នាយកដ្ឋានផែនការអភិវឌ្ឍន៍ទេសចរណ៍ រៀបចំសិក្ខាសាលាលើឯកសារ និងផែនទីផ្លូវទស្សនាមេគង្គកម្ពុជា ផ្តល់សុពលភាព សម្រាប់ការអភិវឌ្ឍទេសចរណ៍ដងទន្លេមេគង្គលើខេត្តស្ទឹងត្រែង និងខេត្តក្រចេះ

ភ្នំពេញ៖ កាលពីថ្ងៃទី២១ ខែ ឧសភា ឆ្នាំ២០២៤ នាយកដ្ឋានផែនការអភិវឌ្ឍន៍ទេសចរណ៍ សហការជាមួយមន្ទីរទេសចរណ៍ខេត្តស្ទឹងត្រែង និង ខេត្តក្រចេះ រួមអង្គការ NTFP-EP បានរៀបចំសិក្ខាសាលាលើឯកសារ និងផែនទីផ្លូវទស្សនាមេគង្គកម្ពុជា ផ្តល់សុពលភាព សម្រាប់ការអភិវឌ្ឍទេសចរណ៍ដងទន្លេមេគង្គលើខេត្តស្ទឹងត្រែង និង ខេត្តក្រចេះ ។

គោលបំណង នៃអង្គសិក្ខាសាលាគឺ
១-ប្រមូលទិន្នន័យ និងព័ត៌មានដែលមានស្រាប់ ដើម្បីធ្វើបច្ចុប្បន្នភាពទស្សនាមេគង្គ ចាប់ពីចំណុចទីរួមស្រុកឆ្លូង ខេត្តក្រចេះ ដល់ខេត្តស្ទឹងត្រែង ព្រំប្រទល់កម្ពុជា-ឡាវ
២-ពិភាក្សាអំពីធាតុចូលសំខាន់ៗនៃផ្លូវទស្សនាមេគង្គ ការបែងចែកការងារ និងការទទួលខុសត្រូវនៃក្រុមការងារបច្ចេកទេស
៣-ធ្វើការកំណត់ទីតាំងភូមិសាស្រ្ត និងកំណត់សក្ដានុពលសំខាន់ៗ ព្រមទាំងកំណត់គោលបំណង និងទំហំនៃការធ្វើបច្ចុប្បន្នភាពផែនទីផ្លូវទស្សនាមេគង្គ។

អង្គសិក្ខាសាលានេះដែរ បានប្រព្រឹត្តទៅក្រោម អធិបតី លោក ធូ ចាន់ពៅ អភិបាលរងខេត្តស្ទឹងត្រែង តំណាងឱ្យឯកឧត្តម ស្វាយ សំអ៊ាង អភិបាលខេត្ត និង លោក ហង់ ចាន់ឌី អភិបាលរងខេត្តក្រចេះ តំណាងឲ្យ ឯកឧត្តម វ៉ា ថន អភិបាលខេត្ត និង ប្រតិភូ ក្រសួងទេសចរណ៍ និង តំណាងអង្គការ NTFP_EP ព្រមទាំង ប្រធាន អនុប្រធាន មន្ទីរអង្គភាពដែលពាក់ព័ន្ធ មកពីខេត្ត ទាំង ២ ជាច្រើនរូប ។

មានប្រសាសន៍ក្នុងអង្គសិក្ខាសាលា លោក ធូ ចាន់ពៅ អភិបាលរងខេត្តស្ទឹងត្រែង បានបញ្ជាក់ថា ក្នុងនាមរដ្ឋបាលខេត្តស្ទឹងត្រែង លោកសូមវាយតម្លៃខ្ពស់ ចំពោះកិច្ចខិតខំប្រឹងប្រែងរវាងក្រុមការងារជំនាញ របស់នាយកដ្ឋានផែនការអភិវឌ្ឍន៍ទេសចរណ៍ នៃក្រសួងទេសចរណ៍ មន្ទីរទេសចរណ៍ខេត្តក្រចេះ និងមន្ទីរទេសចរណ៍ខេត្តស្ទឹងត្រែង ព្រមទាំងសហការជាមួយ អង្គការកម្មវិធីផ្លាស់ប្តូរបទពិសោធន៍អនុផលព្រៃឈើ-កម្ពុជា (NTFP-EP Cambodia) និងដៃគូពាក់ព័ន្ធផ្សេងៗ ទៀត ដែលបាន ចុះសិក្សាផ្ទាល់ដល់ទីតាំងអេកូទេសចរណ៍ និងតំបន់សក្តានុពលទេសចរណ៍សំខាន់ៗ ដើម្បីធ្វើ បច្ចុប្បន្នភាពផែនទីផ្លូវទស្សនាមេគង្គលើ ប្រកបដោយផ្លែផ្កាបំផុត ។

