គណៈកម្មការទី៨ នៃរដ្ឋសភា ចុះពិនិត្យស្វែងយល់លើការងារបណ្តុះបណ្តាលវិជ្ជាជីវៈ និងបច្ចេកទេស នៅវិទ្យាស្ថានពហុបច្ចេកទេសខេត្តព្រះវិហារ

ភ្នំពេញ៖ គណៈប្រតិភូគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃរដ្ឋសភា (គណៈកម្មការទី៨) ដឹកនាំដោយ​ លោកជំទាវ ឡោក ខេង ប្រធានគណៈកម្មការ បានអញ្ជើញចុះពិនិត្យស្វែងយល់អំពីការបណ្តុះបណ្តាលវិជ្ជាជីវៈ និងបច្ចេកទេស នៅវិទ្យាស្ថានពហុបច្ចេកទេសខេត្តព្រះវិហារ នាព្រឹកថ្ងៃទី១០ ខែមិថុនា ឆ្នាំ២០២៤។

បេសកកម្មរបស់គណៈប្រតិភូគណៈកម្មការទី៨ នាពេលនេះ គឺធ្វើឡើងក្នុងគោលបំណងតាមដានការអនុវត្តគោលនយោបាយរបស់រាជរដ្ឋាភិបាលកម្ពុជា ដែលបាននឹងកំពុងយកចិត្តទុកដាក់យ៉ាងខ្លាំងលើវិស័យបណ្តុះបណ្តាលវិជ្ជាជីវៈ និងបច្ចេកទេសដល់យុវជនក្រីក្រ និងយុវជនមកពីគ្រួសារងាយរងហានិភ័យ ១លាន៥សែននាក់ ឱ្យទទួលបានការបណ្តុះបណ្តាលមួយ ដែលមានលក្ខណៈច្បាស់លាស់ និងស្របតាមតម្រូវការទីផ្សារ ដែលធ្វើយ៉ាងណាគឺត្រូវរៀនឱ្យចប់ ឱ្យចេះ ឱ្យមានការងារធ្វើ ដើម្បីរួមចំណែកក្នុងការកាត់បន្ថយភាពក្រីក្រ លើកស្ទួយជីវភាពក្រុមគ្រួសារ ឱ្យមានការរីកចម្រើន ស្របតាមយុទ្ធសាស្រ្តបញ្ចកោណដំណាក់កាលទី១របស់រាជរដ្ឋាភិបាលនីតិកាលទី៧ ក្រោមការដឹកនាំដ៏ឈ្លាសវៃ និងប្រកបដោយកិត្តិបណ្ឌិតរបស់​ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ក្នុងន័យនេះ វិទ្យាស្ថានពហុបច្ចេកទេសខេត្តព្រះវិហារបានខិតខំផ្សព្វផ្សាយដល់ក្រុមគោលដៅ ដោយសហការជាមួយអាជ្ញាធរមូលដ្ឋាន ដោយក្នុងឆ្នាំ២០២៤ ជំហ៊ានទី១ មានអ្នកចុះឈ្មោះ​ និងបានចូលរៀន ១៣២នាក់ ក្នុងនោះ យុវជនមកពីគ្រួសារក្រីក្រ មានចំនួន៤៥នាក់ បានទទួលការបណ្តុះបណ្តាលលើជំនាញ កុំព្យូទ័រ ជួសជុល និងថែទាំរថយន្ត ជួសជុលអគ្គិសនី ម៉ាស៊ីនត្រជាក់ សំអាងការ និងការកែច្នៃមុខម្ហូប។ ជំហ៊ានទី២ មន្ទីរការងារ និងវិទ្យាស្ថាន ដោយទទួលបានគោលការណ៍ពីក្រសួងការងារ និងបណ្តុះបណ្តាលវិជ្ជាជីវៈ បានចុះផ្សព្វផ្សាយអំពីគោលនយោបាយនេះ បានចំនួន៨ក្រុង-ស្រុក និង៣០ឃុំ-សង្កាត់ និងមានអ្នកចាប់អារម្មណ៍ចុះឈ្មោះចូលរៀនចំនួន២៨៦នាក់បន្ថែម។ ទន្ទឹមនឹងនោះ ចំពោះការបណ្តុះបណ្តាលនេះ ឃើញថាជួបបញ្ហាប្រឈមមួយចំនួនផងដែរ ដូចជាខ្វះគ្រូបច្ចេកទេស ខ្វះកន្លែងស្នាក់នៅសម្រាប់គ្រូ និងសិស្ស ខ្វះសម្ភារៈបច្ចេកទេស និងប្រាក់ឧបត្ថម្ភនៅមានចំនួនតិច ដែលលំបាកក្នុងការហូបចុក និងតម្រូវការគ្រួសារ។

ឆ្លៀតក្នុងឱកាសនោះ លោកជំទាវ ឡោក ខេង ប្រធានគណៈកម្មការទី៨ នៃរដ្ឋសភា បានវាយតម្លៃខ្ពស់ ចំពោះការខិតខំប្រឹងប្រែងរបស់វិទ្យាស្ថាន លោកគ្រូបង្គោលទាំងអស់ ដែលបានខិតខំប្រឹងប្រែងចុះផ្សព្វផ្សាយផង បណ្តុះបណ្តាលផង ធ្វើយ៉ាងណាឱ្យគោលនយោបាយបណ្តុះបណ្តាលយុវជនដែលបានដាក់ចេញ ទទួលបានជោគជ័យស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលកម្ពុជា​ ៕