សម្តេចធិបតី៖ កម្ពុជាមិនមែនជាប្រទេសអ្នកមានដូចអាមេរិក តែប្រទេសនេះមានរាជរដ្ឋាភិបាលដឹកនាំ ដែលមិនអត់ចិត្តទេ និងមិនទុកឲ្យពលរដ្ឋចោលទេ

ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា កម្ពុជាមិនមែនជាប្រទេសអ្នកមាន ដូចសហរដ្ឋអាមេរិក តែប្រទេសនេះមានថ្នាក់ដឹកនាំ មានរាជរដ្ឋាភិបាលដឹកនាំ ដែលមិនអត់ចិត្តទេ ខិតខំដើម្បីប្រែក្លាយឲ្យលឿន មិនទុកឲ្យប្រជាពលរដ្ឋចោលទេ ។

ក្នុងឱកាសអញ្ជើញសំណេះសំណាល ជាមួយប្រជាពលរដ្ឋរស់នៅភូមិរុនតាឯក និងពាក់ស្នែងជិត ៣ពាន់នាក់ នៅថ្ងៃទី៨ ខែធ្នូ ឆ្នាំ២០២៣ សម្តេចធិបតី ហ៊ុន ម៉ាណែត បញ្ជាក់ថា «កន្លងទៅខ្ញុំឃើញអង្គការអន្តរជាតិមួយចំនួន ឆ្លៀតឱកាស អ្នកនយោបាយមួយចំនួនឆ្លៀតឱកាស វាយប្រហាររាជរដ្ឋាភិបាលថា យកប្រជាជនមកបោះចោល។ ខ្ញុំថាអ្នកនិយាយហ្នឹង គួរចុះមកមើលខ្លួនឯង ហើយមើលនៅក្នុងរយៈពេល ១ឆ្នាំនេះ ប្រទេសកម្ពុជាមិនមែនជាប្រទេសអ្នកមានដូចសហរដ្ឋអាមេរិក តែប្រទេសនេះមានថ្នាក់ដឹកនាំ មានរាជរដ្ឋាភិបាលដឹកនាំ ដែលមិនអត់ចិត្តទេ ខិតខំ ដើម្បីប្រែក្លាយឲ្យលឿន មិនទុកឲ្យប្រជាពលរដ្ឋចោលទេ យើងឈានជាជំហានៗ ដើម្បីផ្តល់សេវា និងហេដ្ឋារចនាសម្ព័ន្ធ។ អញ្ចឹង យើងត្រូវបន្តធ្វើទៀត មិនអាចទុកចោលទេ»។

សម្តេចធិបតី ថ្លែងថា ការរួមគ្នាអភិវឌ្ឍ និងអភិរក្ស ដំណាលពេលគ្នា គឺដើម្បីប្រទេសជាតិយើងកាន់តែរីកចម្រើន និងប្រជាពលរដ្ឋមានជីវភាពកាន់តែធូរធា។
សម្តេចធិបតីថា ប្រាសាទនៅរមណីយដ្ឋានអង្គរដែលមានផ្ទៃដី ៤០១គីឡូម៉ែត្រក្រឡា ត្រូវតែរួមគ្នាថែរក្សា ព្រោះមិនមែនខូចហើយ ធ្វើឡើងវិញបាននោះឡើយ។ អាយុពលរដ្ឋត្រឹម ១៥០ឆ្នាំ គឺរីករាយពេកហើយ តែព្រលឹងជាតិ និងប្រាសាទរបស់ខ្មែរ ត្រូវថែរក្សាឱ្យបានរាប់ពាន់ឆ្នាំទៅមុខទៀត។

សម្តេចធិបតី បន្ថែមថា រមណីយដ្ឋានអង្គរនឹងត្រូវដកចេញពីបញ្ជីសម្បត្តិបេតិកភណ្ឌពិភពលោក​ បើរក្សាមិនបានតាមលក្ខខណ្ឌកំណត់របស់អង្គការយូណេស្កូ។ សម្តេចធិបតី បានចោទសួរថា តើវាសមដែរទេ ប្រាសាទដូនតាបន្សល់ទុករាប់ពាន់ឆ្នាំហើយ បែរជាយើងខ្មែរជំនាន់ក្រោយមិនអាចរួមគ្នាថែរក្សាតម្លៃប្រាសាទដូនបាននោះ?
សម្តេចធិបតីថ្លែងថា រវាងប្រាសាទ និងប្រជាពលរដ្ឋ គឺរាជរដ្ឋាភិបាលជ្រើសយកទាំងពីរ។ ការរៀបចំហេដ្ឋារចនាសម្ព័ន្ធ និងប្រព័ន្ធរដ្ឋបាលនៅរុនតាឯក ជាទិសដៅប្រែក្លាយតំបន់នេះទៅជាក្រុង។

សម្តេចធិបតី ក៏បានណែនាំឱ្យក្រសួងពាក់ព័ន្ធជាពិសេសក្រសួងកសិកម្ម និងទេសចរណ៍ គិតគូររៀបចំលើកកម្ពស់សេដ្ឋកិច្ចជូនពលរដ្ឋនៅរុនតាឯក។ សម្តេចធិបតី ថែមទាំងណែនាំឱ្យក្រសួងការងារ និងបណ្តុះបណ្តាលវិជ្ជាជីវៈ គិតគូរផ្តល់ការបណ្តុះបណ្តាលវិជ្ជាជីវៈជូនពលរដ្ឋនៅរុនតាឯក ៕