សម្តេចធិបតី ហ៊ុន ម៉ាណែត៖ កុំរើសអ្នកជំនាញអាយធី ឱ្យធ្វើការផ្នែកគណនេយ្យ

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកទឹកចិត្តដល់ក្រសួង-ស្ថាប័នថ្នាក់ជាតិ និងស្ថាប័នថ្នាក់ក្រោមជាតិ គប្បីប្រើប្រាស់មន្ត្រីដែលមានស្រាប់ឱ្យអស់លទ្ធភាព ប្រសើរជាងការរើសថ្មី ម្យ៉ាងទៀតកុំជ្រើសរើសអ្នកជំនាញអាយធីឱ្យធ្វើការងារផ្នែកគណនេយ្យ ។

ក្នុងឱកាសអញ្ជើញបិទសន្និបាតបូកសរុបការងារឆ្នាំ២០២៣ និងលើកទិសដៅបន្តឆ្នាំ២០២៤ របស់ក្រសួងមុខងារសាធារណៈ នាថ្ងៃទី៤ ខែមេសា ឆ្នាំ២០២៤ សម្ដេចធិបតី បញ្ជាក់ថាថា «កុំយកអ្នកអាយធី ឱ្យធ្វើការផ្នែកគណនេយ្យ ឬខុសជំនាញរបស់ពួកគេ»។

សម្ដេចបានបន្តថា ការស្នើមន្ត្រីសម្រាប់បំពេញការងារនៅថ្នាក់ក្រោមជាតិ ត្រូវតែធានាគោលដៅសម្រាប់ថ្នាក់ក្រោមជាតិ ហើយរក្សាឱ្យនៅធ្វើការងារជាប់លាប់។ រីឯនៅក្នុងក្រសួង ស្ថាប័នថ្នាក់ជាតិក៏ដូចគ្នាដែរ ចាំបាច់ត្រូវមានតម្រូវការច្បាស់លាស់ មានគោលដៅច្បាស់លាស់ មុននឹងស្នើសុំជ្រើសរើសមន្ត្រីបន្ថែម ដូច្នេះត្រូវវិភាគលើតម្រូវការជាមុន ប្រសិនបើគ្មានការវិភាគ និងទឡ្ហីករណ៍ច្បាស់លាស់ទេ គឺសម្ដេចមិនអនុញ្ញាតនោះឡើយ។

សម្ដេចធិបតី បានណែនាំឱ្យស្ថាប័នរដ្ឋនានាត្រូវប្រើប្រាស់មន្ត្រីដែលមានស្រាប់ឱ្យអស់លទ្ធភាព មុននឹងសម្រេចចិត្តជ្រើសរើសមន្ត្រីថ្មី ទាំងមន្ត្រីរាជការពេញសិទ្ធិ មន្ត្រីកិច្ចសន្យា មន្ត្រីបច្ចេកទេសជាដើម ៕