ឯកឧត្តម ហេង រតនា អញ្ជើញបិទវគ្គហ្វឹកហ្វឺន “ប្រតិបត្តិការ និងការថែទាំគ្រឿងចក្រកាត់គុម្ពោតព្រៃ” ដល់សិក្ខាកាមចំនួន៨នាក់មកពីប្រទេសកូឡុំប៊ី

ភ្នំពេញ៖ ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកមជ្ឈមណ្ឌលសកម្មភាពកំចាត់មីនកម្ពុជា (CMAC) រួមជាមួយលោក Mr. Kazuki Takeuchi ប្រធានអង្គការសម្ព័ន្ធសហប្រតិបត្តិការអន្តរជាតិជប៉ុន (JICS) នារសៀលថ្ងៃចន្ទ ទី៤ ខែធ្នូ ឆ្នាំ២០២៣ បានអញ្ជើញជាអធិបតីភាពក្នុងពិធីបិទវគ្គហ្វឹកហ្វឺន “ប្រតិបត្តិការ និងការថែទាំគ្រឿងចក្រកាត់គុម្ពោតព្រៃ” ដល់សិក្ខាកាមចំនួន៨នាក់មកពីប្រទេសកូឡុំប៊ី ដែលមានរយៈពេល៥សប្តាហ៍ ចាប់ពីថ្ងៃទី៣០ ខែតុលាដល់ថ្ងៃទី ០៥ ខែធ្នូ ឆ្នាំ២០២៣ នៅបញ្ជាការស៊ីម៉ាក់ភ្នំពេញ។

វគ្គហ្វឹកហ្វឺននេះប្រព្រឹត្តទៅក្នុងខេត្តសៀមរាប ដោយសិក្សាទៅលើទ្រឹស្តីរយៈពេលមួយសប្តាហ៍ក្នុងថ្នាក់ និងអនុវត្តធ្វើតេស្តជាក់ស្តែងនៅទីវាលរយៈពេលជាងបីសប្តាហ៍។ ក្នុងកំឡុងពេលហ្វឹកហ្វឺននេះ សិក្ខាកាមមានឱកាសចុះទស្សនៈកិច្ចសិក្សានៅចម្ការមីនដែលមានការប្រើប្រាស់គ្រឿងចក្រស្រាប់។

ជាមួយគ្នានេះដែរ ក្រៅពីការទទួលបាននូវការហ្វឹកហ្វឺន សិក្ខាកាមក៏បានរៀនសូត្រអំពីវប្បធម៌ អរិយធម៌ ប្រពៃណីទំនៀមទំលាប់ និងបានភ្លក្សនូវរសជាតិម្ហូបខ្មែរជាដើម ជាពិសេសបានស្គាល់និងទស្សនា ប្រាងប្រាសាទរបស់ខ្មែរ និងតំបន់ទេសចរណ៍ជាច្រើនទៀតដូចជាឆ្នេរសមុទ្រក្នុងខេត្តព្រះសីហនុ និងរាជជានីភ្នំពេញជាដើម។

ក្រោយបញ្ចប់វគ្គហ្វឹកហ្វឺនសិក្ខាកាមទាំងអស់បានទៅពិនិត្យ និងសិក្សាស្វែងយល់បន្ថែមពីរបៀបជួលជុលគ្រឿងចក្រនៅរោងជាងដោយផ្ទាល់និងបានចុះធ្វើទស្សកិច្ចនៅ ចម្ការមីនដែលមានការរួមបញ្ចូលនូវកម្លាំងប្រតិបត្តិការខុសៗក្នុងចម្ការមីនតែមួយ រួចបន្តដំណើរមកកាន់ខេត្តកំពង់ឆ្នាំង ដើម្បីពិនិត្យមើលទីតាំងបង្កាត់ និងបង្ហាត់សុនខ និងទីតាំងកាត់បន្សាបគ្រាប់យុទ្ធភណ្ឌមិនទាន់ផ្ទុះ ៕