អគ្គលេខាធិការ UN៖ ស៊ូដង់ត្រូវការការពារ ប៉ុន្តែការដាក់ពង្រាយកងកម្លាំង UN មិនទាន់សមស្របនៅឡើយទេ
ញូវយ៉ក៖ អគ្គលេខាធិការអង្គការសហប្រជាជាតិ (UN) លោក Antonio Guterres បានលើកសំណើទៅកាន់ក្រុមប្រឹក្សាសន្តិសុខ សម្រាប់ការគាំទ្រក្នុងកិច្ចការពារជនស៉ីវិល នៅប្រទេសស៊ូដង់ ដែលកំពុងហែកហួរដោយសង្រ្គាម ប៉ុន្តែថាលក្ខខណ្ឌបច្ចុប្បន្ន មិនទាន់សមស្របឱ្យដាក់ពង្រាយកម្លាំង UN នៅឡើយទេ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអង្គារ ទី២៩ ខែតុលា ឆ្នាំ ២០២៤។
លោក Guterres ប្រាប់សមាជិកទាំង ១៥នៃក្រុមប្រឹក្សាសន្តិសុខ ដូច្នេះថា «ប្រជាជនស៊ូដង់ កំពុងរស់នៅក្នុងសុបិន្តអាក្រក់នៃអំពើហិង្សា ដោយជនស៉ីវិលរាប់ពាន់នាក់ត្រូវបានសម្លាប់ ហើយច្រើនរាប់មិនអស់ទៀត ប្រឈមមុខនឹងអំពើឃោរឃៅ រួមទាំងការរំលោភបំពានផ្លូវភេទ»។ លោកបានទទួលយកការអំពាវនាវរបស់ស៊ូដង់ និងពីក្រុមសិទ្ធិមនុស្ស ឱ្យចាត់វិធានការបង្កើនការការពារជនស៉ីវិល ដោយនិយាយថា មិនទាន់មានការបញ្ជូនកងកម្លាំង UN ទៅការពារជនស៉ីវិលទេ ប៉ុន្តែលោកនឹងពិភាក្សារកវិធីកាត់បន្ថយអំពើហិង្សា ហើយការពារជនស៉ីវិលតាមរបៀបផ្សេង។
គួរបញ្ជាក់ថា សង្គ្រាមបច្ចុប្បន្នបានបង្កើតរលកនៃអំពើហិង្សា លើជនជាតិភាគតិច ហើយត្រូវបានដាក់បន្ទុកលើកងកម្លាំងទាហានប៉ារ៉ា (RSF)។ ក្រុមសកម្មជននិយាយថា ទាហាន RSF បានសម្លាប់មនុស្សយ៉ាងហោចណាស់ ១២៤នាក់ នៅភូមិមួយនៃរដ្ឋ El Gezira ក្នុងឧប្បត្តិហេតុដ៏សាហាវមួយ កាលពីថ្ងៃសុក្រសប្តាហ៍មុន ប៉ុន្តែ RSF បានបដិសេធធ្វើបាបជនស៉ីវិល ហើយចាត់ទុកសកម្មភាពដែលកើតឡើងនោះ ថាធ្វើទៅលើអ្នកប្រព្រឹត្តអំពើអាក្រក់។
តាមរបាយការណ៍របស់ UN មនុស្សជិត ២៥លាននាក់ ស្មើនឹងពាក់កណ្តាលប្រជាជនស៊ូដង់សរុប កំពុងត្រូវការជំនួយ ខណៈគ្រោះទុរ្ភិក្ស កំពុងកើតមានក្នុងជំរំអ្នកផ្លាស់ទីលំនៅ។ មនុស្ស ១១លាននាក់ បានភៀសខ្លួនចេញពីផ្ទះសម្បែងរបស់ពួកគេ។ ក្នុងនោះជិត ៣លាននាក់ ចាកចេញទៅកាន់ប្រទេសផ្សេង៕
