ឯកឧត្តម ឈុន ពុទ្ធារិទ្ធ អញ្ជើញចុះពិនិត្យវឌ្ឍនភាពការងារ និងវាយតម្លៃបញ្ចប់សុពលភាពគម្រោងការពារចាំងទន្លេ និងព្រែក ក្នុងភូមិសាស្ត្រខេត្តកណ្តាល
ភ្នំពេញ៖ នៅថ្ងៃចន្ទ ៤កើត ខែជេស្ឋ ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១០ ខែមិថុនា ឆ្នាំ២០២៤ ឯកឧត្ដម ឈុន ពុទ្ឋារិទ្ឋ អគ្គនាយកនៃអគ្គនាយកដ្ឋានកិច្ចការបច្ចេកទេសនៃក្រសួងធនធានទឹក និងឧតុនិយម បានអញ្ជើញចុះពិនិត្យវឌ្ឍនភាពការងារកសាងច្រាំងទន្លេ និងវាយតម្លៃបញ្ចប់សុពលភាពគម្រោងការពារច្រាំងទន្លេនិងព្រែក ក្នុងភូមិសាស្ត្រខេត្តកណ្តាល។
សូមជម្រាបថា ការចុះវាយតម្លៃបញ្ចប់សុពលភាពគម្រោងការពារច្រាំងទន្លេនិងព្រែកនាពេលនេះ មានការចូលរួមពីគណៈកម្មាធិការលទ្ធកម្ម (គល) អង្គភាពលទ្ធកម្ម (អល) ក្រុមការងារបច្ចេកទេស នៃនាយកដ្ឋានជលសាស្ត្រ និងការងារទន្លេ នៃក្រសួងធនធានទឹក និងឧតុនិយម តំណាងមន្ទីរធនធានទឹក និងឧតុនិយមខេត្តកណ្តាល និងតំណាងក្រសួងសេដ្ឋកិច្ច និងហិរញ្ញវត្ថុ។
ក្នុងឱកាសនោះ ក្រុមការងារបានចុះពិនិត្យគម្រោងការពារច្រាំងទន្លេនិងព្រែក ចំនួន ៣ទីតាំង៖ ទី១).គម្រោងការពារច្រាំងទន្លេមេគង្គប្រវែង ២៣០ម៉ែត្រ ស្ថិតនៅភូមិរការកោង ឃុំរការកោង១ ស្រុកមុខកំពូល ក្រោយចប់ធានាគុណភាពរយ:ពេល ១២ខែ, ទី២).គម្រោងការពារច្រាំងព្រែកត្នោតប្រវែង ២៤០ ម៉ែត្រ ស្ថិតនៅភូមិតាខ្មៅ១ សង្កាត់តាខ្មៅ ក្រុងតាខ្មៅ ខេត្តកណ្តាល ក្រោយបញ្ចប់សុពលភាពរយ:ពេល ១២ខែ និងទី៣)គម្រោងការពារច្រាំងព្រែកកុយប្រវែង ១៥០ម៉ែត្រ ស្ថិតនៅភូមិព្រែកផ្តៅ ឃុំរកាកោង១ ស្រុកមុខកំពូល ខេត្តកណ្តាល ក្រោយបញ្ចប់សុពលភាពរយ:ពេល១២ខែ។
ជារួមក្រុមការងារពិនិត្យឃើញថា គម្រោងទាំង ៣ ទីតាំងខាងលើ គឺរក្សាគុណភាពបានល្អដដែល។
ដោយឡែក វឌ្ឍនភាពការងារសាងសង់សំណង់ការពារច្រាំងទន្លេបាសាក់ប្រវែង ១២០០ម៉ែត្រ ស្ថិតក្នុងភូមិសាស្ត្រសង្កាត់ព្រែកជ្រៃ ក្រុងសំពៅពូន ខេត្តកណ្តាល គិតមកដល់ថ្ងៃទី៦ ខែមិថុនា ឆ្នាំ២០២៤ សម្រេចបានប្រមាណ ៩០% ដែលគ្រោងនឹងបញ្ចប់ការសាងសង់ក្នុងបំណាច់ខែសីហា ឆ្នាំ ២០២៤ខាងមុខនេះ។
ក្នុងនោះការងារសម្រេចបានរួមមាន៖ ទី១).ការងាររៀបបាវការពារចរន្តទឹកបុក ហូរច្រោះដីផ្នែកខាងក្រោមសម្រេចបាន១០០%, ទី២).ការងារបុកស្ពាន់ផាយសម្រេចបាន១០០%, ទី៣).ការងារបុកស៊ីតផាយសម្រេចបាន១០០%, ទី៤).ការងារបេតុងអាមេសម្រេចបាន៨០%, ទី៥).ការងាររៀបប្រព័ន្ធដោះទឹកក្រោមដីសម្រេចបាន៨០%, ទី៦).ការងារបំពេញដីសម្រេចបាន៩៨% និងទី៧).ការងារបន្ទាប់នឹងរៀបចំថ្មមុខសំណង់ ៕
