អាមេរិកបង្កើនវត្តមានយោធានៅក្នុងប្រទេសវ៉េណេស៊ុយអេឡា ដើម្បីគាំទ្រដល់ប្រតិបត្តិការជួយសង្រ្គោះ ក្នុងគ្រោះរញ្ជួយដី
បរទេស៖ បើតាមការចេញផ្សាយដោយទីភ្នាក់ងារសារព័ត៌មាន Reuters នាយឧត្តមសេនីយ៍អាមេរិក លោក Francis Donovan បានឱ្យដឹងថាសហរដ្ឋអាមេរិកបានបង្កើនវត្តមានយោធាទាំងនៅក្នុង និងជុំវិញប្រទេសវ៉េណេស៊ុយអេឡា ដើម្បីគាំទ្រដល់ប្រតិបត្តិការជួយសង្រ្គោះជាមួយការបញ្ជូនបុគ្គលិកយោធា ៩០០នាក់ចូលទៅក្នុងវ៉េណេស៊ុយអេឡា និងជិត ៨០០នាក់ទៅកាន់ដែនដី Puerto Rico និង Curacao។
លោក Francis Donovan ជាមេបញ្ជាការនៃទីបញ្ជាការភូមិភាគខាងត្បូងរបស់សហរដ្ឋអាមេរិកបានប្រាប់ Reuters ថាកងកម្លាំងអាមេរិកបានចូលរួមក្នុងប្រតិបត្តិការតាមស្វែងរក និងជួយសង្រ្គោះ ព្រមទាំងជួយបើកចំហអាកាសយានដ្ឋាន ក៏ដូចជាផ្ដល់ការគាំទ្រទាំងតាមផ្លូវអាកាស និងផ្លូវទឹកដើម្បីសម្រួលដល់ការផ្ដល់ជំនួយមនុស្សធម៌ បន្ទាប់ពីវ៉េណេស៊ុយអេឡា រងការវាយប្រហារពីគ្រោះរញ្ជួយដីដ៏ប្រល័យមួយកាលពីសប្ដាហ៍មុន។
លោកបន្ថែមទៀតថា យោធាអាមេរិកក៏បានដាក់ពង្រាយដ្រូន MQ-9 Reaper ពី៤ ទៅ៥គ្រឿងផងដែរ នៅលើដែនអាកាសនៃប្រទេសវ៉េណេស៊ុយអេឡាដើម្បីផ្ដល់រូបភាពជាក់លាក់ទៅឱ្យអាជ្ញាធរវ៉េណេស៊ុយអេឡា។
គួរបញ្ជាក់ថា គ្រោះរញ្ជួយដីកម្រិតធ្ងន់ចំនួន២ កម្រិត ៧,២ និង៧,៥រ៉ិចទ័របានវាយប្រហារលើវ៉េណេស៊ុយអេឡាកាលពីថ្ងៃពុធសប្ដាហ៍មុនដោយបណ្ដាលឱ្យចំនួនអ្នកស្លាប់បានកើនដល់ ១៩៤៣នាក់ និងច្រើនជាង ១០ ០០០នាក់បានរងរបួស៕
