វ៉ាស៊ីនតោន៖ មន្ទីរបញ្ចកោណបានឲ្យដឹងកាលពីថ្ងៃសៅរ៍ថា សហរដ្ឋអាមេរិកនឹងបញ្ជូនប្រព័ន្ធការពារតំបន់រយៈកម្ពស់ខ្ពស់ Terminal High Altitude Area Defense (THAAD) និងកងវរសេនាតូចប្រព័ន្ធការពារដែនអាកាស Patriot បន្ថែមទៀតទៅកាន់មជ្ឈិមបូព៌ា ជាការឆ្លើយតបទៅនឹងការវាយប្រហារនាពេលថ្មីៗនេះលើកងទ័ពសហរដ្ឋអាមេរិកនៅក្នុងតំបន់នេះ។
សហរដ្ឋអាមេរិកបានបញ្ជូនកម្លាំងទ័ពជើងទឹកយ៉ាងច្រើនទៅកាន់មជ្ឈិមបូព៌ាក្នុងប៉ុន្មានសប្តាហ៍ថ្មីៗនេះ រួមទាំងនាវាផ្ទុកយន្តហោះពីរ នាវាជំនួយរបស់ពួកគេ និងកងម៉ារីនប្រហែល ២,០០០នាក់។
ទីក្រុងវ៉ាស៊ីនតោន កំពុងតែមានការប្រុងប្រយ័ត្នខ្ពស់ចំពោះសកម្មភាពដោយក្រុមដែលគាំទ្រដោយអ៊ីរ៉ង់ ខណៈដែលភាពតានតឹងក្នុងតំបន់កើនឡើងក្នុងអំឡុងពេលសង្គ្រាមអ៊ីស្រាអែល និងក្រុមហាម៉ាស់។
រដ្ឋមន្ត្រីការពារជាតិ លោក Lloyd Austin បានឲ្យដឹងនៅក្នុងសេចក្តីថ្លែងការណ៍មួយថា បន្ទាប់ពីកិច្ចពិភាក្សាលម្អិតជាមួយប្រធានាធិបតីសហរដ្ឋអាមេរិក លោក Joe Biden ស្តីពីការកើនឡើងនាពេលថ្មីៗនេះដោយអ៊ីរ៉ង់ និងកងកម្លាំងប្រូកស៊ីរបស់ខ្លួននៅទូទាំងតំបន់មជ្ឈិមបូព៌ា ថ្ងៃនេះខ្ញុំបានដឹកនាំជំហានបន្ថែមមួយចំនួនដើម្បីពង្រឹងឥរិយាបថរបស់ក្រសួងការពារជាតិនៅក្នុងតំបន់។
លោក Lloyd Austin បានបន្តថា លោកកំពុងដាក់ទាហានបន្ថែមលើការបញ្ជាឱ្យត្រៀមដាក់ពង្រាយ ប៉ុន្តែមិនបានបញ្ជាក់ថាមានចំនួនប៉ុន្មានទេ។ មន្ទីរប៉ង់តាហ្គោនបានដាក់ទាហានប្រហែល ២,០០០នាក់រួចហើយលើស្ថានភាពត្រៀមខ្លួនជាស្រេចក្នុងករណីដែលពួកគេត្រូវការដាក់ពង្រាយទៅកាន់តំបន់។
លោក Lloyd Austin បានបន្ថែមថា ជំហានទាំងនេះនឹងជំរុញកិច្ចខិតខំប្រឹងប្រែងទប់ស្កាត់ក្នុងតំបន់ បង្កើនការការពារកម្លាំងសម្រាប់កងកម្លាំងសហរដ្ឋអាមេរិកនៅក្នុងតំបន់ និងជួយការពារជាតិអ៊ីស្រាអែល។
ការដាក់ពង្រាយនេះកើតឡើងពីរឆ្នាំបន្ទាប់ពីរដ្ឋបាលរបស់លោក Biden បានដកប្រព័ន្ធការពារដែនអាកាសចេញពីមជ្ឈិមបូព៌ា ដោយលើកឡើងពីការកាត់បន្ថយភាពតានតឹងជាមួយអ៊ីរ៉ង់។
អ៊ីស្រាអែលបានចាប់ផ្តើម ការឡោមព័ទ្ធទាំងស្រុង នៃតំបន់ហ្គាហ្សា បន្ទាប់ពីការវាយប្រហារឆ្លងព្រំដែនកាលពីថ្ងៃទី៧ ខែតុលា ទៅលើភាគខាងត្បូងអ៊ីស្រាអែល ដោយពួកសកម្មប្រយុទ្ធនៃចលនាអ៊ីស្លាម បានសម្លាប់មនុស្ស ១,៤០០នាក់ ភាគច្រើនជាជនស៊ីវិល នៅក្នុងការវាយប្រហារដ៏តក់ស្លុតដែលបានធ្វើឱ្យអ៊ីស្រាអែលមានរបួស។
ក្រសួងសុខាភិបាលនៃតំបន់ហ្គាហ្សាបានឲ្យដឹងកាលពីថ្ងៃសៅរ៍ថា ការវាយប្រហារតាមអាកាស និងកាំជ្រួចរបស់អ៊ីស្រាអែលបានសម្លាប់ប្រជាជនប៉ាឡេស្ទីនយ៉ាងហោចណាស់ ៤,៣៨៥នាក់ រួមទាំងកុមាររាប់រយនាក់ ជាមួយនឹងជាងមួយលាននាក់ក្នុងចំណោមប្រជាជន ២.៣លាននាក់នៃទឹកដីដ៏តូចនេះត្រូវផ្លាស់ទីលំនៅ។
ប្រភព៖ Reuters
ប្រែសម្រួលដោយ៖ ឡាយ លីហួ
https://www.reuters.com/world/middle-east/us-sending-additional-air-defense-systems-middle-east-pentagon-2023-10-22/
