អគ្គលេខាធិការនៃសភាអាស៊ី (APA) កោតសរសើរចំពោះភាពសកម្មរបស់សភាកម្ពុជា នៅក្នុងវេទិកាអន្តរសភាក្នុងតំបន់ និងសកល
ភ្នំពេញ៖ ឯកឧត្តមបណ្ឌិត ម៉ូហាំម៉ាត់ រ៉េហ្សា ម៉ាជីឌី អគ្គលេខាធិការនៃសភាអាស៊ី (APA) កាលពីរសៀលថ្ងៃទី២៧ ខែវិច្ឆិកា ឆ្នាំ២០២៣ បានចូលជួបសំដែងការគួរសម និងពិភាក្សាការងារ ជាមួយឯកឧត្តម វង សូត អនុប្រធានទី២រដ្ឋសភា និងជាប្រធានគណៈប្រតិភូសភាកម្ពុជា ចូលរួមកិច្ចប្រជុំក្រុមប្រឹក្សាប្រតិបត្តិ APA។
ឯកឧត្តមអគ្គលេខាធិការ APA បានកោតសរសើរចំពោះសភាកម្ពុជា ជាប្រទេសដ៏ស្រស់ស្អាត ព្រមទាំងមានភាពសកម្មយ៉ាងខ្លាំង នៅក្នុងវេទិកាអន្តរសភានានា ជាពិសេសនៅក្នុងក្របខ័ណ្ឌ APA នេះតែម្តង។ ក្នុងន័យនេះ ឯកឧត្តម បានសំណូមពរដល់សភាកម្ពុជា ទទួលធ្វើជាម្ចាស់ផ្ទះរៀបចំកិច្ចប្រជុំគណៈកម្មាធិការអចិន្ត្រៃយ៍កិច្ចការសង្គម និងវប្បធម៌ ក្នុងឆ្នាំ២០២៥ខាងមុខ ដោយកម្ពុជាជាប្រទេមានភាពសម្បូរបែបផ្នែកវប្បធម៌។ ឯកឧត្តម ក៏សង្ឃឹមថា ឯកឧត្តមអនុប្រធានទី២រដ្ឋសភា នឹងអញ្ជើញចូលរួមមហាសន្និបាតAPA លើកទី១៤ ដែលនឹងប្រព្រឹត្តិទៅក្នុងពេលឆាប់ៗខាងមុខនេះ។
ឯកឧត្តមអនុប្រធានទី២រដ្ឋសភា បានកោតសរសើរ ឯកឧត្តម ម៉ូហាំម៉ាត់ រ៉េហ្សា ម៉ាជីឌី អគ្គលេខាធិការ APA ដែលបានចូលរួមចំណែកយ៉ាងសំខាន់ក្នុងការសម្រេចបាននូវចក្ខុវិស័យនិងការងារផ្សេងៗរបស់ APA។ ឯកឧត្តម ក៏បានអរគុណចំពោះអគ្គលេខាធិការ APA ដែលកន្លងមកបានបញ្ជូនអ្នកសង្កេតការណ៍បោះឆ្នោត ទៅកាន់កម្ពុជា ដែលពិតជាបានចូលរួមចំណែកយ៉ាងសំខាន់ ក្នុងភាពជោគជ័យនៃការបោះឆ្នោតនៅកម្ពុជា។
ចំពោះសំណូមពរ ដែលឱ្យកម្ពុជាទទួលធ្វើជាម្ចាស់ផ្ទះរៀបចំកិច្ចប្រជុំគណៈកម្មាធិការអចិន្ត្រៃយ៍កិច្ចការសង្គម និងវប្បធម៌ ឯកឧត្តមអនុប្រធានទី២រដ្ឋសភា សន្យានឹងនាំយកសំណើនេះ គោរពជូនសម្តេចមហារដ្ឋសភាធិបតី ពិនិត្យនិងសម្រេចដ៏ខ្ពង់ខ្ពស់ ៕
