គម្រោង ATscale នៅកម្ពុជា គាំទ្ររាជរដ្ឋាភិបាលកម្ពុជា លើសេវាស្ដារលទ្ធភាពពលកម្ម និងឧបករណ៍អវយវៈសិប្បនិម្មិត ដើម្បីជួយអោយជនមានពិការភាព រស់នៅដោយ ឯករាជ្យ

ភ្នំពេញ៖ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល នារសៀលថ្ងៃចន្ទ ៩កើត ខែអស្សុជ ឆ្នាំថោះ បញ្ចស័ក ព.ស ២៥៦៧ ត្រូវនឹងថ្ងៃទី២៣ ខែតុលា ឆ្នាំ២០២៣ បានទទួលជួបជាមួយក្រុមការងារគម្រោង ATscale នៅកម្ពុជា ដឹកនាំដោយលោក Pascal Jeroen Bijleveld នាយកប្រតិបត្តិគម្រោង ATscale នៅទីស្តីការក្រសួងសុខាភិបាល។

ឯកឧត្តមសាស្ត្រាចារ្យរដ្ឋមន្ត្រី បានស្វាគមន៍ និងថ្លែងអំណរគុណដល់ក្រុមការងារគម្រោង ATscale នៅកម្ពុជា ដែលគ្រោងនឹងចូលរួមគាំទ្ររាជរដ្ឋាភិបាលកម្ពុជា លើសេវាស្ដារលទ្ធភាពពលកម្ម និងឧបករណ៍អវយវៈសិប្បនិម្មិត ដូចជាវែនតា ឧបករណ៏ជំនួយការស្តាប់ ដើមី្បជួយអោយជនមានពិការភាព រស់នៅប្រកបដោយសុខភាពល្អ មានផលិតភាព រស់នៅដោយ ឯករាជ្យ មានសេចក្តីថ្លៃថ្នូ និងអាចចូលរួមក្នុងសកម្មភាពអប់រំបណ្តុះបណ្តាល ទីផ្សារការងារ និងសកម្មភាពជីវិតប្រចាំថ្ងៃបានជាប្រក្រតី ដែលគម្រោងនេះគ្រោងនឹងដាក់សម្ពោធដំណើរការនាពេលឆាប់ៗខាងមុខនេះ។

លោក Pascal Jeroen Bijleveld នាយកប្រតិបត្តិគម្រោង ATscale លោកបានជម្រាបថា គម្រោងនេះ ត្រូវបានរៀបចំឡើង ដោយមានការប្រជុំពិភាក្សា ពិគ្រោះយោបល់ជាច្រើនលើក ដឹកនាំដោយក្រុមការងារបច្ចេកទេសអន្តរក្រសួង ដូចជាក្រសួងសង្គមកិច្ច អតីតយុទ្ធជន និងយុវនីតិសម្បទា ក្រសួងសុខាភិបាល ក្រសួងអប់រំ យុវជន និងកីឡា ក្រុមប្រឹក្សាសកម្មភាពជនពិការ និងតំណាងមកពីអង្គការដើម្បីជនពិការ។ គម្រោង ATscale អនុវត្តដោយអង្គការចំនួនបីគឺ Clinton Health Access Initiative (CHAI), Humanity and Inclusion (HI) and Cambodia Disabled People Organization (CDPO) ដោយ មានការសម្របសម្រួល និងសហការជាមួយដៃគូអភិវឌ្ឍន៍ផ្នែកពិការភាពទាំងអស់ក្នុងប្រទេសកម្ពុជា។

ឯកឧត្តមសាស្ត្រាចារ្យរដ្ឋមន្ត្រី ក៏បានបញ្ជាក់ជូនថា ក្រសួងសុខាភិបាលសហការគាំទ្រការផ្ទេរសេវាស្ដារលទ្ធភាពពលកម្ម និងឧបករណ៍អវយវៈសិប្បនិម្មិត ឧបករណ៍ជំនួយការស្តាប់ ដើមី្បជួយអោយជនមានពិការភាពរស់នៅប្រកបដោយ សុខភាពល្អ។ ទន្ទឹមនឹងនេះក៏ស្នើសុំឱ្យ ATscale ជួយសម្របសម្រួលជាមួយភាគីពាក់ព័ន្ធទាំងអស់ ទាំងការផ្ទេរមុខងារ ភារកិច្ច និងឯកសារគតិយុត្តពាក់ព័ន្ធនានា និងសុំឱ្យជួយរៀបចំផែនការ ទាំងរយៈពេលខ្លី និងរយៈពេលវែង ដោយសហការជាមួយផ្នែកពាក់ព័ន្ធរបស់ក្រសួងសុខាភិបាល ជាពិសេសចាំបាច់ត្រូវមានផែនការទាំងការប្រគល់-ទទួល ក៏ដូចជាផែនការដើម្បីរៀបចំ Set Up ផ្នែកដែលពាក់ព័ន្ធតាមមន្ទីរពេទ្យរដ្ឋផងដែរ។ ក្រសួងនឹងពង្រឹង និងពង្រីកសេវាសុខភាពបន្ថែមនៅតាមមូលដ្ឋានសុខាភិបាល គ្រប់លំដាប់ថ្នាក់ ដើម្បីគាំទ្រដល់ជនមានពិការភាព និងកាត់បន្ថយបន្ទុកលំបាករបស់ពួកគក្រោមជំនួយសហប្រតិបត្តិការរបស់គម្រោងខាងលើ និងដៃគូអភិវឌ្ឍន៍ទាំងអស់ ដើម្បីសម្រេចកសាងបានដោយជោគជ័យនូវក្របខណ្ឌអនុវត្តការជម្រុញបង្កើនការងារថែទាំសុខភាពបឋម ដែលបានកំណត់នូវសកម្មភាពចំបងៗ សម្រាប់ការអនុវត្ត ដោយថ្នាក់ជាតិ ថ្នាក់ក្រោមជាតិ អាជ្ញាធរ មូលដ្ឋាន និងសហគមន៍ ធ្វើអោយប្រសើរឡើងនូវការថែទាំសុខភាពបឋមជាសារវន្តមួយ ដែលជាតម្រូវការរបស់ប្រជាជន ដើម្បីឈានទៅសម្រេចបាននូវការគ្របដណ្តប់សុខភាពជាសកល ស្របតាមផែនការយុទ្ធសាស្រ្តបញ្ចកោណ នៃរាជរដ្ឋាភិបាលអាណត្តិទី៧ក្រោមការដឹកនាំដ៏ឈ្លាសវៃ និងប៉ិនប្រសប់ប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ៕