សម្តេចធិបតី ឲ្យគ្រប់ក្រសួងស្ថាប័នរដ្ឋទាំងអស់ ត្រួតពិនិត្យរចនាសម្ព័ន្ធផ្ទៃក្នុងឡើងវិញ ដើម្បីបញ្ចៀសការអនុវត្តតួនាទីភារកិច្ចជាន់គ្នា

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា នៅឆ្នាំ២០២៤ខាងមុខនេះ សម្តេចបានដាក់ចេញគោលដៅកំណែទម្រង់រដ្ឋបាលសាធារណៈ ដោយតម្រូវឱ្យគ្រប់ក្រសួងស្ថាប័នទាំងអស់ ពិនិត្យមើលឡើងវិញ នូវចរនាសម្ព័ន្ធផ្ទៃក្នុង រួមមានការអនុវត្តតួនាទី ភារកិច្ច ធ្វើយ៉ាងណាកុំឱ្យមានការជាន់គ្នា។

ក្នុងឱកាសអញ្ជើញ ប្រកាសដាក់ឱ្យអនុវត្តកម្មវិធី​នយោបាយអាទិភាព ពាក់ព័ន្ធវិស័យកសិកម្ម នាថ្ងៃទី២០ ខែវិច្ឆិកា សម្តេចធិបតីបានបញ្ជាក់ថា «ការសម្រួចជាមួយគ្នាឱ្យមេបញ្ជាការរួម គឺសំខាន់ តែមានមេទ័ពច្រើនពិបាក កិច្ចការសំខាន់ត្រូវពង្រឹងយន្តការរបស់យើង គឺស្ថាប័នថ្នាក់ជាតិថ្នាក់ក្រោមជាតិធ្វើយ៉ាងឱ្យមានប្រសិទ្ធភាព។ ដៃគូតែមួយ ច្រកចេញចូលតែមួយ ទៅនិយាយជាមួយតែមួយ វិស័យឯកជនក៏មានតំណាងតែមួយ កសិករក៏មានសហគមន៍ រដ្ឋាភិបាលក៏មានតំណាងតែមួយ ដែលធ្វើការរួមគ្នាសម្របសម្រួលគ្នា ដាក់ចេញទិសដៅតែមួយ»។

សម្តេចបន្ថែមថា «បន្តិចទៀតអាណិត្តថ្មីនេះ នៅឆ្នាំ២០២៤ គឺខ្ញុំដាក់គោលដៅកំណែទម្រង់រដ្ឋបាលសាធារណៈនេះ គឺគ្រប់ក្រសួងទាំងអស់ត្រូវពិនិត្យឡើងវិញ រចនាសម្ព័ន្ធផ្ទៃក្នុង ពិនិត្យតួនាទីភារកិច្ច ព្រោះកន្លែងខ្លះអាចជាន់គ្នា ឧទាហរណ៍ក្រសួងកសិកម្ម នាយកដ្ឋានស្រាវជ្រាវអាចជាន់គ្នាជាមួយ CARDI (វិទ្យាស្ថាន​ស្រាវជ្រាវ និង​អភិវឌ្ឍន៍​កសិកម្ម​កម្ពុជា) យើងពង្រឹងមួយណាទុកមួយណា តួនាទីយ៉ាងម៉េច? ឧទាហរណ៍ ធនធានទឹក អភិវឌ្ឍន៍ជនបទ ជាន់គ្នាយ៉ាងម៉េច? រ៉ែ និងថាមពល និងធនធានទឹក នរណាគេគ្រប់គ្រងខ្សាច់ ? ពេលខ្លះត្រូវមើលបញ្ហានេះឡើងវិញ» ៕