ឯកឧត្តម កែ គឹមយ៉ាន ចុះពិនិត្យវឌ្ឍនភាពគម្រោងប្រព័ន្ធធារាសាស្ត្រនិងកាត់បន្ថយទឹកជំនន់(គម្រោងកូរ៉េ)
ភ្នំពេញ៖ នាថ្ងៃទី០៥ ខែមេសា ឆ្នាំ២០២៤ ឯកឧត្តម កែ កឹមយ៉ាន អ្នកតំណាងរាស្ត្រមណ្ឌលខេត្តបន្ទាយមានជ័យ និងជាឧត្តមប្រឹក្សាផ្ទាល់ព្រះមហាក្សត្រ អមដំណើរដោយឯកឧត្តម អស់លោកជាក្រុមការងារ ប្រធានមន្ទីរធនធានទឹកនិងឧតុនិយមខេត្ត និងអាជ្ញាធរមូលដ្ឋានបានចុះពិនិត្យអំពីវឌ្ឍនៈភាពនៃគម្រោងអភិវឌ្ឍន៍ប្រព័ន្ធធារាសាស្ត្រ និងកាត់បន្ថយទឹកជំនន់ ក្នុងខេត្តបន្ទាយមានជ័យ(គម្រោងកូរ៉េ)។
គម្រោងអភិវឌ្ឍន៍ប្រព័ន្ធធារាសាស្ត្រ ដែលឯកឧត្តម កែ គឹមយ៉ាន និងក្រុមការងារចុះពិនិត្យនោះរួមមាន៖
១.អាងទឹកកន្សែង ស្ថិតក្នុងឃុំសឹង្ហ ស្រុកអូរជ្រៅ-ភ្លឺទំនប់អាងប្រវែង ៧គម ១២០ម, ផ្ទៃអាងមានទំហំ ៨៣០ហិកតា, បរិមាណទឹក ២២លាន ៨០០ពាន់ម៉ែតគូប, លទ្ធភាពស្រោចស្រពស្រូវវស្សា ៦.៣៦០ហិកតា និងលទ្ធភាពស្រោចស្រពស្រូវប្រាំង ១.៣១០ហិកតា។
២.អាងទឹកពង្រ ស្ថិតក្នុងសង្កាត់និមិត្ត ក្រុងប៉ោយប៉ែត ភ្លឺទំនប់អាង ប្រវែង ៦គម ២៣ម, ផ្ទៃអាងមានទំហំ ៤៥៦ហិកតា, បរិមាណទឹក ៧លាន ៩០០ពាន់ម៉ែត្រគូប, លទ្ធភាពស្រោចស្រពស្រូវវស្សាបាន ២.៦០០ហិកតា និងលទ្ធភាពស្រោចស្រពស្រូវប្រាំងបាន ២២០ហិកតា។
៣.អាងទឹកវាំងហែង ស្ថិតក្នុងឃុំទួលពង្រ ស្រុកម៉ាឡៃ-ភ្លឺទំនប់អាងប្រវែង ៧គម ០១ម, ផ្ទៃអាងមានទំហំ ៣៤០ហិកតា, បរិមាណទឹក ៦លាន ៩០០ពាន់ម៉ែត្រគូប, លទ្ធភាពស្រោចស្រោពស្រូវវស្សាបាន ២៥៧០ហិកតា និងលទ្ធភាពស្រោចស្រពស្រូវប្រាំងបាន ២២០ហិកតា។
មកដល់ពេលនេះ គម្រោងទាំងមូលដែលមានទំនប់អាងទឹកប្រវែងសរុប២០គម៣៦ម និងស្តារប្រឡាយមេ៦ខ្សែមានប្រវែងសរុប ៨៧គម ៦០ ក្នុងនោះមានចាក់បេតុងប្រវែង ៤០គម ១៦០ និងសាងសង់សំណង់សិល្បៈការចំនួន២០៧កន្លែង លទ្ធផលកំពុងអនុវត្ត និងសម្រេចបានចំនួន ៤០.៩០% ធៀបទៅនឹងទំហំការងារ នៃគម្រោងទាំងមូល។
ក្នុងរសៀលថ្ងៃដដែលនេះ ឯកឧត្តម កែ គឹមយ៉ាន និងក្រុមការងារព្រមទាំងអាជ្ញាធរមូលដ្ឋានបានចូលថ្វាយបង្គំព្រះសង្ឃនៅវត្តដុងអារញ្ញ និងបានបន្តដំណើរទៅចូលរួមជាអធិបតីក្នុងពិធីពិសារបាយសាមគ្គីអបអរសាទរពិធីបុណ្យចូលឆ្នាំប្រពៃណីជាតិខ្មែរ ឆ្នាំរោង ឆស័ក ព.ស.២៥៦៧ នៅក្រុងប៉ោយប៉ែត ប្រកបដោយភាពស្និទស្នាលកក់ក្តៅក្រៃលែង ៕
