អ្នកនាំពាក្យក្រសួងការងារ លើក ៣ចំណុចសំខាន់ ជុំវិញករណីអតីតបុគ្គលិក ណាហ្កាវើលប្រហែលជាង ២០នាក់ប៉ុណ្ណោះកំពុងបន្តការតវ៉ា
ភ្នំពេញ៖ ឯកឧត្តម កត្តា អន អ្នកនាំពាក្យក្រសួងការងារ និង បណ្តុះបណ្តាលវិជ្ជាជីវៈ បានលើកឡើងថា ករណីបងប្អូនអតីតបុគ្គលិក ណាហ្កាវើល (Naga World)
ក្រសួងការងារ និងបណ្តុះបណ្តាលវិជ្ជាជីវៈបានប្រឹងប្រែងសម្របសម្រួលដោះស្រាយករណីកូដករណាហ្កាវើលនេះតាមសមត្ថកិច្ច និងតួរនាទី ដូចមានចែងក្នុងច្បាប់ការងារ ដោយប្រើប្រាស់យន្តការដោះស្រាយវិវាទការងារតាមការសម្របសម្រួលផ្សះផ្សាចំនួន២លើក ប៉ុន្តែភាគីវិវាទមិនសះជា។
ឯកឧត្ដមបន្តថា ក្រសួងបានបញ្ជូនករណីនេះទៅដោះស្រាយតាមយន្តការក្រុមប្រឹក្សាអាជ្ញាកណ្តាល។ ក្រុមប្រឹក្សាអាជ្ញាកណ្តាលបានចេញសេចក្តីសម្រេចរួចហើយផងដែរ។
ឯកឧត្តម កត្តា អន បន្ថែមថា ក្រុមហ៊ុនណាហ្កាវើលក៏បានផ្ទេរប្រាក់បំណាច់ និងសំណងបញ្ចប់កិច្ចសន្យាការងារចូលគណនីធនាគាររបស់អតីតបុគ្គលិកទាំង នោះរួចរាល់ជាយូរមកហើយ។
គណៈកម្មការសម្រាប់ដោះស្រាយបញ្ហាកូដកម្ម បាតុកម្មនៅក្រុមមុខសញ្ញា (គ.ក.ប.) បានសម្របសម្រួលដោះស្រាយករណីនេះចំនួន ២៧លើក តែភាគីទាំងពីរមិនមានដំណោះស្រាយបញ្ចប់វិវាទនោះទេ។
អ្នកនាំពាក្យក្រសួងការងារ បញ្ជាក់ថា គិតត្រឹមថ្ងៃទី១៣ ខែឧសភា ឆ្នាំ២០២៤ នេះ ក្នុងចំណោមអតីតបុគ្គលិកទាំង ៣៧៣ នាក់នោះ មានអតីតបុគ្គលិកចំនួន ២៩៣នាក់ បានយល់ព្រមទទួលយកការទូទាត់នូវប្រាក់បំណាច់ និងសំណងបញ្ចប់កិច្ចសន្យាការងារជាមួយក្រុមហ៊ុន ដែលធ្វើឱ្យអតីតបុគ្គលិកដែលមិនព្រមទទួលយកសំណងនៅសល់ត្រឹម ៨០នាក់ប៉ុណ្ណោះ ហើយក្នុងចំណោមបុគ្គលិក ៨០នាក់នេះ សព្វថ្ងៃមួយចំនួនបានមានការងារថ្មីធ្វើ ឯអ្នកដែលជាកូដករកំពុងបន្តការតវ៉ាសព្វថ្ងៃមានប្រហែលជាង២០នាក់ប៉ុណ្ណោះ ។
ទន្ទឹមគ្នានោះជាដំណោះស្រាយ អ្នកនាំពាក្យក្រសួងការងារ យល់ឃើញថា៖
១.បងប្អូនអតីតបុគ្គលិកណាហ្កាវើសគួរមានជម្រើសធ្វើការងារដើម្បីមានប្រាក់ចំណូលឬប្រាក់ខែសម្រាប់ទ្រទ្រង់ជីវភាពគ្រួសារ។ ទីភ្នាក់ងារជាតិមុខរបរ និងការងារនៃក្រសួងការងារ (NEA) ជួយសម្របសម្រួលស្វែងរកការងារថ្មីជូនបងប្អូន។ សព្វថ្ងៃនេះមានការងាររាប់ម៉ឺនកន្លែងកំពុងត្រូវការបុគ្គលិកធ្វើការដូចជា ធនាគារ ក្រុមហ៊ុន រោងចក្រ សហគ្រាស ។ល។
២.បងប្អូនកូដករណាហ្កាវើល ត្រូវបង្ហាញនូវឆន្ទះរបស់ខ្លួនក្នុងការដោះស្រាយបញ្ចប់វិវាទការងារនេះ ដើម្បីផលប្រយោជន៍ពិតប្រាកដរបស់កូដករ ជៀសជាងការធ្វើកូដកម្មក្នុងរបៀបវារៈផ្សេង និងតាមការរៀបចំដោយក្រុមណាមួយ ដែលយកកូដករជាឧបករណ៍របស់គេ។
៣. ក្រសួងការងារ, ក្រុមប្រឹក្សាអាជ្ញាកណ្តាល, និងគណៈកម្មការសម្រាប់ដោះស្រាយបញ្ហាកូដកម្ម បាតុកម្មនៅក្រុមមុខសញ្ញា (គ.ក.ប.) បានបំពេញតួនាទីតាមសមត្ថកិច្ចរបស់ខ្លួនត្រឹមត្រូវតាមច្បាប់។ យោងតាមនីតិវិធីច្បាប់ ប្រសិនបើវិវាទការងារនេះមិនអាចស្វែងរកដំណោះស្រាយបានដោយការផ្សះផ្សា នីតិវិធីបន្ទាប់គឺ ភាគីណាមួយអាចប្តឹងទៅតុលាការដើម្បីរកដំណោះស្រាយចុងក្រោយ ៕
