អគ្គនាយកដ្ឋានគយ រៀបចំកិច្ចប្រជុំពិភាក្សា ជាមួយសមាគមធុរកិច្ចជប៉ុននៅកម្ពុជា ពាក់ព័ន្ធនឹងការផ្ដល់កិច្ចសម្រួលពាណិជ្ជកម្ម និងការធ្វើសាមញ្ញកម្មនីតិវីធីគយ
ភ្នំពេញ៖ នាថ្ងៃទី៣០ ខែកក្កដា ឆ្នាំ២០២៤ នៅអគ្គនាយកដ្ឋានគយនិងរដ្ឋាករកម្ពុជា មានរៀបចំកិច្ចប្រជុំពិភាក្សាដោយផ្ទាល់និងតាមប្រព័ន្ធវីដេអូ រវាងអគ្គនាយកដ្ឋានគយនិងរដ្ឋាករកម្ពុជា (អគរ) និងសមាគមធុរកិច្ចជប៉ុននៅកម្ពុជា (JBAC) ពាក់ព័ន្ធនឹងការផ្ដល់កិច្ចសម្រួលពាណិជ្ជកម្ម និងការធ្វើសាមញ្ញកម្មនីតិវីធីគយ ។
កិច្ចប្រជុំបានប្រព្រឹត្ដទៅក្រោមអធិបតីភាព ឯកឧត្តមបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយនិងរដ្ឋាករកម្ពុជា ជាសហប្រធាន និង លោក TABEI Hideaki ប្រធាន JBAC ជាសហប្រធាន ដោយមានការចូលរួមពីតំណាង JBAC តំណាងស្ថានទូតជប៉ុនប្រចាំព្រះរាជាណាចក្រកម្ពុជា ទីភ្នាក់ងារសហប្រតិបត្តិការអន្តរជាតិជប៉ុន (JICA) និងថ្នាក់ដឹកនាំនិងមន្ត្រីគយនិងរដ្ឋាករ។
ឯកឧត្តមបណ្ឌិត គុណ ញឹម បានជម្រាបជូនអង្គប្រជុំអំពីវឌ្ឍនភាពការងារមួយចំនួនបន្ទាប់ពីកិច្ចប្រជុំរវាង អគរ និង JBAC កាលពីថ្ងៃទី២២ ខែមករា ឆ្នាំ២០២៤ រួមមាន ការចុះហត្ថលេខាលើអនុស្សារណៈនៃការយោគយល់គ្នារវាងរដ្ឋបាលគយកម្ពុជានិងរដ្ឋបាលគយថៃ ស្តីពីទំនិញឆ្លងកាត់ (Transit of Goods) ការប្រកាសដាក់ឱ្យអនុវត្ដជាផ្លូវការប្រព័ន្ធបញ្ជរតែមួយជាតិ កាលពីថ្ងៃទី៧ ខែឧសភា ឆ្នាំ២០២៤ ក្រោមអធិបតីភាពដ៏ខ្ពង់ខ្ពស់របស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជា។
លោក TABEI Hideaki បានថ្លែងអំណរគុណយ៉ាងជ្រាលជ្រៅចំពោះ អគរ ដែលបានរៀបចំកិច្ចប្រជុំពិភាក្សានេះឡើង ក៏ដូចជាវិធានការនានាដែល អគរ បានដាក់ចេញជាបន្ដបន្ទាប់ ដើម្បីផ្ដល់កិច្ចសម្រួលពាណិជ្ជកម្មបន្ថែមទៀតដល់ធុរជនពាក់ព័ន្ធនឹងការងារគយ។
កិច្ចប្រជុំពិភាក្សាបានពិនិត្យលើសំណូមពរចំនួន ៣ រួមមាន ការជំរុញបើកដំណើរការជាផ្លូវការមាត់ច្រកស្ទឹងបត់-បាណងអៀង ការស្នើធ្វើទំនើបកម្មនិងសាមញ្ញកម្មបន្ថែមទៀតលើនីតិវិធីគយមួយចំនួន និងវឌ្ឍនភាពនៃការសាងសង់អាកាសយានដ្ឋានអន្តរជាតិតេជោ។
លោក TOKITO Hiroyuki តំណាងស្ថានទូតជប៉ុនប្រចាំព្រះរាជាណាចក្រកម្ពុជា បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ អគរ ក្នុងការលើកកម្ពស់ និងកែលម្អបរិយាកាសធុរកិច្ចឱ្យបានកាន់តែប្រសើរ និងសូមផ្ដល់កិច្ចសហការយ៉ាងមុតមាំជាមួយ អគរ ក្នុងការជំរុញការដាក់ឱ្យដំណើរការមាត់ច្រកស្ទឹងបត់-បានណងអៀង។ ទន្ទឹមនេះ លោក TOKITO Hiroyuki បានបញ្ជាក់បន្ថែមថា នឹងលើកយកសំណើរបស់ អគរ ក្នុងការរៀបចំហេដ្ឋារចនាសម្ព័ន្ធរូបវន្ដបម្រើដល់ប្រតិបត្ដិការនៃសម្រួលពាណិជ្ជកម្ម ក៏ដូចជាការផ្ដល់សេវាសាធារណៈប្រចាំថ្ងៃនៅមាត់ច្រកស្ទឹងបត់-បានណងអៀងនេះ ដាក់ជូនរាជរដ្ឋាភិបាលជប៉ុនផងដែរ។
អគ្គនាយកដ្ឋានគយនិងរដ្ឋាករកម្ពុជា សមាគមធុរកិច្ចជប៉ុននៅកម្ពុជា ទីភ្នាក់ងារសហប្រតិបត្តិការអន្តរជាតិជប៉ុន និងស្ថានទូតជប៉ុនប្រចាំព្រះរាជាណាចក្រកម្ពុជា បានបេ្តជ្ញាចិត្តបន្តពង្រឹងកិច្ចសហការជាមួយគ្នាឱ្យកាន់តែជិតស្និទ្ធថែមទៀត ក្នុងគោលដៅសម្រួលពាណិជ្ជកម្ម កែលម្អបរិយាកាសធុរកិច្ច ដើម្បីចូលរួមចំណែកអភិវឌ្ឍសេដ្ឋកិច្ចកម្ពុជាឱ្យកាន់តែរីកចម្រើនបន្ថែមទៀត។
