សាខាសមាគមនារីខេត្តកំពង់ចាម បើកវគ្គបណ្តុះបណ្តាល ស្ដីពីការបញ្រ្ជាបយេនឌ័រ និងសារៈសំខាន់ នៃភាពជាអ្នកដឹកនាំជាស្រ្តី
ភ្នំពេញ៖ សាខាសមាគមនារីកម្ពុជា ដើម្បីសន្តិភាព និងអភិវឌ្ឍន៍ ខេត្តកំពង់ចាម នាថ្ងៃទី៦ ខែវិច្ឆិកា ឆ្នាំ២០២៤ បានបើកវគ្គបណ្តុះបណ្តាល ស្តីពីការបញ្រ្ជាបយេនឌ័រ និងសារៈ សំខាន់នៃភាពជាអ្នកដឹកនាំរបស់ស្រ្តីនៅថ្នាក់ក្រោមជាតិ និងការពិនិត្យរកភាពមិនប្រក្រតី នៃដុំគីសសុដន់ដោយខ្លួនឯង ដើម្បីពង្រឹងសមត្ថភាពរបស់ស្រ្តី និងការពារសុខភាពរបស់ស្រ្តី ផងដែរ។
ពិធីបើកវគ្គបណ្តុះបណ្តាលនេះធ្វើឡើងនៅសាលសន្និសីទសាលាខេត្ត ក្រោមអធិបតីភាពលោកជំទាវ ប៉ាង ដានី ប្រធានប្រតិបត្តិសាខា និងជាតំណាង លោកជំទាវ ញូង ចរិយា អ៊ុន ចាន់ដា ប្រធានកិត្តិយសសាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ខេត្ត ដោយមានការចូលរួមពីសំណាក់ សមាជិកាសមាគមនារីមកពីមន្ទីរអង្គភាពជុំវិញខេត្ត សមាជិកាសមាគមនារីតាមក្រុង-ស្រុក ទាំង១០ ផងដែរ។
ឆ្លៀតក្នុងឱកាសនោះ លោកជំទាវ ប៉ាង ដានី បានមានប្រសាសន៍ថា នេះគឺជាពេលវេលាដ៏សមស្របមួយ របស់សាខាសមាគមនារីកម្ពុជាដើម្បីសន្តិភាព និងអភិវឌ្ឍន៍ និងក្រុមចលនាស្រ្តីថ្នាក់ប្រតិបត្តិខេត្ត បានរៀបចំបើកវគ្គបណ្តុះបណ្តាល នាឱកាសនេះ វាពិតជាមានសារៈសំខាន់ និងចាំបាច់បំផុត ដើម្បីយើងរួមគ្នាស្វែងយល់ថាត្រូវធ្វើដូចម្តេចដើម្បីអោយស្រ្តីជាថ្នាក់ដឹកនាំ ថ្នាក់ក្រោមជាតិ មានភាពរឹងមាំ មានភាពក្លាហាន និងមានសមត្ថភាពពេញលេញ ក្នុងការបំពេញបេសកកម្មជួយដល់រាជរដ្ឋាភិបាលស្មើនឹងបុរស ។
លោកជំទាវ បន្តថា វគ្គនេះក៏បានផ្តល់ឱកាសឲ្យសមាជិកាយើង លើកជា សំនួរ និងពិភាក្សា បញ្ចេញយោបល់ និងបកស្រាយនូវ ចំងល់ទាំងឡាយណាដែលពាក់ព័ន្ធនឹងស្ថានភាពរបស់ស្រ្តី ក៏ដូចជាការពង្រឹងសិទ្ធិ អំណាចក្នុងក្របខណ្ឌ័វិមជ្ឈការ និងវិសហមជ្ឈការ ក៏ដូចជាការយល់ដឹងអំពីការបញ្រ្ជាបយេនឌ័រ សមធម៌សង្គម និងបរិយាបន្ន និងយល់បានច្បាស់ពីលទ្ធិប្រជាធិបតេយ្យពីការចូលរួមរបស់បុរស និងស្រ្តី ជាពិសេសការយល់ដឹងនេះនឹងបានជាប្រយោជន៏សំរាប់លើកកំម្ពស់ស្ថានភាពសហគមន៍ ក៏ដូចជាសង្គមជាតិផងដែរ ។
ទន្ទឹមពេលជាមួយគ្នានោះដែរ លោកជំទាវ ប្រធានប្រតិបត្តិសាខាសមាគមនារីខេត្ត បានគូរបញ្ជាក់ថា ការបណ្តុះបណ្តាលនាពេលនេះ គឺដើម្បីឆ្លើយតបទៅនឹងស្ថានភាពជាក់ស្តែង របស់រាជរដ្ឋាភិបាលនីតិកាលកាលទី៧ នៃរដ្ឋសភា ក្រោមការដឹកនាំដ៏ស្វាហាប់ និងប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានបន្តកំណត់ការលើកកម្ពស់សមភាពយេនឌ័រ និងការបង្កើនភាពអង់អាចដល់ស្រ្តីនៅគ្រប់វិស័យជាអាទិភាពក្នុងរបៀបវារៈគោលនយោបាយ និងយុទ្ធសាស្ត្រ បញ្ចកោណដំណាក់កាលទី១ ដើម្បីកំណើន ការងារ សមធម៌ ប្រសិទ្ធិភាព និងចីរភាព ក្នងការកសាងមូលដ្ឋានគ្រឹះឆ្ពោះទៅសម្រេចចក្ខុវិស័យកម្ពុជាឆ្នាំ២០៥០ តាមរយៈការពង្រឹងភាពជាពលរដ្ឋក្នុងសង្គមដែលមានអារ្យធម៌ខ្ពស់ប្រកបដោយសីលធម៌ សមធម៌ និងបរិយាបន្ន ដែលក្នុងនោះ (ស្រ្តី គឺជាស្នូល)។
