ប្រ៊ុចសែល៖ គណៈកម្មការអឺរ៉ុបនៅសប្តាហ៍នេះ ត្រូវបានគេរំពឹងថា នឹងបង្ហាញពីពន្ធថ្មីដែលខ្លួនគ្រោងនឹងដាក់លើរថយន្តអគ្គិសនីរបស់ចិន អាចជំរុញឱ្យមានការសងសឹកពីសំណាក់រដ្ឋធានីប៉េកាំង។ ការប្រកាសពន្ធថ្មីធ្វើឡើងដើម្បីជាការឆ្លើយតបចំពោះការឧបត្ថម្ភធនលើសលប់របស់រដ្ឋាភិបាលចិន លើឧស្សាហកម្មរថយន្តអគ្គិសនី។
ចំណាត់ការរបស់អឺរ៉ុបលេចឡើងតិចជាងមួយខែបន្ទាប់ពីរដ្ឋធានីវ៉ាស៊ីនតោនបានដំឡើងពន្ធបួនដងសម្រាប់រថយន្តអគ្គិសនីរបស់ចិនដល់១០០ភាគរយ។ ប៉ុន្តែពន្ធរបស់អឺរ៉ុប នឹងមិនខ្ពស់ដូចជាសហរដ្ឋអាម៉េរិកនោះទេ។ ការផ្លាស់ប្ដូរនេះ កើតឡើងនៅពេលដែលក្រុមហ៊ុនផលិតរថយន្តនៅអឺរ៉ុបកំពុងត្រូវបានប្រកួតប្រជែងដោយលំហូរនៃរថយន្តអគ្គិសនីមានតម្លៃទាបពីគូប្រជែងចិន។ ក្រុមហ៊ុនផលិតរថយន្តរបស់អាល្លឺម៉ង់ ដែលពឹងផ្អែកយ៉ាងខ្លាំងលើការលក់នៅក្នុងប្រទេសចិន និងក្រុមហ៊ុនរថយន្តអឺរ៉ុបនាំចូលរថយន្តផលិតនៅប្រទេសចិនភ័យខ្លាចមានការសងសឹកពីរដ្ឋធានីប៉េកាំង។ ប៉ុន្តែប្រធានគណៈកម្មការអឺរ៉ុប លោកស្រី អ៊ុយស៊ូឡា វ៉ុន ឌឺឡេយិន (Ursula von der Leyen) បាននិយាយម្ដងហើយម្ដងទៀតថា អឺរ៉ុបត្រូវតែធ្វើសកម្មភាពដើម្បីការពារពីការជន់លិចទីផ្សាររបស់ប្លុកនេះ ជាមួយនឹងរថយន្តអគ្គិសនីមានតម្លៃថោករបស់ចិន។
លោក វីល រ៉ូបឺត (Will Roberts) ប្រធានផ្នែកស្រាវជ្រាវរថយន្ត បានបញ្ចេញមតិថា៖«ប្រសិនបើមានការបង្កហេតុ ប្រតិកម្ម និងផលប៉ះពាល់អាចនាំឱ្យមានសង្គ្រាមពាណិជ្ជកម្ម ដែលនឹងមានការបំផ្លិចបំផ្លាញសម្រាប់តំបន់ដែលនៅតែពឹងផ្អែកខ្លាំងលើខ្សែច្រវាក់ផ្គត់ផ្គង់គ្រប់គ្រងដោយចិន ដើម្បីសម្រេចបាននូវគោលដៅអាកាសធាតុ»។
មហាអំណាចសេដ្ឋកិច្ចលំដាប់ទី២លើលោក ចិន បានស្តីបន្ទោសសហភាពអឺរ៉ុបជុំវិញការស៊ើបអង្កេតប្រឆាំងនឹងការឧបត្ថម្ភធន ប៉ុន្តែមិនបានបញ្ជាក់ពេញលេញអំពីការឆ្លើយតបរបស់ខ្លួន ចំពោះពន្ធគយនោះទេ។ ជាការឆ្លើយតប រដ្ឋធានីប៉េកាំងបានបើកការស៊ើបអង្កេតប្រឆាំងជុំវិញការនាំចូលម៉ាកយីហោ ដែលផលិតពីបារាំងភាគច្រើន។ មិនត្រឹមតែប៉ុណ្ណោះ ចិនក៏បានអនុម័តច្បាប់មួយកាលពីខែមេសា ដើម្បីពង្រឹងសមត្ថភាពរបស់ខ្លួនក្នុងការវាយបកវិញ ប្រសិនបើសហរដ្ឋអាម៉េរិក ឬសហភាពអឺរ៉ុបដាក់ពន្ធលើការនាំចេញនៃសេដ្ឋកិច្ចលេខ២របស់ពិភពលោកមួយនេះ។
គួរបញ្ជាក់ថា អ្នកវិភាគរំពឹងថា ពន្ធថ្មីដែលអឺរ៉ុបនឹងស្ថិតនៅចន្លោះពី១០ទៅ២៥ ភាគរយ។ ដោយផ្អែកលើទិន្នន័យពាណិជ្ជកម្មឆ្នាំ២០២៣ រាល់ការបន្ថែម១០ភាគរយលើការយកពន្ធដែលមានស្រាប់ នឹងធ្វើឱ្យអ្នកនាំចូលរថយន្តអគ្គិសនីរបស់ចិនរបស់សហភាពអឺរ៉ុប ត្រូវបង់ប្រាក់ប្រហែល១ពាន់លានដុល្លារបន្ថែម។ ម៉ូដែលរថយន្តអគ្គិសនីចិន ដែលបាននាំចេញទៅអឺរ៉ុបរួមមាន BYD’s Atto 3, MG របស់ SAIC និង Geely’s Volvo ៕
