បរទេស៖ យន្តហោះនេះបានបាត់ខ្លួនកាលពីថ្ងៃសៅរ៍ បន្ទាប់ពីហោះចេញពីមូលដ្ឋានក្បែរភ្នំភ្លើង Vachkazhets ក្នុងឧបទ្វីប Kamchatka។ ក្រុមមន្ត្រីបានឲ្យដឹងកាលពីថ្ងៃអាទិត្យថា រហូតមកដល់ពេលនេះសាកសព ១៧នាក់ ត្រូវបានរកឃើញ។
តំបន់នោះ ដែលជាតំបន់ទេសចរណ៍ដ៏ពេញនិយមមួយ មានភាពល្បីល្បាញដោយសារភ្នំភ្លើងសកម្ម។ មូលហេតុនៃការធ្លាក់នៅមិនទាន់ច្បាស់នៅឡើយ។
ឧបទ្ទវហេតុបែបនេះគឺកើតមានជាញឹកញាប់នៅក្នុងតំបន់ឆ្ងាយបូព៌ារបស់ប្រទេសរុស្ស៊ី ដែលមានប្រជាជនតិច និងទទួលរងនូវអាកាសធាតុដ៏អាក្រក់។ កាលពីបីឆ្នាំមុន មនុស្សប្រាំបីនាក់បានស្លាប់នៅពេលដែលឧទ្ធម្ភាគចក្រទេសចរណ៍មួយបានធ្លាក់ចូលទៅក្នុងបឹងមួយនៅ Kamchatka។
ឧទ្ធម្ភាគចក្រ Mi-8T ដែលបានបាត់ពីរ៉ាដា កាលពីថ្ងៃសៅរ៍ បានដឹកភ្ញៀវទេសចរ ១៩នាក់ និងនាវិក៣នាក់។
លោក Vladimir Solodov អភិបាល Kamchatka បានសរសេរនៅលើ Telegram ថា បំណែកយន្តហោះត្រូវបានរកឃើញកាលពីព្រឹកថ្ងៃអាទិត្យ នៅក្នុងតំបន់ភ្នំមួយ។
វីដេអូដែលបានបង្ហោះចូលទៅក្នុងកម្មវិធីផ្ញើសារដោយក្រសួងសង្គ្រោះបន្ទាន់របស់ប្រទេសរុស្ស៊ី បានបង្ហាញឱ្យឃើញនូវបំណែកនៃឧទ្ធម្ភាគចក្រដែលស្ថិតនៅក្បែរជម្រាលភ្នំជិតភ្នំឈើដ៏ធំមួយ។ ក្រុមមន្ត្រីបានឲ្យដឹងថា បំណែកយន្តហោះត្រូវបានរកឃើញនៅជិតទីតាំងដែលឧទ្ធម្ភាគចក្របានហោះចេញពីរ៉ាដា។
មន្ត្រីក្រសួងសង្គ្រោះបន្ទាន់លោក Ivan Lemikhov បានឲ្យដឹងថា សាកសពចំនួន ១៧នាក់ត្រូវបានរកឃើញរហូតមកដល់ពេលនេះ ហើយការស្វែងរកអ្នកដែលនៅតែបាត់ខ្លួនត្រូវបានផ្អាក ដោយគ្រោងនឹងបន្តនៅពេលព្រឹកថ្ងៃច័ន្ទ។
ទីភ្នាក់ងារព័ត៌មាន Interfax របស់រុស្ស៊ីបានរាយការណ៍ថា កំហុសពីឡុត ដែលអាចបណ្តាលមកពីអ័ព្ទ គឺជាទ្រឹស្តីចម្បងទាក់ទងនឹងមូលហេតុនៃការធ្លាក់យន្តហោះ។
មុននេះ មន្ត្រីបានបញ្ជាក់ថា អ័ព្ទក្រាស់កំពុងរារាំងកិច្ចខិតខំប្រឹងប្រែងរបស់អ្នកជួយសង្គ្រោះ។
យន្តហោះនេះត្រូវបានគ្រប់គ្រងដោយក្រុមហ៊ុន Vityaz-Aero ដែលមានមូលដ្ឋាននៅ Kamchatka ដែលរៀបចំជើងហោះហើរសម្រាប់ភ្ញៀវទេសចរ។
រចនាឡើងក្នុងអំឡុងសម័យសូវៀត ឧទ្ធម្ភាគចក្រ Mi-8 នៅតែត្រូវបានប្រើប្រាស់យ៉ាងទូលំទូលាយនៅក្នុងប្រទេសរុស្ស៊ី។
