ថ្នាក់ដឹកនាំ និងមន្ត្រីនៃអគ្គលេខាធិការដ្ឋានរដ្ឋសភា ចូលរួមស្តាប់បទបង្ហាញឯកទេស ស្តីពីការបោះឆ្នោតប្រធានាធិបតីអាមេរិក ឆ្នាំ២០២៤

ភ្នំពេញ៖ ឯកឧត្តមបណ្ឌិត ឈាង វណ្ណារិទ្ធ អគ្គលេខាធិការរងរដ្ឋសភា ព្រមទាំងមន្ត្រី នៃអគ្គលេខាធិការដ្ឋានរដ្ឋសភា នាថ្ងៃទី១៦ ខែតុលា ឆ្នាំ២០២៤ បានអញ្ជើញចូលរួមស្តាប់បទបង្ហាញឯកទេសស្តីពីការបោះឆ្នោតប្រធានាធិបតីសហរដ្ឋអាមេរិកឆ្នាំ២០២៤ និងទិសដៅគោលនយោបាយការបរទេសនាពេលអនាគត «The 2024 US Presidential Elections and Future Foreign Policy Directions» ដោយឯកឧត្តមបណ្ឌិត អ៊ុន ឃាង រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ។

ឯកឧត្តមបណ្ឌិត អ៊ុន ឃាង បានលើកបង្ហាញថា ការបោះឆ្នោតប្រធានាធិបតីសហរដ្ឋអាមេរិក មានឥទ្ធិពលយ៉ាងខ្លាំងទៅលើការឆ្លើយតបទៅនឹងវិបត្តិនានានៅជុំវិញពិភពលោក ដូចជា សង្គ្រាម ជំងឺរាតត្បាត និងប្រែប្រួលអាកាសធាតុ និងបញ្ហាក្នុងតំបន់ក៏ដើរតួនាទីយ៉ាងសំខាន់ផងដែរ។ ដូច្នេះហើយនៅពេលមានការបោះឆ្នោតម្ដងៗ ពិភពលោកបានងាកមកចាប់អារម្មណ៍ទៅលើលទ្ធផលនៃការបោះឆ្នោតនៅសហរដ្ឋអាមេរិក។
ការបោះឆ្នោតជ្រើសរើសប្រធានាធិបតីសហរដ្ឋអាមេរិក ជាការបោះឆ្នោតដោយប្រយោល (Electoral College Vote)។ ប្រជាពលរដ្ឋអាមេរិកបោះឆ្នោតជ្រើសរើសតំណាងរាស្ត្ររបស់ខ្លួននៅតាមរដ្ឋនីមួយៗ ហើយតំណាងដែលជាប់ឆ្នោតនឹងត្រូវបោះឆ្នោតជ្រើសរើសប្រធានាធិបតីស្របតាមឆន្ទៈរបស់ប្រជាពលរដ្ឋ។

ឯកឧត្តមបណ្ឌិត អ៊ុន ឃាង ក៏បានបង្ហាញពីគោលនយោបាយក្នុងការឃោសនាបោះឆ្នោត សម្រាប់ប្រកួតប្រជែង ដែលរួមមានដូចជា បញ្ហាសេដ្ឋកិច្ច ជនអន្តោប្រវេសន៍ ការថែទាំសុខភាព ការអប់រំ ការរំលូតកូន និងសិទ្ធិក្នុងការប្រើប្រាស់អាវុធជាដើម។

ជាចុងបញ្ចប់ ឯកឧត្តមបណ្ឌិត ឈាង វណ្ណារិទ្ធ អគ្គលេខាធិការរងរដ្ឋសភា បានសម្តែងនូវការអរគុណចំពោះ​ ឯកឧត្តមបណ្ឌិត អ៊ុន ឃាង រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ ដែលបានចំណាយពេលវេលាដ៏មានតម្លៃក្នុងការចែករំលែកនូវចំណេះដឹង​ និងបទពិសោធខាងលើនេះ៕