ភ្នំពេញ៖ នៅព្រឹកថ្ងៃទី១០ ខែតុលា ឆ្នាំ២០២៤ ឯកឧត្ដម ស្បោង សារ៉ាត ប្រធានក្រុមប្រឹក្សាខេត្តព្រៃវែង និងលោក សួន សុម៉ាលីន អភិបាលខេត្ត និងលោកស្រី រួមទាំងមន្ត្រីរាជការ មន្ទីរអង្គភាពនានាជុំវិញខេត្ត កងកម្លាំងទាំង៣ បានអញ្ជើញចូលរួមក្រុងពលី សុំសុខសួស្ដីជ័យមង្គល ដល់ក្រុមការងាររៀបចំ ការប្រណាំងទូកឲ្យប្រព្រឹត្តទៅ នៅពេលខាមុខ បានដោយរលូនស្ថិតនៅមាត់ទន្លេក្រុងព្រៃវែង។
ពិធីនេះ បានប្រារព្ធឡើងតាមបែបព្រហ្មញ្ញសាសនា ដោយមានការរៀបចំសែនតាមបែបបុរាណ និងតាមគន្លងប្រពៃណីទំនៀមទម្លាប់ជំនឿសាសនារបស់ខ្មែរ ក្នុងបុព្វហេតុបួងសួងសុំសេចក្តីសុខ និងដើម្បីជាលំអាន សម្រាប់អនុជនជំនាន់ក្រោយបានដឹង បានយល់ បានស្គាល់ និងបន្តថែរក្សាមរតកឲ្យបានគង់វង្សសម្រាប់ថ្ងៃអនាគត។
សូមបញ្ជាក់ថា កម្មវិធីប្រណាំងទូក-ង ប្រព្រឹត្តទៅនៅថ្ងៃទី១៦-១៧ ខែតុលា ឆ្នាំ២០២៤ ខាងមុខនេះ ក្រោមអធិបតីភាពឯកឧត្ដម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា និងនៅថ្ងៃថ្ងៃបិទ ក្រោមអធិបតីភាពឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ។
សូមបញ្ជាក់ថា ពិធីប្រណាំងទូកនេះមានទូក-ង ចូលរួមប្រណាំងមកពី៦ស្រុករួមមាន៖
ទី១៖ ស្រុកពោធិ៍រៀង ទូកខ្លីចំនួន២៨ ទូកវែងចំនួន៨
ទី២៖ ស្រុកពាមរក៍ទូកខ្លីចំនួន៤ ទូកវែងចំនួន៣
ទី៣៖ ស្រុកពារាំងទូខ្លី២ ទូកវែងចំនួន៥
ទី៤៖ ក្រុងព្រៃវែងទូកខ្លីចំនួន៨
ទី៥៖ ស្រុកស៊ីធរកណ្តាលទូកខ្លីចំនួន៣ ទូកវែងចំនួន១
ទី៦៖ ស្រុកពាមជរទូកខ្លីចំនួន២ ទូកវែងចំនួន១។ទូកចូលរួមប្រណាំងខ្លីសរុបចំនួន៤៧ វែងចំនួន១៨ សរុបរួមចំនួន៦៥ទូក៕
