិវឌ្ឍជាបន្តបន្ទាប់ទាំងផ្នែកហេដ្ឋារចនាសម្ព័ន្ធរូបវ័ន្ត ការធ្វើទំនើបកម្ម និងការគ្រប់គ្រងប្រតិបត្តិការអាជីវកម្មឱ្យកាន់តែមានការរីកចម្រើនឥតឈប់ឈរ រហូតទទួលបានលទ្ធផលអាជីវកម្មកើនឡើងជារៀងរាល់ឆ្នាំប្រកបដោយមោទកភាពជាទីបំផុត។
ឯកឧត្ដមអភិបាលខេត្តព្រះសីហនុថ្លែងបន្តថា ក្រោមកិច្ចសហប្រតិបត្តិការរវាងកម្ពុជា-ជប៉ុនខេត្តព្រះសីហនុ ទទួលបានការឧបត្ថម្ភគាំទ្រលើគម្រោងអភិវឌ្ឍជាច្រើនក្នុងវិស័យនានា ដូចជា សុខាភិបាល អប់រំ បរិស្ថាន ទូរគមនាគមន៍ ធារាសាស្រ្ត ជាពិសេសការអភិវឌ្ឍនៅកំពង់ផែស្វយ័តក្រុងព្រះសីហនុ ការសាងសង់តំបន់សេដ្ឋកិច្ចពិសេសកំពង់ផែ និងការផ្គត់ផ្គង់ឧបករណ៍គ្រឿងចក្រលើកដាក់នៅកំពង់ផែជាដើម។
ឯកឧត្ដម លូ គឹមឈន់ ឈ្លៀតក្នុងឱកាសនេះ បានសម្តែងនូវការគោរពដឹងគុណយ៉ាងជ្រាវជ្រៅបំផុតចំពោះសម្តេចតេជោ ហ៊ុន សែន អតីតនាយករដ្ឋន្ត្រីនៃកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលតែងតែយកចិត្តទុកដាក់ណែនាំដល់អ្នកដឹកនាំ បុគ្គលិកទាំងអស់នៅកំពង់ផែជាបន្តបន្ទាប់ ដើម្បីធ្វើយ៉ាងណាឲ្យកិច្ចការនៅទីនេះមានដំណើរការទៅដោយរលូន និងប្រកបដោយរីកចម្រើន ពោលសម្តេចតែងតែបង្កើតកម្មពិធីរាល់ថ្ងៃទី១ ខែឧសភា ដើម្បីសំណេះសំណាលអ្នកបម្រើការងារនៅកំពង់ផែស្វយ័តនេះ។
ប្រធានអគ្គនាយកកំពង់ផែស្វយ័តបានបន្តទៀតថា សម្តេចតេជោ ហ៊ុន សែន តែងតែនាំមកនូវសន្តិភាពជូនប្រទេសជាតិអស់រយៈពេលមកជាច្រើនឆ្នាំពុំធ្លាប់មាន រហូតមកដល់បច្ចុប្បន្ន ក៏មានសម្តេចមហាបវរធិបតី ហ៊ុន ម៉ាណែត ជាអ្នកបន្តវេនដឹកនាំប្រទេសប្រកបដោយការឈ្លាស់វៃ ធ្វើឲ្យមានសន្តិភាព ស្ថិរភាពទៅមុខទៀត លោកបានបន្ថែមថា មូលដ្ឋានគ្រឹះគឺស្ថិតនៅលើម្លប់សុខសន្តិភាពនោះហើយ ដែលនាំឱ្យសេដ្ឋកិច្ចជាតិឈានទៅរកការអភិវឌ្ឍជីវភាពរបស់ប្រជាជនមានភាពរីកចម្រើនទាំងអស់គ្នា។
ឯកឧត្ដម លូ គឹមឈន់ បានគូសបញ្ជាក់ថា ជាច្រើនឆ្នាំកន្លងមករហូតមកដល់ឆ្នាំ២០១៩ មធ្យមកំណើនអតិបមាបានត្រឹមតែ១២ភាគរយ ហើយផុតឆ្នាំ២០១៩ ខ្ពស់បំផុតបានគឺត្រឹមតែ១៨ភាគរយតែប៉ុណ្ណោះ តែអ្វីដែលកត់សម្គាល់នៅឆ្នាំ២០២៤នេះ កំណើនកើនរហូតដល់២៩ភាគរយ គឺពុំធ្លាប់មានជាប្រវត្តសាស្ត្រ ជាមោទណភាពបន្ថែមទៀតនោះ ឆ្នាំនេះកំពង់ផែរបស់យើងទទួលបាន១លាន់កុងតឺន័រ ហើយលទ្ធផលដ៏ធំធែងនេះគឺបានមកពីភាពឈ្លាស់វៃ ប៉ុនប្រសព្វរបស់សម្តេចតេជោ ហ៊ុន សែន និងសម្តេចមហាបវរធិបតី ហ៊ុន ម៉ាណែត មិនតែប៉ុណ្ណោះក៏មានកិច្ចសហប្រតិបត្តិការល្អពីដៃគូមិត្តជប៉ុន ដែលបានជួលគាំទ្រដល់ការសេវាកម្មកំពង់ផែមានដំណើរការកាន់តែប្រសើរ និងការពង្រីកកំពង់ផែទាន់ពេលវេលាសម្រាប់បម្រើដល់សេដ្ឋកិច្ចជាតិ៕
