តំបន់ប្រតិបត្តិការសឹករងសៀមរាប ចុះហត្ថាលេខាផ្ទេរប្រគល់អដ្ឋិធាតុ កងទ័ពស្ម័ក្រចិត្តវៀតណាមពលីជីវិត ក្នុងភូមិសាស្ត្រខេត្តសៀមរាប ដើម្បីធ្វើមាតុភូមិនិវត្តន៏ ទៅវៀតណាមវិញ

ភ្នំពេញ៖ នាថ្ងៃទី២១ ខែមករា ឆ្នាំ២០២៤ នៅទីបញ្ជាការតំបន់ប្រតិបត្តិការសឹករងសៀមរាប បានប្រារព្ធពិធីបង្សុកូល និងផ្ទេរ ប្រគល់អដ្ឋិធាតុកងទ័ពស្ម័គ្រចិត្តនិងជំនាញការវៀតណាម ដែលបានពលីជីវិត នៅក្នុងសម័យសង្រ្គាម ក្នុងភូមិសាស្រ្តខេត្តសៀមរាប ក្រោមអធិបតីភាព ឯកឧត្ដម ពិន ប្រាកដ អភិបាលរងនៃគណៈអភិបាលខេត្តសៀមរាប
ឧត្តមសេនីយ៍ទោ ស៊ិន ភាត់ មេបញ្ជាការ តំបន់ប្រតិបត្តិការសឹករងសៀមរាប កងកម្លាំងទំាងពីរប្រភេទនិងលោកវរសេនីយ៍ឯក ង្វៀន ឌុកផាន ប្រធានក្រុមK71 ។

ក្នុងពេលនោះផងដែល អដ្ឋិធាតុកងទ័ពស្ម័គ្រចិត្ត និងជំនាញការ វៀតណាម ដែលជីករុករកបានក្នុងភូមិសាស្រ្តខេត្តសៀមរាបបានចំនួន ០៨អដ្ឋិធាតុ ដើម្បីធ្វើមាតុភូមិនិវត្តន៍ទៅប្រទេសវៀតណាម វគ្គ១ ដំណាក់កាលទី២៣ (រដូវប្រាំង ឆ្នាំ២០២៣-២០២៤)នាពេលខាងមុខនេះ ។

លោកវរសេនីយ៍ឯក ង្វៀន ឌុកផាន ប្រធានក្រុមK71 បានថ្លែងអំណរគុណចំពោះរាជរដ្ឋាភិបាលកម្ពុជា អាជ្ញាធរដែន ដីគ្រប់លំដាប់ថ្នាក់ កងកម្លាំងប្រដាប់អាវុធគ្រប់ប្រភេទ និងប្រជាពលរដ្ឋ ដែលបានសហការល្អក្នុងការជីករុករកអដ្ឋិធាតុកងទ័ពស្ម័គ្រចិត្តវៀតណាម ដើម្បីបានវិលត្រឡប់ទៅកាន់មាតុប្រទេសវិញ និងបានអរគុណ ដល់ក្រុមការងារ តំបន់ប្រតិបត្តិការសឹករងសៀមរាប ដែលតែងតែជួយសំរួល ការងារជូនដល់ក្រុមការងារ K71 របស់វៀតណាមផងដែរ ។

ជាចុងក្រោយឯកឧត្តម ពិន ប្រាកដ អភិបាលរងនៃគណៈអភិបាលខេត្តសៀមរាប មានប្រសាសន៍ថា នឹងបន្តជួយសម្រួលក្នុងការជីករុករកអដ្ឋិធាតុ កងទ័ពស្ម័គ្រចិត្ត ជំនាញការ វៀតណាម និងបន្តសហការយ៉ាងយកចិត្តទុកដាក់ ផ្សព្វផ្សាយដល់បងប្អូនប្រជាពលរដ្ឋដែលបានស្គាល់ទីតាំងកប់សាកសព រាយការណ៍ជូនអាជ្ញាធរ ដើម្បីងាយស្រួលក្នុងការជីករុករក និងធ្វើការវិលត្រឡប់ទៅមាតុប្រទេសវិញប្រកបដោយសុខសុវត្តិភាព ៕