ប្រធានាធិបតីអ៊ុយក្រែន ជួបអគ្គលេខាធិការអង្គការណាតូ និងមេដឹកនាំអឺរ៉ុបផ្សេងទៀត ក្នុងគោលបំណងទទួលបានជំនួយភ្លាមៗដើម្បីជំរុញកិច្ចប្រឹងប្រែងធ្វើសង្គ្រាមប្រឆាំងរុស្ស៉ី

កៀវ៖  បេីយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃព្រហស្បតិ៍ ទី១៩ ខែធ្នូ ឆ្នាំ ២០២៤ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានជួបអគ្គលេខាធិការអង្គការណាតូ លោក Mark Rutte និងមេដឹកនាំអឺរ៉ុបផ្សេងទៀត ក្នុងគោលបំណងទទួលបានជំនួយភ្លាមៗដើម្បីជំរុញកិច្ចប្រឹងប្រែងធ្វើសង្គ្រាមប្រឆាំងរុស្ស៉ី និងពិភាក្សាគ្នាអំពីការធានាសន្តិសុខរយៈពេលវែង។

លោក ហ្សលេនស្គី បានប្រាប់ក្រុមអ្នកសារព័ត៌មានថា កិច្ចពិភាក្សានៅទីក្រុងព្រុចសែលកាលពីថ្ងៃពុធសប្តាហ៍នេះ និងជាមួយមេដឹកនាំនៃបណ្តាប្រទេសសហភាពអឺរ៉ុបនៅថ្ងៃបន្ទាប់ គឺជាឱកាសដ៏ល្អក្នុងការនិយាយអំពីការធានាសន្តិសុខអ៊ុយក្រែន សម្រាប់ថ្ងៃនេះ និងថ្ងៃស្អែក។ លោក ហ្សេលេនស្គី បានបង្ហោះសារលេីបណ្តាញសង្គម X ទៀតថា លោក និងលោក Rutte មានកិច្ចប្រជុំដ៏សំខាន់ដែលផ្តោតលើការពង្រឹងការការពារដែនអាកាសអ៊ុយក្រែន ។

ចំណែក លោក Rutte បាននិយាយថា កិច្ចពិភាក្សាជាមួួយលោក ហ្សេលេនស្គី ផ្តោតលើការធានាឱ្យអ៊ុយក្រែន នៅតែស្ថិតក្នុងលក្ខខណ្ឌល្អបំផុត ទោះនៅពេលសម្រេចចិត្តចូលតុចរចារកសន្តិភាព ដោយនឹងផ្តល់ប្រព័ន្ធការពារដែនអាកាស និងសព្វាវុធបន្ថែមសម្រាប់ប្រយុទ្ធប្រឆាំងនឹងការឈ្លានពានរបស់រុស្ស៉ី។ ណាតូ មិន បានឱ្យដឹងទេថា មេដឹកនាំអឺរ៉ុបរូបណាខ្លះចូល រួម កិច្ច ពិភាក្សា ប៉ុន្តែអ្នកការទូតនិយាយថា មានអធិការបតីអាល្លឺម៉ង់ លោ ក Olaf Scholz នាយករដ្ឋមន្ត្រីអ៉ីតាលី លោកស្រី Giorgia Meloni ប្រធានាធិបតីប៉ូឡូញ លោក Andrzej Duda រដ្ឋមន្ត្រីការបរទេសបារាំង និងអង់គ្លេស រួមទាំងមន្ត្រីកំពូល EU លោកស្រី Ursula von der Leyen និងលោក Antonio Costa ផងដែរ។

គួរបញ្ជាក់ថា កិច្ចពិភាក្សាជាមួយអ៊ុយក្រែននាពេលនេះ ធ្វេីឡេីងចំពេលមានភាពមិនច្បាស់លាស់ជុំវិញការគាំទ្ររបស់សហរដ្ឋអាមេរិកនាពេលអនាគត ខណៈដែលប្រធានាធិបតីជាប់ឆ្នោត លោក ដូណាល់ ត្រាំ កំពុងជំរុញឱ្យបញ្ចប់សង្រ្គាម និងអំពាវនាវឱ្យមានបទឈប់បាញ់ជាបន្ទាន់៕