ពលរដ្ឋ នៅតែសង្ឃឹមថា អាជ្ញាធរនឹងរៀបចំទូកបុរាណ ឲ្យភ្ញៀវជិះលេងកម្សាន្តតាមមាត់ស្ទឹងសៀមរាប ដើម្បីជាផ្នែកមួយនៃការស្រូបទាញទេសចរជាតិ និងអន្តរជាតិ

ភ្នំពេញ៖ បងប្អូនប្រជាពលរដ្ឋ នៅតែមានសង្ឃឹមយ៉ាងមុតមាំថា អាជ្ញាធរនឹងគិតគូររៀបចំទូកបុរាណសម្រាប់ឱ្យភ្ញៀវទេសចរជិះលេងកម្សាន្តនៅតាមបណ្ដោយមាត់ស្ទឹងសៀមរាប ដើម្បីជាផ្នែកមួយនៃការស្រូបទាញភ្ញៀវទេសចរជាតិ និងអន្តរជាតិ ឱ្យមកលេងកម្សាន្តក្នុងខេត្តដែលសម្បូរទៅដោយវប្បធម៌ដ៏ចំណាស់ ។

តាមរយៈរូបភាពប៉ុន្មានសន្លឹកដែលថ្នាក់ដឹកនាំក្រសួងទេសចរណ៍ ដឹកនាំគណៈប្រតិភូ រួមជាមួយបរវកញ្ញាពិភពលោក ជិះទូកបុរាណខ្មែរក្នុងពិធីលែងត្រីតាមដងស្ទឹងសៀមរាបនាឱកាសបុណ្យទន្លេ បានទាក់យកចំណាប់អារម្មណ៍ប្រជាពលរដ្ឋខ្មែរ និងភ្ញៀវបរទេស ។

បើតាមការលើកឡើងរបស់ប្រជាពលរដ្ឋមួយចំនួន ក្រោយបានឃើញ ឯកឧត្តម សុខ សូកេន រដ្ឋមន្ត្រីក្រសួងទេសចរណ៍ ជិះទូកបុរាណក្នុងឱកាសបុណ្យទន្លេ អមជាមួយបរវកញ្ញាជាង៤០រូបមកពីជុំវិញពិភពលោក ធ្វើឱ្យពួកគាត់គិតស្រម៉ៃចង់ឱ្យមានទូកប្រភេទនេះ រង់ចាំទទួលដឹកភ្ញៀវកម្សាន្តគយគន់ទិដ្ឋភាពទូទៅនាពេលសុរិយារៀបលិចតាមបណ្តោយមាត់ស្ទឹកសៀមរាប។

ទោះជាយ៉ាងនេះក្ដី ពលរដ្ឋទាំងនោះក៏បានលើកឡើងបន្ថែមថា ការចង់ឃើញចង់បានចេះតែមានហើយសម្រាប់ពួកគាត់ ក៏ប៉ុន្តែជាការសម្គាស់ ទាល់តែមានពិធីបុណ្យធំៗដូចជាសង្ក្រាន្តអង្គរ, បុណ្យអុំទូក និងបុណ្យចូលឆ្នាំជាដើម ទើបលេចវត្តមានទូកបុរាណទាំងនោះ ដាក់ជួលឱ្យភ្ញៀវទេសចរជិះកម្សាន្តលេង ខណៈក្រោយចប់ពិធីបុណ្យ ទូកទាំងនោះត្រូវអាជ្ញាធររៀបចំទុកដាក់វិញ។

ប្រជាពលរដ្ឋនៅតែមានសង្ឃឹមយ៉ាងមុតមាំថា អាជ្ញាធរនឹងគិតគូររៀបចំទូកបុរាណសម្រាប់ឱ្យភ្ញៀវទេសចរជិះលេងកម្សាន្តនៅតាមបណ្ដោយមាត់ស្ទឹងសៀមរាប ដើម្បីជាផ្នែកមួយនៃការស្រូបទាញភ្ញៀវទេសចរជាតិ និងអន្តរជាតិ ឱ្យមកលេងកម្សាន្តក្នុងខេត្តដែលសម្បូរទៅដោយវប្បធម៌ដ៏ចំណាស់ និងមានកិត្តិសព្ទល្បីខ្ទរខ្ទាពេញតំបន់អាស៊ី និងបានឆក់យកបេះដូងភ្ញៀវទេសចរឱ្យចូលមកទស្សនាប្រាសាទបុរាណដ៏អស្ចារ្យក្នុង១ឆ្នាំៗជាច្រើនលាននាក់។

សូមជម្រាបថា ការជិះទូកកម្សាន្តបែបបុរាណ្យក្នុងខេត្តសៀមរាប បច្ចុប្បន្នក៏មានដូចគ្នានៅតាមដងទន្លេអុំ ដែលគេឱ្យឈ្មោះថា«គង្គាអង្គរ» ខណៈអាជីវកម្មជួលទូកនេះ នៅតែជាទីចាប់អារម្មណ៍ខ្លាំងពីសំណាក់ភ្ញៀវទេសចរជាតិ និងអន្តរជាតិ។ ប្រសិនបើអ្នកទេសចរចង់ជិះទូកកម្សាន្តនៅទន្លេអុំ គឺគ្រាន់តែធ្វើដំណើរនៅលើកំណាត់ផ្លូវមុខប្រាសាទអង្គរវត្តឆ្ពោះទៅខាងជើងដល់ខ្លោងទ្វារខាងត្បូងរបស់ប្រាសាទបាយ័ន នោះយើងនឹងបានឃើញរូបសំណាក់យក្សទាញព្រ័ត្រនៅលើស្ពានចូលបរិវេណប្រាសាទអង្គរធំ ហើយក្រឡេកមើលខាងឆ្វេងដៃ យើងនឹងបានឃើញផ្ទៃទឹកព័ទ្ធជុំវិញដោយកំពែងខាងក្រៅប្រាសាទអង្គរធំ ទីនោះហើយគឺជាទន្លេអុំ។ នៅទីនោះ មានទូកចែវដោយដៃ ដែលមានអ្នកចែវខ្លះស្លៀកសម្លៀកបំពាក់ក្នុងសម័យអង្គរ រង់ចាំភ្ញៀវទេសចររួចជាស្រេចដើម្បីជូនភ្ញៀវទេសចរទស្សនាកម្សាន្ត។

គួររំឭកថា ទូកត្រូវបានគេចាត់ទុកថា មានសារសំខាន់ខ្លាំងណាស់តាំងពីសម័យបុរាណកាលមក ដោយសារល្បឿននៃការធ្វើដំណើរ និងភូមិសាស្ត្រនៃប្រទេសដែលសម្បូរទៅដោយផ្លូវទឹកខ្វាត់ខ្វែងផងនោះ ជាពិសេសទូក-ងជាញឹកញាប់ត្រូវបានគេប្រើប្រាស់ក្នុងកិច្ចការសង្គ្រាម រាប់ពីសម័យមុនអង្គររហូតដល់សម័យកណ្តាល ៕