ឯកឧត្តម ស្វាយ សំអ៊ាង៖ ព្រះរាជពិធីបុណ្យអុំទូក ជាប្រពៃណីទំនៀមទម្លាប់ដ៏ល្អផូរផង់ របស់កម្ពុជា ដែលបុព្វបុរស ចាស់ព្រឹទ្ធាចារ្យគោរព
ភ្នំពេញ៖ ឯកឧត្តម ស្វាយ សំអ៊ាង អភិបាលខេត្តស្ទឹងត្រែង មានប្រសាសន៍ថា ពិតណាស់ ព្រះរាជពិធីបុណ្យអុំទូក បណ្តែតប្រទីប សំពះព្រះខែ គឺជាប្រពៃណីជាតិខ្មែរ ដែលមានតាំងពីយូរលុង ហើយក៏ជាប្រពៃណីទំនៀមទម្លាប់ដ៏ល្អផូរផង់ បញ្ជាក់អំពីប្រពៃណីជាតិខ្មែរ ដែលបុព្វបុរសក៏ដូចជាចាស់ព្រឹទ្ធាចារ្យ របស់យើងបានគោរព និងជំនឿសាសនានេះ តាំងពីដើមរហូតមកដល់ពេលបច្ចុប្បន្ន។
ក្នុងឱកាសអញ្ជើញជាអធិបតីភាព ប្រកាសបើកពិធី ប្រណាំងទូក “ង” ក្នុងខេត្តស្ទឹងត្រែង ដើម្បីចូលរួមអបអរសាទរ ព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ឆ្នាំ២០២៣ នាថ្ងៃទី១៧ ខែវិច្ឆិកា ឆ្នាំ២០២៣ ឯកឧត្តមអភិបាលខេត្ត បានមានប្រសាសន៍ថា ជារៀងរាល់ឆ្នាំយើងតែងតែប្រារព្ធពិធីនេះមិនដែលខកខាន។ ដោយឡែកនៅក្នុងខេត្តស្ទឹងត្រែងរបស់យើងនេះ ការរៀបចំពិធីប្រណាំងទូក ក៏ជាការបង្ហាញអំពីប្រពៃណីទំនៀមទម្លាប់របស់យើងដែលមានតាំងពីយូរណាស់មកហើយ ជាពិសេសដែលរដ្ឋបាលខេត្ត ចាប់អារម្មណ៍បំផុតនោះគឺខេត្តស្ទឹងត្រែងរបស់យើងក៏បានរៀបចំកម្មវិធីនេះជាបន្តបន្ទាប់ជារៀងរាល់ឆ្នាំមក។
ឯកឧត្ដមបន្តថា ប៉ុន្តែកម្មវិធីប្រណាំងទូកនេះ ក៏ត្រូវបានអាក់ខានវិញរយៈពេលជាង៣ឆ្នាំរួចមកហើយទាំងថ្នាក់ជាតិ និងថ្នាក់ក្រោមជាតិ ដោយសារយើងរងនូវផលប៉ះពាល់ដោយសារជំងឺកូវីដ១៩ ដែលបង្កផលប៉ះពាល់ទៅពិភពលោកទាំងមូល ក៏ដូចជាព្រះរាជាណាចក្រកម្ពុជាផងដែរ។
ឯកឧត្តមអភិបាលខេត្ត បានបញ្ជាក់ថា ឆ្នាំនេះក្រោយពេលប្រទេសជាតិរបស់យើងមានសុខសន្តិភាព និងការអភិវឌ្ឍជាបន្តបន្ទាប់មក ជាពិសេសប្រទេសជាតិរបស់យើងបានឆ្លងផុតអំពីផលប៉ះពាល់ជាវិជ្ជមានដោយសារជំងឺកូវីដ១៩។ ហើយរាជរដ្ឋាភិបាលកម្ពុជា នៅក្នុងអាណត្តិទី៧នេះ ក៏បានចាត់តាំងរៀបចំនូវកម្មវិធីបុណ្យប្រពៃណីជាតិរបស់យើងទៅតាមប្រពៃណីទំនៀមទម្លាប់របស់យើងឡើងវិញ ដើម្បីបញ្ជាក់អំពីប្រទេសជាតិយើងមានសុខសន្តិភាព និងការអភិវឌ្ឍ បង្កបរិយាកាសទៅដល់ប្រជាពលរដ្ឋរបស់យើង នៅទូទាំងព្រះរាជាណាចក្រកម្ពុជាទាំងមូលផងដែរ ។
សូមបញ្ជាក់ថា ពិធីប្រណាំងទូក “ង” ក្នុងខេត្តស្ទឹងត្រែង ធ្វើឡើងដើម្បីចូលរួមអបអរសាទរ ព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ឆ្នាំ២០២៣ ហើយពិធីនេះប្រព្រឹត្តទៅ ចាប់ពីថ្ងៃទី១៧-១៨-១៩ ខែវិច្ឆិកា ឆ្នាំ២០២៣ ៕