លោក ធូ ចាន់ពៅ បានបន្តថា តាមរយៈផ្លូវទស្សនាមេគង្គនេះ បានធ្វើឲ្យភ្ញៀវទេសចរជាតិ និងអន្តរជាតិបានស្គាល់ និងមកទស្សនាខេត្តទាំងពីរយ៉ាងច្រើនកុះករ ជាហេតុនាំឲ្យ វិស័យទេសចរណ៍នៅក្នុងខេត្តមានសន្ទុះរីកចំរើនគួរឲ្យកត់សំគាល់ និងបានបង្កើតជាសហគមន៍ទេសចរណ៍/អេកូ ទេសចរណ៍ជាច្រើននៅតាមដងទន្លេមេគង្គ ដែលបានបង្កើនប្រាក់ចំណូលដល់ប្រជាពលរដ្ឋមូលដ្ឋានតាមរយៈ ការផ្តល់សេវាកម្មទេសចរណ៍ផងដែរ។

មានប្រសាសន៍ចូលរួមនាឱកាសនោះដែរ លោក ហង់ ចាន់ឌី អភិបាលរងខេត្តក្រចេះ បានលើកឡើង ជាក់ស្តែងនាពេលបច្ចុប្បន្ន ភ្ញៀវទេសចរណ៍ជាតិ និងអន្តរជាតិ មានការពិបាកក្នុងការស្វែងរកព័ត៌មាន និង ទីកន្លែងកម្សាន្តថ្មីៗដែលបានរៀបចំឡើងតាមបណ្តោយដងទន្លេមេគង្គលើ ការធ្វើបច្ចុប្បន្នភាពផែនទីផ្លូវទស្សនា មេគង្គលើ គឺជារឿងចាំបាច់មិនអាចខ្វះបាន សំដៅផ្តល់ភាពងាយស្រួលក្នុងការស្វែងរកព័ត៌មានពីកន្លែងកម្សាន្ត តាមបណ្តោយដងទន្លេមេគង្គលើដែលមានភូមិសាស្ត្រស្ថិតក្នុងខេត្តក្រចេះ និងខេត្តស្ទឹងត្រែង។

ឆ្លៀតក្នុងឱកាសនោះដែរ លោក ហង់ ចាន់ឌី បានគោរពថ្លែងអំណរគុណយ៉ាងជ្រាលជ្រៅបំផុត ជូនចំពោះ ឯកឧត្តម សុខ សូកេន រដ្ឋមន្ត្រីក្រសួងទេសចរណ៍ ក្នុងការផ្តល់អនុសាសន៍គាំទ្រ និង ណែនាំឱ្យនាយកដ្ឋានផែនការអភិវឌ្ឍន៍ទេសចរណ៍ មន្ទីរទេសចរណ៍ខេត្តក្រចេះ ខេត្តស្ទឹងត្រែង អង្គារ NTFP-EP កម្ពុជា និងក្រុមការងារបច្ចេកទេសក្នុងការរៀបចំធ្វើបច្ចុប្បន្នភាពផ្លូវទស្សនាមេគង្គលើ (Upper Mekong Trail Map) កន្លងមកប្រកបដោយភាពជោគជ័យ និងក្លាយជាឧត្តមប្រយោជន៍សម្រាប់ការអភិវឌ្ឍន៍វិស័យ ទេសចរណ៍ ខេត្តទាំង២ ទៅថ្ងៃអនាគត៕