អគ្គនាយកពន្ធនាគារ អញ្ជើញចុះត្រួតពិនិត្យហេដ្ឋារចនាសម្ព័ន្ធ និងវឌ្ឍនភាពការងារក្នុងពន្ធនាគារខេត្តស្ទឹងត្រែង

ភ្នំពេញ៖ នាព្រឹកថ្ងៃទី០៧ ខែមិថុនា ឆ្នាំ២០២៤ ឯកឧត្តម ឧត្តមអគ្គានុរក្សថ្នាក់លេខ១ ឈន សាណាត អគ្គនាយក នៃអគ្គនាយកដ្ឋានពន្ធនាគារ អមដំណើរដោយ អគ្គនាយករង និងមន្ត្រីនៃអគ្គនាយកដ្ឋានពន្ធនាគារជាច្រើនរូបទៀត បានអញ្ជើញចុះត្រួតពិនិត្យហេដ្ឋារចនាសម្ព័ន្ធ និងវឌ្ឍនភាពការងារក្នុងពន្ធនាគារខេត្តស្ទឹងត្រែង។

នាឱកាសនោះ ឯកឧត្តម អគ្គនាយក បានថ្លែងកោតសរសើរដល់មន្រ្តីពន្ធនាគារខេត្តស្ទឹងត្រែង ចំពោះការគ្រប់គ្រងមណ្ឌលបានល្អ ទាំងការងារសន្តិសុខ ការងារប្រតិបត្តិ និងកម្មវិធីបណ្តុះបណ្តាល។

ឯកឧត្តម អគ្គនាយក បានបន្តមានប្រសាសន៍ថា ត្រូវបន្តអនុវត្តការងារឲ្យបានល្អបន្ថែមទៀត ក្នុងនោះត្រូវយកចិត្តទុកដាក់ខ្ពស់ ការពារធានាសន្តិសុខសុវត្ថិភាព នៅពេលដែលនាំជនជាប់ឃុំទៅធ្វើពលកម្មខាងក្រៅបរិវេណពន្ធនាគារ ជាពិសេសត្រូវអនុវត្តតាមអនុសាសន៍ណែនាំដ៏ខ្ពង់ខ្ពស់របស់ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ពាក់ព័ន្ធនឹងប្រព័ន្ធសុវត្ថិភាពត្រូវតែមានបន្ទប់កាមេរ៉ាសុវត្ថិភាពសំរាប់មន្ត្រីត្រួតពិនិត្យជាប្រចាំ ៕