សម្តេចធិបតី និងលោកជំទាវបណ្ឌិត ផ្តល់អង្ករ ៥តោន ដល់តំបន់ប្រតិបត្តិការសឹករងបាត់ដំបង ដើម្បីចែកជូនពលរដ្ឋជួបការលំបាកក្នុងភូមិសាស្ត្រទទួលខុសត្រូវ
ភ្នំពេញ៖ ឯកឧត្តម នាយឧត្តមសេនីយ៍ គីម ប៊ុនថាន រដ្ឋមន្ត្រីប្រតិភូអមនាយករដ្ឋមន្ត្រី តំណាងដ៏ខ្ពង់ខ្ពស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នាថ្ងៃទី១១ ខែកក្កដា ឆ្នាំ២០២៤ បានអញ្ជើញជាអធិបតីក្នុងពិធីសំណេះសំណាល និងប្រគល់អង្ករ ចំនួន ៥តោន ជាអំណោយដ៏ថ្លៃថ្លារបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ផ្តល់ជូនតំបន់ប្រតិបត្តិការសឹករងបាត់ដំបង ដើម្បីចែកជូនដល់ប្រជាពលរដ្ឋដែលជួបការលំបាក ឬជួបគ្រោះមហន្តរាយផ្សេងៗក្នុងភូមិសាស្ត្រទទួលខុសត្រូវ។
ក្នុងមតិស្វាគមន៍ និងរបាយការណ៍របស់លោកឧត្តមសេនីយ៍ត្រី ភើយ លំអង មេបញ្ជាការ តំបន់ប្រតិបត្តិការសឹករងបាត់ដំបង បានលើកឡើងថាកន្លងមក សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត តែងតែផ្តល់នូវគ្រឿងឧបភោគ បរិភោគ និងថវិកាដល់អង្គភាពតំបន់ប្រតិបត្តិការសឹករងបាត់ដំបង ដើម្បីឧបត្ថម្ភដល់អតីតយុទ្ធជនមានជីវភាពទីទ័លក្រ និងប្រជាពលរដ្ឋជួបការលំបាក ឬជួបគ្រោះមហន្តរាយផ្សេងៗ អង្គភាពបាននាំយកអំណោយទាំងនោះទៅចែកជូនពួកគាត់ជាបន្តបន្ទាប់។
មានមតិសំណេះសំណាលនាពេលនោះ ឯកឧត្តម នាយឧត្តមសេនីយ៍ គីម ប៊ុនថាន រដ្ឋមន្ត្រី ប្រតិភូអមនាយករដ្ឋមន្ត្រី បានពាំនាំពាក្យផ្តាំផ្ញើសួរសុខទុក្ខរបស់ សម្តេចធិបតី និងលោកជំទាវបណ្ឌិត ជូនចំពោះ នាយទាហាន នាយទាហានរង ពលទាហានទាំងអស់។ ឯកឧត្តម រដ្ឋមន្ត្រី ប្រតិភូអមនាយករដ្ឋមន្ត្រីបានថ្លែងបន្តថា សម្ដេចតេជោ ហ៊ុន សែន ប្រធានព្រឹទ្ធសភា និងជាប្រធានសមាគមអតីតយុទ្ធជនកម្ពុជា និងសម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី លោកតែងតែគិតគូរយកចិត្តទុកដាក់ពីសុខទុក្ខកងកម្លាំង និងជីវភាពរស់នៅរបស់បងប្អូនអតីតយុទ្ធជនគ្រប់ពេលវេលា។
ក្នុងឱកាសនោះដែរ លោកឧត្តមសេនីយ៍ត្រី មេបញ្ជាការ បានថ្លែងថាអំណោយដែលទទួលបាននាពេលនេះ លោកនឹងយកទៅឧបត្ថម្ភជូនឱ្យដល់ដៃបងប្អូនអតីតយុទ្ធជនដែលមានជីវភាពទីទ័លក្រ យោធិនមានជីវភាពខ្វះខាត និងប្រជាពលរដ្ឋជួបគ្រោះមហន្តរាយផ្សេងៗដែលកើតមានឡើងក្នុងភូមិសាស្ត្រអង្គភាពទទួលខុសត្រូវ និងសូមគោរពថ្លែងអំណរគុណដ៏ជ្រាលជ្រៅជាទីបំផុតចំពោះ សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី សូមទទួលបានជោគជ័យគ្រប់ភារកិច្ច និងសមប្រកបដោយពុទ្ធពរទាំង៤ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕
