សមាជិកសភាកម្ពុជា ចូលរួមថ្លែងសុន្ទរកថាគន្លឹះក្នុងសន្និសីទជំនាញអន្តរជាតិស្តីពី ជីវចម្រុះ នៅរដ្ឋធានីសេអ៊ូល
ភ្នំពេញ៖ ដោយទទួលបានការឯកភាពដ៏ខ្ពង់ខ្ពស់ពី សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា ឯកឧត្តមសាស្ត្រាចារ្យបណ្ឌិត ទី សុគន្ធ អ្នកតំណាងរាស្ត្រមណ្ឌលខេត្តកណ្តាល និងជាលេខាធិការគណៈកម្មការកិច្ចការបរទេស សហប្រតិបត្តិការអន្តរជាតិ និងព័ត៌មានរបស់រដ្ឋសភានៃព្រះរាជាណាចក្រកម្ពុជា បានអញ្ជើញថ្លែងសុន្ទរកថាគន្លឹះក្នុងពិធីបើកសន្និសីទជំនាញអន្តរជាតិស្តីពី ជីវចម្រុះ ដែលបានរៀបចំឡើងដោយក្រសួងបរិស្ថាននៃសាធារណរដ្ឋកូរ៉េ ដែលមានការចូលរួមពីអ្នកជំនាញជាន់ខ្ពស់មកពីបណ្តាប្រទេសជាដៃគូ នៃទ្វីបអាសុី អាហ្វ្រិក និងអាមេរិកឡាទីន ព្រមជាមួយសាស្ត្រាចារ្យ អ្នកវិទ្យាសាស្ត្រ អ្នកស្រាវជ្រាវជំនាញនៃក្រសួងស្ថាប័នរដ្ឋ វិទ្យាស្ថានស្រាវជ្រាវជាតិ និងនិស្សិតសាកលវិទ្យាល័យនានាក្នុងប្រទេសកូរ៉េ ប្រមាណជាង២០០នាក់។
ក្នុងឱកាសចូលរួមសន្និសីទជំនាញស្តីពី ជីវចម្រុះនេះ ឯកឧត្តមអ្នកតំណាងរាស្ត្រក៏បានចូលរួមកិច្ចប្រជុំទ្វេភាគីជាន់ខ្ពស់ជាមួយ លោកជំទាវ ហាន វ៉ា ជីន រដ្ឋមន្ត្រីក្រសួងបរិស្ថាននៃសាធារណរដ្ឋកូរ៉េ ដើម្បីពិភាក្សាលើកិច្ចសហប្រតិបត្តិការទ្វេភាគីកម្ពុជា-កូរ៉េ ក្នុងវិស័យបរិស្ថាន និងធនធានធម្មជាតិ ដោយគ្របដណ្តប់ទៅលើការបន្តកិច្ចសហប្រតិបត្តិការស្រាវជ្រាវជីវចម្រុះ ការបង្កើនជំនួយផ្លូវការបៃតង(Green ODA) ការកាត់បន្ថយការបញ្ចេញឧស្ម័នផ្ទះកញ្ចក់ តាមរយៈការបង្កើតថាមពលស្អាត និងកកើតឡើង រួមមានគម្រោងរោងចក្រអគ្គិសនីប្រើប្រាស់កាកសំណល់ជីវម៉ាស វារីអគ្គិសនីនៅខេត្តកំពង់ធំ ការផ្គត់ផ្គង់ទឹកស្អាតដោយប្រព័ន្ធវៃឆ្លាតនៅរាជធានីភ្នំពេញ និងអាចពង្រីកបន្តទៅខេត្តកណ្តាល ជាពិសេសការផ្គត់ផ្គង់ទឹកស្អាតដល់សិស្សសាលាដើម្បីជួយកាត់បន្ថយការប្រើប្រាស់ដបទឹកផ្លាស្ទីក និងគម្រោងកាត់បន្ថយការបំពុលខ្យល់ដោយផ្សែងអ័ព្ទឆ្លងដែន(Pandora Network)។
សូមបញ្ជាក់ថា រាល់គម្រោងនៃកិច្ចសហប្រតិបត្តិការទាំងនេះនឹងមានកម្មវិធីពង្រឹងសមត្ថភាពផងដែរ ដែលគិតជាថវិកាគម្រោងសរុប ៦៤,២ពាន់លានវ៉ុនកូរ៉េ។
ក្នុងជំនួបទ្វេភាគីកម្រិតខ្ពស់នេះ ក៏មានការចូលរួមរបស់ លោកជំទាវ ជ្រឹង បទុមរង្សី ឯកអគ្គរាជទូតវិសាមញ្ញ និងពេញសមត្ថភាពនៃព្រះរាជាណាចក្រកម្ពុជាប្រចាំសាធារណរដ្ឋកូរ៉េផងដែរ។ មុននឹងធ្វេីមាតុភូមិនិវត្តន៍ នាល្ងាចថ្ងៃសៅរ៍ ទី២៥ ខែឧសភា ឆ្នាំ២០២៤នេះ ឯកឧត្តមអ្នកតំណាងរាស្ត្រ និងសហការី នឹងចុះជួបកសិករហាត់ការតាមរដូវកាលនៅតាមបណ្តាកសិដ្ឋានសរីរាង្គ មួយចំនួនក្នុងប្រទេសកូរ៉េផងដែរ ៕
