ឯកឧត្តម សុខ លូ ដឹកនាំកិច្ចប្រជុំពិភាក្សាការងារអំពីវឌ្ឍនៈភាពនៃការរៀបចំពិធីបុណ្យអុំទូក និងបណ្ដែតប្រទីបខេត្តបាត់ដំបង ឆ្នាំ២០២៣

ភ្នំពេញ៖ នាព្រឹកថ្ងៃទី២០ ខែតុលា ឆ្នាំ២០២៣ ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង និងជាប្រធានគណៈកម្មការរៀបចំពិធីបុណ្យអុំទូក និងបណ្ដែតប្រទីបខេត្តបាត់ដំបង ឆ្នាំ២០២៣ បានអញ្ជើញដឹកនាំកិច្ចប្រជុំពិភាក្សាការងារអំពីវឌ្ឍនៈភាពនៃការរៀបចំពិធីបុណ្យអុំទូក និងបណ្ដែតប្រទីបខេត្តបាត់ដំបង ឆ្នាំ២០២៣ ជាមួយប្រធានអនុគណៈកម្មការរៀបចំពិធីបុណ្យអុំទូក និងបណ្ដែតប្រទីបខេត្តបាត់ដំបង ឆ្នាំ២០២៣ លោក លោកស្រីអភិបាលក្រុង ស្រុក លោក លោកស្រីប្រធាន និងអនុប្រធានមន្ទីរ អង្គភាពក្នុងខេត្ត និងអ្នកពាក់ព័ន្ធមួយចំនួនទៀត នៅសាលប្រជុំ B2 សាលាខេត្តបាត់ដំបង ។

ឯកឧត្តម សុខ លូ អភិបាល នៃគណៈអភិបាលខេត្តបាត់ដំបង និងជាប្រធានគណៈកម្មការរៀបចំពិធីបុណ្យអុំទូក និងបណ្ដែតប្រទីបខេត្តបាត់ដំបង ឆ្នាំ២០២៣ បានមានប្រសាសន៍ថា ណែនាំដល់ក្រុមការងារទទួលផែនត្រូវមើលបន្ថែមទៅលើការតុបតែងលម្អលើដងវិថី ដើមឈើ សួនច្បារ និងស្ពានជាដើម ព្រមទាំងត្រៀម និងបែងចែកកម្លាំងទៅតាមទីតាំងដែលកំណត់ នឹងត្រូវធ្វើយ៉ាងណា ត្រូវមានច្រកសម្រាប់សង្គ្រោះបន្ទាន់សម្រាប់ក្នុងករណីមានអគ្គិភ័យ ឬមួយមានគ្រោះថ្នាក់ណាមួយកើតឡើងជាយថាហេតុ។

ឯកឧត្តម បានមានប្រសាសន៍បន្តថា ចំពោះការកំណត់ទីតាំងវិញគឺត្រូវបានបែងចែកជាពីរផ្នែកមានផ្នែកខាងលើផ្ទៃទឹក និងផ្នែកនៅលើគោក ដើម្បីងាយស្រួលក្នុងការឲ្យបងប្អូនប្រជាពលរដ្ឋ អាចទស្សនាកំសាន្តក្នុងការប្រកួតប្រណាំងទូកង និងមើលពិពណ៌ផលិតផលនៅក្នុងស្រុកផងដែរ។

ឯកឧត្តមមានប្រសាសន៍បន្តទៀតថា បានថាចំពោះបញ្ហាទឹកនៅក្នុងដងស្ទឹងសង្កែត្រូវធ្វើយ៉ាងណារក្សាឲ្យថេរ ដើម្បីឲ្យការប្រណាំងទូកងគឺមានសភាពសមមូលទៅនឹងអ្នកទស្សនា ហើយមួយទៀតត្រូវដាក់ពេលវេលាក្នុងការប្រកួតប្រណាំងទូកឲ្យបានច្បាស់តាមការកំណត់ ដើម្បីឲ្យបងប្អូនប្រជាពលរដ្ឋងាយស្រួលក្នុងការមកទស្សនាផងដែរ។

លើសពីនេះទៅទៀត ឯកឧត្តមបានមានប្រសាសន៍ថា កងកម្លាំងមានសមត្ថកិច្ចត្រូវរឹតបន្តឹងរឿងការងារការពារសណ្ដាប់ធ្នាប់សាធារណៈឲ្យមានសន្តិសុខល្អ ព្រោះថានៅពេលដែលមានសាធារណជនច្រើននោះ ក៏អាចធ្វើឲ្យមានការបង្កនូវអំពើអសន្ដិសុខមួយចំនួន ដូចជាអំពើលួច អំពើហិង្សា ការជួញដូរគ្រឿងញៀន ការប្រើប្រាស់គ្រឿងញៀនជាដើម។

ឯកឧត្តមបានបញ្ជាក់បន្ថែមថា ចំពោះការផ្ញើរកង់ ម៉ូតូ និងរថយន្តគឺត្រូវមានការកំណត់តម្លៃឲ្យជាក់លាក់ហើយសមរម្យមួយ ដែលប្រជាពលរដ្ឋអាចទទួលយកបាន មិនមានការកេងប្រវញ្ច័ ឬមួយឆក់ឱកាសឡើងថ្លៃការផ្ញើនោះទេ ព្រោះបញ្ហានេះក៏ជាផ្នែកមួយធ្វើឲ្យកំណើននៃភ្ញៀវទេសចរណ៍អំឡុងពេលមានពិធីបុណ្យផ្សេងៗថយចុះបានផងដែរ។

ទន្ទឹមនឹងនេះដែរឯកឧត្តមបានលើកទឹកចិត្តតាមមន្ទីរ អង្គភាព និងនៅតាមស្រុកនីមួយៗគួរតែមានទូកង របស់ខ្លួនឯងផ្ទាល់មួយដើម្បីប្រកួតប្រណាំងនៅពេលមានពិធីបុណ្យអុំទូក ឬមួយក៏ពិធីបុណ្យផ្សេងៗ ដើម្បីរក្សានូវប្រពៃណីទំនៀមទម្លាប់របស់ខ្មែរយើងផង និងដើម្បីយកស្នាដៃសម្រាប់មន្ទីរ អង្គភាព ឬមួយស្រុករបស់យើងផង។

ឯកឧត្តម សុខ លូ បានមានប្រសាសន៍អំពាវដល់នាវបងប្អូនប្រជាពលរដ្ឋទាំងអស់ សូមអញ្ជើញមកទស្សនាកំសាន្តក្នុងពិធីបុណ្យអុំទូក និងបណ្ដែតប្រទីបខេត្តបាត់ដំបងនេះ ឲ្យបានច្រើនកុះករ ទន្ទឹមនឹងនោះសូមសារធារណជនគ្រប់ស្រទាប់វណ្ណៈក្នុងការជួយសម្អាតបរិស្ថាន និងគ្រប់គ្រងសំរាមទាំងមុន អំឡុងពេល និងក្រោយពេលពិធីបុណ្យអុំទូកនេះចប់ទៅ ដើម្បីសោភ័ណភាព និងផាសុកភាព សម្រាប់ខេត្តក៏ដូចជាប្រជាជនដែលរស់នៅក្នុងខេត្តបាត់ដំបងផងដែរ៕