ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា វិមានឈ្នះឈ្នះគឺសាងសង់ឡើងដើម្បីខ្មែរទាំងអស់គ្នា និងជានិមិត្តរូប នៃសន្តិភាព នៅលើទឹកដីដ៏បវររបស់យើង ហើយយើងប្តេជ្ញាថែរក្សាសន្តិភាពនេះបន្តទៅរៀងរហូតដើម្បីយើងធានានូវការអភិវឌ្ឍនៃប្រទេសជាតិ។
សម្តេចធិបតី បានថ្លែងយ៉ាងដូច្នេះក្នុងឱកាសដែលសម្តេច បានអញ្ជើញជាអធិបតី ក្នុងពិធីអបអរសាទរ ខួបលើកទី២៥ នៃការបញ្ចប់សង្គ្រាមស៊ីវិលនៅកម្ពុជា និងការអនុវត្តប្រកបដោយជោគជ័យ នយោបាយ ឈ្នះ ឈ្នះ និងខួប ៥ឆ្នាំ នៃការកសាងវិមានឈ្នះ ឈ្នះ នាព្រឹកថ្ងៃទី២៩ ខែធ្នូ ឆ្នាំ២០២៣នេះ។
សម្តេចធិបតី បានបន្តថា នយោបាយឈ្នះឈ្នះគឺកើតចេញពីការដាក់ចេញនូវគោលនយោបាយដ៏ឆ្លាតវៃ និងប្រាកដប្រជារបស់សម្ដេចតេជោ ហ៊ុន សែន ដែលជាស្ថាបនិក និងជារដ្ឋបុរសឯកដោយមានការចូលរួមដោយស្មោះត្រង់របស់ប្រតិបត្តិករស្នូលទាំងអស់ និងប្រជាពលរដ្ឋផងដែរ។
សម្តេចធិបតី នាយករដ្ឋមន្ត្រី បានបន្ថែមទៀតថា បើយើងនិយាយពីផល គឺផលបានទាំងអស់គ្នាផលរួមទាំងអ្នកដែលរិះគន់ អ្នកដែលមិនទុកចិត្តអ្នកដែលមិនជឿទៅលើនយោបាយឈ្នះឈ្នះ និងសង្ស័យ ប៉ុន្តែអ្នកទាំងនោះកំពុងតែបានផលពីសន្តិភាព ការរីកចម្រើនដោយនយោបាយឈ្នះឈ្នះ អញ្ចឹងសួរថាវិមានឈ្នះឈ្នះសាងសង់ដើម្បីជានិមិត្តរូបនៃខ្មែរទាំងអស់គ្នាសង់ជានិមិត្តរូប នៃសន្តិភាព ហើយសួរថាខ្មែរណាដែលមិនចង់បានសន្តិភាព យើងទាំងអស់គ្នាប្រាកដចង់បានការបញ្ចប់សង្គ្រាម ៕
